Kidibua kia nfudiilo kia Yesu

Bena Yunda abaadi abakitshi musangeelo wa Pasaka ku kipua kioso mu efuku dia 14 dia mueshi wa Nisane. Bino bibaadi abibatentekiesha bibaadi Yehowa muibapososhe ku bupika mu Ejipitu na kuibatuesha mu Nsenga ya Mulayilo. Mu kipua kia 33 B.B., Yesu na batumibua baye abakitshine musangeelo wa Pasaka mu kadimbo ka kuiyilu mu Yelusalema. Ku nfudiilo kua kidibua, Yesu bakuile’shi: ‘Umune a kuanudi a kampana.’ Batumibua abaadi benyongole ku mashimba bikile, abo nkuipusha Yesu’shi: ‘A nnanyi?’ Yesu bakuile’shi: ‘Ngiawa muntu Ankuete kupa uno mukate.’ Akupu Yesu bapeele Yundase Iskariote kipese kia mukate. Musango umune, Yundase batuukile mu kadimbo aye nkuibaleka.

Yesu belele luteko, aye nkutshokola ingi mikate tupese na nkuitupa batumibua baye abashadile. Aye nkuakula’shi: ‘Atayi nudie uno mukate. Auleesha mbidi yande Ya nkatuusha pa muanda wenu.’ Akupu batshile nfinyo nkuela luteko, aye nkupa batumibua. Amba’shi: ‘Tomayi booso ino nfinyo. Ayileesha mase ande, A nkatuusha bua kufuidibua lusa ku miluisho yenu. Nenulaa’shi anukekala nami muiyilu bu banfumu. Ikalayi anukitshi bino kipua kioso bua kuntentekiesha.’ Balondi ba Yesu abatungunukaa na kuibunga pamune kiakia kiolua ku kipua kioso. Kiakia kisangilo abekitamina binobino bu Kidibua kia Kiolua kia Muanana.

Kunyima kua kidibua, batumibua ababangile kuikutuena bua kuuka baadi na muulo kukila bangi. Kadi Yesu bebalunguile’shi: ‘Mukile bukata munkatshi muenu ngiawa etuulu pa mbalo ya mukile bukinga e bu mushadile ku boso.’

‘Nui ba kuuku bande. Nenuiukisha bioso abindungula Nshami buandia kuinulungula. Binobino Nende kui Nshami muiyilu. Anukashaala anka, bantu abakatundula’shi nui balongi bande muanda wa kifulo akikala munkatshi muenu. Abitungu nuifulene muntu na muntu nka bu Biandi muinufule.’

Ku nfudiilo, Yesu belele luteko, aye nkuteka Yehowa bua kukaluila balongi baye boso. Batekiele Yehowa buadia kuibakuasha bua’shi bafube pamune mu butaale. Batekiele dingi bua’shi eshina dia Yehowa diende ntumbo. Akupu Yesu na batumibua abayimbile misambo ya kutumbisha nayo Yehowa abo nkutuuka pasha. Nsaa ya kukuata Yesu ibaadi ifubuile pepi.