Mwanda wa 101

Abayipa Yesu

BANDA kutala mwanda ukata wibubi aukitshika pano! Yesu bayipayibwa. Mbamubambe ku mutshi. Misumadi ngimutubule maboko na mikolo. Bwakinyi babakitshina Yesu kintu kibubi bino?

Mwanda bangi bantu mbashikwe Yesu. Ouku shi mbantu kinyi? Umune a kwabadi nyi Satana Diabulu, mwikeyilu ebubi. Nnaaye baadi na mushindo wa kutakula Adame na Eeva bwashi bakutwe kukokyela Yehowa. Satana ndjo baadi mutakule beshikwanyi na Yesu bwashi bakite kino kibeshi.

Sunga kumpala kwashi bakokole Yesu ku uno mutshi, beshikwanyi baaye babaadi bamukitshine myanda ibungi ibubi. Otentekyesha mushindo wabekele bafikye mu kumukwata mwifuba dya Getesemane su? Baba beshikwanyi baye mbatu abekalanga bantu kinyi? Nyi mbakata ba bipwilo. Tubande kutala akikyebe kukitshika kumongo.

Pababakwata Yesu kwi bakata ba bipwilo, balongi baaye babasuuku. Babamulekye, mwanda babaadi na moo. Kadi Mpyeele na Yowano batumibwa baaye ta mbende kwibula naaye nya. Babamulondo bwa kumona kyabakyebe kukita Yesu.

Bano batshiite-mwakwidi babatwala Yesu kwi Hane muntu mukulu, baadi tshiite-mwakwidi e panundu. Kino kisaka kya bantu ta nkiyishe pano nya. Babatwala Yesu dingi ku nshibo ya Kayifase, taadi binobino bu tshiite-mwakwidi e panundu. Bakata ba bipwilo bebungi mbebungye mu ino nshibo.

Babamutee kasele mu nshibo ya Kayifase. Babafiki na bantu bwashi badimbiile Yesu. Bakata ba bipwilo babamba booso shi: ‘Abitungu kwipaa Yesu.’ Akupu ababanga kumwasa mata mu mpala, na kumukupila mapi.

Nsaa ikwete kukitshika bino byooso, Mpyeele e paasha mu lupango. Mashika abeele bufuku, byabya bantu babeele kaalo bwa koota. Pababadi bebungye booso pa kaalo, mufubi mukashi batala Mpyeele na bamba shi: ‘Uno muntu ekalanga na Yesu.’

Mpyeele balula shi: ‘Nyaa!’

Mu misusa isatu bantu babambile Mpyeele shi baadi na Yesu. Kadi Mpyeele baadi atunu mususa ooso. Mususa wa kasatu ubatunyine Mpyeele, Yesu bealulwile aye nkumutala. Mpyeele benyongwele ngofu pa mwanda wa bibakatuka mu kudimba, na bayiile na kudila.

Nguba pababanga kutunduka mu dya Katano ku namashika, ba tshiite-mwakwidi babayile na Yesu ku kisangilo kyabo kikata, kya Sanedrine. Kwakwa babesambile pabitale kyakukita naaye. Babamutwadile kwa Ponte Pilato, mukunkushi a mu distrike dya Yudeya.

Ba tshiite-mwakwidi nkulungula Pilato shi: ‘Uno nyi muntu ebubi. Abitungu ku mwipaa.’ Aye baapu kwela Yesu nkonko, Pilato bakwile shi: ‘Ntamono shi uno muntu mukite kintu kampanda kibubi nya.’ Akupu Pilato batumu Yesu kwa Eerode Antipase. Eerode nfumu a mu Ngadilee, kadi mushalele mu Yeelusaleme. Eerode tamumone shi Yesu mukite kintu kampanda kibubi, ndjo balusha Yesu kwa Pilato.

Pilato akumina kuposola Yesu. Kadi beshikwanyi ba Yesu abakumina shi baposole ungi mwina lukanu pa mbalo ya Yesu. Uno muntu nyi Barabase ngifi. Pilato nsaa ibatusha Yesu pasha, binobino takudi pepi na midi. Balungula bantu shi: ‘Talayi! Nfumu enu! Kadi ba tshiite-mwakwidi babelanga misase shi: ‘Mukaashe! Aipayiibwe! Aipayiibwe!’ Ndjo Pilato nkuposola Barabase, na nkwata Yesu bwa ku mwipaa.

Mu dya Katano ku kyolwa Yesu bakookolwa ku mutshi. Twe mulombeene kwibamona mu kifwatulo nya, kadi ku mpese yooso ibidi ya Yesu kubaadi bantomboshi bababayipayile dingi ku mutshi. Kapindji kapeela kumpala kwa Yesu kufwa, umune a ku bantomboshi bamulungula shi: ‘Ontentekyeshe nsaa yokekala nfumu.’ Na Yesu bamwalulwile shi: ‘Eyendo nakulungula shi okekala nami mu Mpaladiiso.’

Wawa ta mulayilo wibuwa su? Ouku shi Yesu kwete esambila pabitale mpaladiiso kinyi? Mpaladiiso ababakitshine kwi Efile Mukulu ku kibangilo baadi kunyi? Baadi pa nsenga. Yesu pakamunana bu nfumu mwiyilu, akasangusha uno muntu bwashi ekale na muloo mu Mpaladiiso pa nsenga. Tatwi balombeene kusangeela uno mwanda su?

Mateo 26:57-75; 27:1-50; Luuka 22:54-71; 23:1-49; Yowano 18:12-40; 19:1-30.