Lufu lua Yesu ku Gologota

Bakata ba batshiite muakuidi abaatshile Yesu benda naaye kuibalasa dia nfumu. Pilato bebayipuishe’shi: ‘Mmuanda kinyi ubi ukite uno muntu?’ Abo nkumualuula’shi: ‘Kuete kuituula bu nfumu!’ Pilato nkuipusha Yesu’shi: “Obe namu we winyi Nfumu a bena Yunda su?” Yesu bamualuluile’shi: “Bufumu buande ta mbua pano pa nsenga.”

Akupu Pilato batumine Yesu kui Erode mukunkushi a bena Ngalileya bua kutala su mmukite muanda wibubi. Erode tabaadi musangane muanda ubi kui Yesu su ngumune, aye nkuibalusha kui Pilato. Pilato nkulungula muilo’shi: ‘Sunga Erode sunga Nnami tatui bamone muanda ukite uno muntu nya. Namulekie bulungantu.’ Kibumbu nkusama’shi: ‘Muipee! Muipee!’ Basalayi nkukupila Yesu nfimbo na kumufidila mata, abo nkumukupila bikata. Abaadi bamufuadikie kifulu kia milobo ku mutue na kumusepa pa kuakula’shi: ‘Nfumu a bena Yunda tubakuimuna.’ Pilato nkulungula dingi kibumbu’shi: ‘Ntshi mumone muanda sunga umune ukite uno muntu nya.’ Kadi, abaadi abasama’shi: ‘Mupudikie ku mutshi!’ Nyi Pilato nkumutadiila buabadia kumuipaa.

Abaadi bende na Yesu ku mbalo yabetanyina bu Gologota, abo nkumukookola ku mutshi. Yesu belele luteko’shi: Yaaya ebafuile lusa, muanda tabauku kiabakitshi.’ Bantu nkubanga kusenga Yesu pa kuakula’shi: ‘Su we Muana a Efile Mukulu, ika kuakua ku mutshi! Epaashe obe nabene.’

Umune a ku bantomboshi abaabadi bapudikie mu buipi muaye bakuile’shi: ‘Ontentekieshe namu pokafiki mu Bufumu bobe.’ Yesu nkumulaa’shi: “Okeekala nami mu Mpaladiso.” Kunyima kua midi kubelele mufito munda mua nsaa isatu mu nsenga ishima. Bangi ba ku balongi pamune na Mariya nyin’aye na Yesu abaadi bemane pa buipi na mutshi ubaabadi bamupudikie. Yesu nkulungula Yowano bua kupasukila Mariya nka bu nyin’aye.

Nfudiilo a bioso, Yesu bambile’shi: “Bioso bibaalombana!” Banyekiele mutue aye nkutshiba eshimba. Mu yaaya nsaa, nsenga ibaadi isanesane bikata. Kilamba ki bushito kibaadi akiabuula mbalo iselele na Ikile Kishila mu ntempelo, kibaadi kisanukie pankatshi. Ungi mukata a basalayi bambile’shi: ‘Mbinyibinyi uno muntu ekeele Muana Efile.’