Yesu balukiila muiyilu

Yesu baadi mufumankane na balongi baye mu Ngalileya. Bebapeele muiya wi na muulo ukata pa kuibalungula’shi: ‘Ndayi nuikashe bantu ba mu miilo yoso bu balongi, nuibabatshishe. Nuibalongieshe bia kutumikila mianda yoso yandi muinutumine eyi.’ Akupu aye nkuibalaa’shi: ‘Ne nenu mafuku oso mpa na ku nfudiilo kua uno ndumbuluilo a mianda.’

Munda mua mafuku 40 kunyima ku’aye kusanguka, Yesu baadi mumuenekiele balongi baaye nkama mu Ngalileya na mu Yelusalema. Baadi muibalongieshe mianda i na muulo ukata na kukita bilengieleshi bibungi. Akupu Yesu baadi muibungie na batumibua baye bua musango wa nfudilo ku Muengie wa Olive. Baadi muibalungule’shi: ‘Tanukatukanga mu Yelusalema. Nushale batengiele kiakia kibalayile Yaaya.’

Batumibua baye tababaadi bapushe kibaadi akiebe kuakula nya. Abo nkumuipusha’shi: ‘Okafiki bu Nfumu a Isalele binobino?’ Yesu nkuakula’shi: ‘Nsaa ya Yehowa ya kuntula bu Nfumu tayabandile kulombana nya. Anka anukapete bukome bua kikudi kiselele, na anukekala tumonyi tuande. Ndayi nukalambukishe mu Yelusalema, mu Yudeya, mu Samadiya, mpa’nka na kufudile nsenga.’

Akupu bakaamiine muiyilu, makumbi nkumushikiila. Balongi baaye abashadile abatala muiyilu, anka baadi mupue kuenda.

Balongi abaadi bakatukie ku Muengie wa Olive abo nkuenda ku Yelusalema. Abaadi abebungu pamune misango ibungi bua kuteka mu kadimbo ka kuiyilu. Abaadi abatengiela bua’shi Yesu ebape angi malango.