Mwanda wa 106

Abebatusha mu lukano

TALA uno mwikeyilu afungula kiibi kya lukano. Bano bantu batuusha mu lukano mbatumibwa ba Yesu. Tubande kumona bwakinyi mbebeele mu lukano.

Kubapu kukila mafuku apela kasha kikudi kiseleele kipongolokyele kwi balondji ba Yesu. Tala kibakitshikile: Mpyeele na Yowano babende mu ntempelo a mu Yeelusaleme kunyima kwa midi. Kwakwa, pepi na kibelo, kubaadi muntu baadi mulemane mu mafuku aaye ooso. Efuku dyooso bantu babaadi abamutwala bwashi afikye mu kuteka makuta kwi bantu booso bakwete kufika ku ntempelo. Yawa muntu pabamono Mpyeele na Yowano, bebatekye bwashi bamupe kantu. Batumibwa abakitshi kinyi binobino?

Babayimana ababanga kumutala. Mpyeele nkumulungula shi: ‘Makuta ntshii nawo. Anka kyandi nakyo, naakupa kyanka. Mwishina dya Yesu, ebwe otambukye!’ Mpyeele nkumukwata ku mboko ilume, na mususa umune beebo batumpika na babanga kutambuka. Bantu pababamwene byabya, ababangile kukanya na babaadi basangeele kyakya kipaso kibuwa.

Mpyeele bakwile shi: ‘Uno muntu batambuka ku bokume bw’Efile Mukulu, aye baadi mubuushe Yesu ku bafwe.’ Aye na Yowano pabakwete kwakula, bangi bakata ba bipwilo babafikile. Babaadi bafiite munda mwanda Mpyeele na Yowano bakwete kulungula bantu pabitale Yesu ababaadi basangushe ku lufu. Abo nkwibakwata nkwibeela mu lukano.

Pabubatooko, bakata ba bipwilo babebungu mu kisangilo kikata. Babakwata Mpyeele na Yowano pamune na yawa muntu ababaadi bapashe. Bakata ba bipwilo nkwibepusha shi: ‘Nku matalwa kinyi sunga mwishina dya nanyi mubanukitshi kino kipaso?’

Mpyeele nkwibalungula shi nku bukome bw’Efile Mukulu, baadi musangushe Yesu ku lufu. Batshiite-mwakwidi tabamono kya kukita, mwanda tambalombeene kupela shi kyakya kipaso kibakitshikile binyibinyi. Ndjo babalungula batumibwa bwashi tabakulanga dingi pabitale Yesu, na abo nkwibatadiila.

Bu bikwete kwenda mafuku na kukila, batumibwa babatungunuka na kwakula pabitale Yesu na kupaasha babaadi na mikumbo. Myanda itale bino bipaso ibapalakeene. Na mpa na bisaka bya bantu ba mu bibungi bifunyishe Yeelusaleme babatwadile baasha maladi kwi batumibwa bwashi bebapashe. Bino bibapeele bakata ba bipwilo kiutu, na abo nkukwata batumibwa nkwibeela mu lukano. Anka ta mbe mushaale mafuku ebungi nya.

Munkatshi mwa bufuku mwikeyilu a Efile Mukulu bafikile aye nkushitula kiibi, bu byokwete kumona mu kifwatulo. Mwikeyilu bambile shi: ‘Ndaayi nukeemane mu ntempelo, byabya mwamwa nuwukishe mwilo bino bishima bya muwa.’ Pa bubatooko ku namashika, bakata ba bipwilo pababatumine bantu bwashi bebatwadile batumibwa, babasangene mbapwe nkwenda. Kunyima, babebasangene bakwete kulongyesha mu ntempelo abo nkwibatwala mu nshibo ya Sanedrine.

Bakata ba bipwilo nkwibalungula shi: ‘Tubaadi benukandikye kulambukisha pabitale Yesu, kadi nubapalakasha malambukishi enu mu Yeelusaleme mushima.’ Batumibwa nkwalula shi: ‘Bii buuwa kukokyela Efile Mukulu bu nfumu pee kukokyela bantu.’ Byabya abo nkutungunuka na kulungula “mukandu wibuwa.” Kyakya ta nkileshesho kibuwa kyatudya kulonda su?

Bikitshino shapitre 3 mpa na ku 5.