Mwanda wa 105
Bakwete kutengyela mu Yeelusaleme
BANO bantu bokwete kumona pano nyi mbalondji ba Yesu. Mbakokyele ku bibebalungwile na bashaala mu Yeelusaleme. Na nsaa yabakwete kutengyela booso pamune, kubapushikile ewunga di bukopo mu nshibo ishima. Dibaadi nka bu kipapi ki bukopo akifiki. Na ndimi yakaalo nkubanga kumweneka ku mitwe ya balondji booso. Okwete kumona ndimi ya kaalo i ku mutwe wa muntu ooso su? Yaya ndimi yooso ayilesha kinyi?
Nyi nkipaso! Yesu balukiila mwiyilu kwi Nshaaye, na babanga kupongoola kikudi kiselele ky’Efile Mukulu kwi balondji baaye. Ouku kibabakitshine pababapetele buno bukome su? Booso bwabo bababangile kwisamba mu ndimi ilekeene.
Bantu bebungi ba mu Yeelusaleme babapushishe nka bu ewunga dya lupapi lukata, abo nkufika mu kumona kibaadi akikitshika. Bangi bantu be mwanka mba ku ingi miilo bafikye pano mu feete a Mpentekoote a beena Isaleele. Bano benyi bakwete kukanya! Bakwete kupusha balondji abesamba myanda ibuwa ikite Efile Mukulu mu ndimi yaabo.
Benyi ababanga kwakula shi: ‘Bano bantu booso abakula ta mbeena Ngadile su? Mbikunyi byabakula ndimi ya maumbo etu elekenelekene?’
Binobino Mpyeele beebo bwa kwibapatulwila. Bakamiishe eyi aye nkubanga kulungula bantu mushindo ubaadi Yesu mwipayibwe na shi Yehowa baadi mumusangushe ku lufu. Mpyeele bakwile shi: ‘Yesu e mwiyilu mushale ku mboko ilume y’Efile Mukulu, na mmupongoole kikudi kiselele kibaadi mulee. Bu byanupusha na kumona bino bipaso.’
Mpyeele pabapudishe kwakula yaya myanda, bantu bebungi babenyongwele ngofu pabitale bibabadi bakite Yesu. Abo nkwipusha shi: ‘Kilombeene twakita nkinyi?’ Mpyeele bebalungwile shi: ‘Alulayi nshalelo enu na nubatshishibwe.’ Byabya, mu dyadya efuku dimune bantu 3 000 babaadi babatshishibwe na babafikile balondji ba Yesu.