Takubaadi kintu ki kuibemika nya

Kui muntu shibaadi atambuka baadi mushale ku kiibi kia ntempelo bua kuteka ka pa lusa. Dingi efuku kunyima kua midi, bamuene Mpiele na Yowano abende ku ntempelo. Aye nkuibalungula’shi: ‘Mpeyi namu ka pa lusa.’ Mpiele nkumulungula’shi: ‘Ntshi na kiamo kia arja sunga ôlo, kadi kiakia kiandi nakio nakupa kianka. Muishina dia Yesu Nkidishitu tambuka!’ Mpiele bamukuatshile aye nkubanga kutambuka! Kibumbu kia bantu nkusangala bikata na kino kilengieleshi bibaadi mpa na bebungi ba kuabadi bafikie bena kukumiina.

Kadi ba tshiite muakuidi na Basaduseo abafitshile munda bikata. Abakuatshile batumibua, nkuenda nabo ku tumiladi bua kuibepusha’shi: ‘Nnanyi muinupe matalua a kupaasha uno muntu? Mpiele nkuibalungula’shi: ‘Tui bapete bukome kui Yesu Nkidishitu anubaadi bepee.’ Bakata ba bipuilo nkusama’shi: ‘Tshiba muisambo wa Yesu!’ Kadi batumibua abambile’shi: ‘Abitungu tuisambe pabitale Yesu. Tatulekie kumuisambila nya.’

Musango umune abo bakiabakatuka mu kuibaposola, Mpiele na Yowano abayile kubaadi bangi balongi, abo nkuibalungula bibaadi bikidikie. Boso abatekiele Yehowa pamune bamulungula’shi: ‘Etupe namu katshintshi na kishima buatudia kutungunuka na kukita mudimo oobe.’ Yehowa bebapeele kikudi kiaye kiselele, abo nkutungunuka na kulungula mukandu wibuwa na kupaasha bantu. Bantu babaadi abanyinsha kufika bena kukumiina. Basaduseo abakuatshile kiutu, bibaabadi mpa na bakuate batumibua abo nkuibeela mu lukano. Anka Yehowa batumine muikeyilu bufuku, aye nkufungula biibi bia ku lukano na kuibalungula’shi: ‘Alukiilayi mu ntempelo nukalambukiishe muamua.’

Butookie namashika, abalunguile bena Tumiladi tukata tua bena Yunda ba ku tumilaadi tua bakunkushi ba bipuilo’shi: ‘Ku lukano nkufungie, kadi bantu banuikeele bakuate abapu kutuuka! Be mu ntempelo muabakuete kulambukisha bantu!’ Abakuatshile dingi batumibua, abo nkuibatuala mu Tumiladi tukata tua bena Yunda. Tshiite muakuidi mukata e panundu nkuamba’shi: ‘Tui benutoshe bua kuisamba pabitale Yesu!’ Kadi Mpiele nkumualuula’shi: ‘Abitungu tukookiele Efile Mukulu pee kukookiela bantu.’

Bakata ba bipuilo nkufiita munda bikata, nkukimba mpa na bia kuipaa batumibua. Anka ungi Mufadisee a betanyina bu Gamaliele baadi muimane aye kuamba’shi: ‘Dimukaayi! Efile Mukulu e kuikala na bano bantu. Anukiebe kulua ngoshi n’Efile Mukulu?’ Abaadi bamupushishe. Kunyima kua kukupila batumibua nfimbo, abaadi bebaposole na kuibatosha dingi bua kuimika kulambukisha. Tabibaadi bimikie batumibua nya. Abaadi bantungunukie na kulungula mukandu wibuwa na katshintshi, mu ntempelo na ku nshibo na nshibo.