Mwanda wa 115
Mpaladiiso mupya pa nsenga
BANDA kutala ino mitshi yooso, bilongo bibuwa na myengye ibula. Ino mbalo tayibuwa su? Tala mushindo ukwete kudya ngulungu mwiyasa dya ka nsongwalume. Banda kutala ntambwe na mpunda imane kubula mwifuba. We mulombeene kukumina kushala mu nshibo ibakye pa mbalo i bino su?
Efile Mukulu akumina shi wekale na muwa wa looso pa nsenga mu mpaladiiso. Takumina wekala na mikumbo ibungi ikwete kukwata bantu lelo uno nya. Pabitale bano abakashaala mu mpaladiiso mupya, mu Bible mwi uno mulayilo awamba shi: ‘Efile Mukulu akashala pamune nabo. Lufu taalwikala kwanka dimo, sunga kwidila sunga mukumbo. Myanda ya kala ayikashimina.’
Yesu akakitshi mwaye mooso bwashi ino myanda yooso ilombane. Ouku shi ayikakitshika mu mafuku kinyi? Oolo, kunyima kwa kukaasha bubi booso na bantu bebubi pa nsenga. Tentekyesha shi, pabaadi Yesu pa nsenga, bapashishe bantu abaadi na mikumbo ilekeene, mpana kubuusha bafwe. Yesu bakitshine bino bwakulesha shi akyebe kwibikita pa nsenga ishima nsaa yakyebe kwikala Nfumu mu bufumu bw’Efile Mukulu.
Banda kupwandikisha mushindo aukekadika mpaladiiso mupya pa nsenga! Yesu na bantu baadi musangule, abakamunana pamune naaye mwiyilu. Baba bakunkushi abakyebe kulama muntu ooso e pa nsenga na kukita bwashi ekale na muloo. Tubande kutala akitungu shi tukite bwa kumona shi Efile Mukulu akyebe kwitupa muwa wa looso mu mpaladiiso mupya.
Bifumbulwe 21:3, 4; 5:9, 10; 14:1-3.