Yesu batandjikilwe mu Mweshi w’Ekumi na wakabidi su?

BIBLE tetulungula efuku dibatandjikilwe Yesu nya. Byabya, etupa bishinkamisho abitulesha shi tabatadjikilwe mu mweshi w’Ekumi na ibidi nya.

Banda kutala mushindo ubaadi mu Beteleeme mu kipwa kibatandjikilwe Yesu. Mweshi wa beena Yuda wabetamina bu Kislev (awipushena na mweshi w’Ekumi na umune na ku mweshi w’Ekumi na ibidi). Mweshi wa Tebeth ubaadi aulondo (kubanga mweshi w’Ekumi na wakabidi na ku mweshi wa Kumpala), nyi mweshi ubaadi mashika ebukopo na mpeshi. Ingi nsaa, neje baadi anoko ku myengye. Tubande kutala akilesha Bible pabitale bibaadi nshalelo mu yaaya mbalo.

Esdrase ungi mufundji a Bible alesha shi mweshi wa Kislev ubaadi awukibwa bu mweshi wa mashika ebukopo na mpeshi. Kunyima kwa kwakula shi bantu abebungile mu Yeelusaleme “mwifuku dya makumi abidi dya mweshi wa kitema [Kislev],” Esdrase alesha shi mwilo ushima “abasusanga . . . pa mwanda wa mpeshi banokanga.” Pa mwanda wa bibaadi mu kyakya kipungo, mwilo ubakwile shi: “Nyi nkipungo kya mpeshi, ta mbilombeene kwimana paasha.” (Esdrase 10:9, 13, NWT; Yeelemiya 36:22) Balami ba mikooko abaadi mu Beeteleme na mu bibundji bipepi tababaadi abalaala paasha bwa kulama mikooko yabo mu Mweshi w’Ekumi na wakabidi nya.

Byabya, Bible alesha shi balami ba mikooko abaadi mu kisuku abadiisha mikooko yaabo bufuku bubatandjikilwe Yesu. Luuka mufundji a Bible alesha shi mu yaaya nsaa, balami ba mikooko abaadi “bashaale mu mapya, balamanga nyema yaabo bufuku” pepi na Beeteleme. (Luuka 2:8-12) Lamiina shi balami ba mikooko abaadi bashaale mu mapya, kushi kwamba shi abatambakana paasha mwifuku nya. Abaadi abalama nyema yaabo bufuku. Kwikala kwabo kwa mu mapya akwipushena na bibaadi mu kyakya kipungo kya mpeshi na mashika abaadi mu Beeteleme mu mweshi w’Ekumi na wakabidi su? Nya. Myanda ibaadi ikitshikye pabaadi Yesu mutandjikwe ayilesha shi tabatandikilwe mu mweshi w’Ekumi na wakabidi nya.a

Eyi dy’Efile Mukulu adyakula kalolo pabitale efuku dibafwile Yesu, kadi adilesha penda myanda ipeela pabitale nsaa ibatandjikilwe. Bino abitutentekyesha mayi a Nfumu Salomone aamba shi: “Nkumo ii na muulo ukile wa mwimu wibuuwa, n’efuku dya lufu ndikil’efuku dya kutandjikwa.” (Mulungudi 7:1) Nyi bwakinyi tatwi balombeene kukanya patumono Bible akula myanda ibungi pabitale mudimo wa Yesu na lufu lwaye kadi akula myanda ipela pabitale kutandika kwaye.

[Mwanda wi mushi mwesaki]