Yesu basangula Saule

Saule baadi muina Loma baadi mutandikilue mu Tarse. Baadi Mufadisee balambukishanga Miiya ya bena Yunda, baadi mushikue bena Nkidishitu. Baadi atuusha bena Nkidishitu balume na bakashi mu mashibo aabo na kuibela mu lukano. Bapetekielue pabaadi kisaka kia bantu be na nsungu abaasa Etiene mabue peepi na lufu.

Saule tabaadi musangeele kuimika bena Nkidishitu penda mu Yelusalema nya. Batekiele tshiite muakuidi mukata e panundu buadia kumutuma ku Damase bua’shi akakiengieshe bena Nkidishitu kuakua. Pabaadi Saule pepi na kibundi, nsembue ya nguba ibaadi imumunyikie musango umune, aye nkupona mu nsenga. Bapushishe eyi adiakula’shi: ‘Saule, buakinyi okuete kunkiengiesha biabia?’ Saule nkuipusha’shi: ‘A nnobe nnanyi?’ Adio nkumualuula’shi: ‘Nnami Yesu. Enda ku Damase, abakakulungula akitungu’shi okite.’ Mu kapindi kapeela, Saule bafikile mpofu, abaadi na kia kumunkunkusha bua kufika mu kibundi.

P’abafikile ku Damase, kubaadi muina Nkidishitu sha lulamato abetamina bu Ananiase. Yesu nkumulungula mu kimonua’shi: ‘Ebuee wende mu museese wabetanyina bu Ululame, ku nshibo kua Yundase, okakimbe muntu abetanyina bu Saule.’ Ananiase nkuakula’shi: ‘Muanana nauku mianda yoso bua yawa muntu! Mmueleshe balongi boobe mu lukano!’ Kadi Yesu nkumulungula’shi: ‘Enda kuadi. Muanda namusangula bua kulungula mukandu wibuwa kui bisamba biibungi.’

Ananiase bayile, nkusangana Saule na nkumulungula’shi: ‘Saule, mukuetu, Yesu bantumu koodi bua’shi nkubuule meeso.’ Musango umune, Saule babangile dingi kumona. Aye nkulonga pabitale Yesu na nkufika bu mulongi aaye. Binobino pabaapu kufika muina Nkidishitu mupue kubatshishibua, Saule babangile kulungula mukandu wibuwa mu bitumbuilo pamune na bakuabo bena Nkidishitu. We kumona mu binangu bibaadi bena Yunda batapikie ku mashimba pa kumona Saule kualongiesha bantu pabitale Yesu! Abambile’shi: ‘Nnaye uno muntu umune ekeele akiengiesha balongi ba Yesu?’

Munda mua bipua bisatu, Saule baadi mulambukishe bantu babaadi mu Damase. Bena Yunda nkumushikua bikata na nkudia lukuku lua kumuipaa. Kadi bakuetu abapushishe lualua lukuku abo nkumukuasha bua kusuuka. Abamuelele mu kiseele, abo nkumutuusha mu buina ku mudimba wa kibundi.

Pabaadi Saule muende ku Yelusalema, bakimbile bia kuibunga pamune na bena Nkidishitu. Anka abaadi abamutshinyi. Ungi mulongi sha kalolo abetanyina bu Barnabase batuadile Saule kui batumibua na kuibashinkamiisha’shi Saule bapuile kushintuluka binyibinyi. Saule nkubanga kulungula mukandu wibuwa na kisumi pamune na kakongie mu Yelusalema. Kunyima kua mafuku, eshina diaye dibafikile bu Mpoolo.