Mwanda wa 99

Mu nshibo ya kunundu

BINOBINO, mbufuku bwa mu dya kananka, kubaapu kukila mafuku abidi. Yesu na batumibwa baaye 12 babafiki mu ino nshibo ikata ya kunundu bwa kudya kidibwa kya Lukilo. Mwana mulume okwete kumona kwete kwenda yawa nyi Yudase Iskaryote. Kwete kwenda mu kulungula batshiite-mwakwidi mushindo wabadi balombeene kukwata Yesu.

Efuku dishale, Yudase ayikalanga mwende mu kwipusha shi: ‘Anumpa kinyi su nenukwasha bwa kukwata Yesu?’ Babamwalulwile shi: ‘Nfwalanga makumi asatu.’ Binobino Yudase kwete kwenda mu kwimonena nabo bwashi ebatwale kwi Yesu. Wawa ta mwanda wi bubi su?

Kidibwa kya Lukilo kibaapu kupwa. Kadi Yesu babanga kingi kidibwa kya ungi mushindo. Batambika batumibwa baaye mukate bebalungula shi: ‘Ataayi nudye, kino akilesha mbidi yande ayikapebwa bwenu.’ Akupu bebapa kipulu kya nfinyo bebalungula shi: ‘Ekitomeyi, mwanda kino akilesha mase ande aakasukumunwa bwenu.’ Mu Bible abe kitamina bu ‘kidiibwa kya Mwanana’ sunga bu ‘kidibwa kya Mwanana kya kyolwa.’

Beena Isaleele babaadi abadi kidibwa kya Lukilo bwa kutentekyesha nsaa ibaadi mwikeyilw’Efile Mukulu ‘mukile’ mashibo abo mu Ejiipitu, aye nkwipaa mwana mbedi ooso a mu nshibo ya beena Ejiipitu. Kadi binobino Yesu akumina shi balongi baaye bamutentekyeshe, na batentekyeshe mushindo ubaadi mupaane muwa waye bwabo. Nyi bwakinyi kwete kwibalungula bwashi bekale abakitshi kino kidibwa kikata ku kipwa kyooso.

Kunyima kwabo kudya Kidiibwa kya Mwanana, Yesu balungula batumibwa baaye bwashi bekale banyingye na bakomeshe lukumino lwabo. Ku nfudiilo, babayimbila Efile Mukulu loono akupu babakatuka. Binobino nsaa ibaapu kukila, abimweneka bu midi ya bufuku ibaapu kukila. Tubande kutala kwabakyebe kwenda.

Mateo 26:14-30; Luuka 22:1-39; Yowano shapitre 13 mpa na ku 17; 1 Beena-Kodinto 11:20.