Balongi abapete kikudi kiselele

Mafuku ekumi kunyima kua Yesu kualukiila muiyilu, balongi baye abapetele kikudi kiselele. Mu baadi mu Pantekote mu kipua kia 33 B.B., na bantu abakatukile mu ma mbalo ebungi bua kuenda ku musangeelo mu Yelusalema. Balongi ba Yesu bafikie ku 120 abaadi bebungie mu kadimbo ka nshibo ya kuiyilu. Kubaadi kukitshikie kintu kia kukaanya musango umune. Ku mutue kua mulongi oso kubayikile kintu bu ludimi lua kaalo, abo nkubanga kuakula mu ndimi ilekenelekene. Kituumo ki bukopo bu kia kipapi kibaudile mu nshibo.

Benyi ba mu angi maumbo abafikile mu Yelusalema abapushishe kituumo, abo nkuenda lubilo ku nshibo mu kutala kibaadi akikitshika. Abaadi bakaanye bikata p’abo kupusha balongi abakula yaya ndimi yoso. Abo nkuamba’shi: ‘Bano bantu boso mba ku Ngalileya. Nkipaso kinyi kiabakula mu ndimi yetu?’

Akupu Mpiele, na bangi batumibua abayimeene kumpala kua kibumbu. Mpiele nkuibalungula bibaadi Yesu muipayibue na bibadi Yehowa mumusangule ku lufu. Mpiele nkuakula’shi: ‘Yesu e muiyilu binobino mushale ku mboko ibalume y’Efile Mukulu, na bapongoola kikudi kiselele kibaadi mulee. Nyi buakinyi nubamono na kupusha bino bilengieleshi.’

Mayi a Mpiele abaadi ebakume ku mashimba, abo nkuipusha’shi: “Kilombene tua kita nkinyi?” Mpiele bebaluluile’shi: ‘Elangieyi ku miluisho yenu nubatshishibue muishina dia Yesu. Anukapete kia buntu kia kikudi kiselele.’ Mu diadia efuku, bantu bafikie ku 3 000 nkubatshishibua. Kubanga nka paapa, balongi ababangile kufuima bukidibukidi mu Yelusalema. Ku bukuashi bua kikudi kiselele, batumibua abakitshine tungi tukongie bua kulongiesha balongi bintu bioso bibaadi Yesu muibalongieshe.