Bufumu bw’Efile Mukulu nkinyi?

1. Bufumu bw’Efile Mukulu nkinyi?

Bufumu bw’Efile Mukulu nyi guvernema a mwiyilu. Abukyebe kwata mbalo ya angi mafumu ooso na kukita bwashi akikyeb’Efile Mukulu kikitshikye mwiyilu na pa nsenga. Mukandu wa Bufumu bw’Efile Mukulu nyi mukandu wibuwa. Kubashala mafuku apeela bwashi Bufumu bw’Efile Mukulu bukumbashe lukalo lwa bantu lwa kwikala na guvernema ebuwa. Abukyebe kubunga bantu booso be pa nsenga.​—Badika Danyele 2:44; Mateo 6:9, 10; 24:14.

Bufumu booso bwi na abo nfumu. Yehowa musangule Mwana aaye, Yesu Kidishitu, bwashi ekale Nfumu a Bufumu Bwaye.​—Badika Bifumbulwe 11:15.

Tala video Bufumu bw’Efile Mukulu nkinyi?

2. Bwakinyi Yesu Nfumu ebuwa?

Mwana a Efile Mukulu nyi Nfumu ebuwa mwanda e na kalolo, na mulamate ku myanda ibuwa. (Yowano 1:14) Na dingi e na bukome bwa kukwasha bantu mwanda akamunu nsenga ishima kadi mushalele mwiyilu. Kunyima kwa kusanguka, bakamiine mwiyilu na bashalele ku mboko ibalume ya Yehowa bwa kutengyela. (Beena-Ebreeyi 10:12, 13) Kunyima, Efile Mukulu bamupele bukome bwa kubanga kumunana.​—Badika Danyele 7:13, 14.

3. Mbananyi abakekala banfumu pamune na Yesu?

Kisaka kya bantu abetanyinwa bu “beeselele” abakekala banfumu pamune na Yesu mwiyilu. (Danyele 7:27) Beesele ba kumpala babaadi basangulwe nyi mbatumibwa ba Yesu basha kululama. Yehowa mutungunukye na kusangula balume na bakashi bu beeselele mpa na bu lelo. Bu bibasangukile Yesu, bakwete kusanguka na mbidi ya mu kikudi.​—Badika Yowano 14:1-3; 1 Beena-Kodinto 15:42-44.

Mbantu bungi kinyi abakyebe kwenda mwiyilu? Yesu baadi mwibetanyine bu “lombe lupeela.” (Luuka 12:32) Abekala bantu 144 000. Abekala banfumu pamune na Yesu bwa kumuna nsenga.​—Badika Bifumbulwe 14:1.

4. Nkinyi kibakitshikile pabatshile Yesu bufumu?

Bufumu bw’Efile Mukulu bubabangile kumunana mu 1914.a Mwanda wa kwibedi ubakitshine Yesu kunyima kwa kwata Bufumu nyi nkubinga Satana na bademo baaye mwiyilu, aye nkwibasumbula pa nsenga. Satana bakwatshile nsungu ikata aye nkubanga kutwesha makyenga pa nsenga. (Bifumbulwe 12:7-10, 12) Kubanga paapa, makyenga a bantu akwete kufwiima. Ngoshi, nsala, bipupa bya mikumbo, na kutshinkatshinka kwa nsenga bi bu “kitundwilo” akilesha shi kubashaala mafuku apeela bwashi Bufumu bwate myanda ya pa nsenga mu maasa.​—Badika Luuka 21:7, 10, 11, 31.

5. Bufumu bw’Efile Mukulu abukakumbasha kinyi?

Ku bukwashi bwa mudimo wa kulungula mukandu wibuwa ukwete kukitshika mu nsenga ishima, Bufumu bw’Efile Mukulu bukwete kubunga kisaka kikata kya bantu ba miilo yooso. Midiyo ya bantu baasha kwiyisha bakwete kutwela mu bufumu bwa Yesu. Bufumu bw’Efile Mukulu abukyebe kwibalama na muwa pabukabutula uno ndumbulwilo mubi a myanda e pa nsenga. Byabya abitungu shi baaba booso abakyebe shi Bufumu bw’Efile Mukulu bwibakwashe balongye bya kwikala bantu basha kukokyela abakokyela bufumu bwa Yesu.​—Badika Bifumbulwe 7:9, 14, 16, 17.

Munda mwa bipwa 1 000, Bufumu bw’Efile Mukulu abukyebe kukumbasha mpango y’Efile Mukulu bwa bantu. Nsenga ishima ayikekala mpaladiiso. Kunyima kwa byooso, Yesu akalusha Bufumu ku maasa a Nshaaye. (1 Beena-Kodinto 15:24-26) We na muntu okumina kulungula mukandu wibuwa pabitale Bufumu bw’Efile Mukulu su?​—Badika Misambo 37:10, 11, 29.