Mwanda ufwame watudi na lukalo lwa kuuka

Kwi muntu tabakulungwile mwanda waye ufwame su?—a Bible akula pabitale mwanda ufwame wabetanyina bu ‘bifwame biselele.’ Bino bifwame mbikale biselele mwanda abifiki kwi Efile Mukulu. Na abebitamina bu bifwame mwanda bantu tabebiuku. Sunga mba miikeyilu abaadi na lukalo lwa kwibiuka. Okumiina kuuka uno mwanda ufwame su?—

Kala Efile Mukulu baadi mupangye mulume na mukashi ba kumpala. Mashina aabo abaadi Adame na Eeva. Efile Mukulu baadi mwibape mbalo ya kushaala ibuwa bukile yabetanyina bu lupango lwa Edene. Su Adame na Eeva abaadi bakokyele Efile Mukulu, abo na bana baabo abadya kufwisha nsenga yooso ishima mpaladiiso anka bu lwalwa lupango. Na abaadi balombeene kushaala mu Mpaladiiso bwa looso. Kadi otentekyesha kibakitshine Adame na Eeva su?—

Adame na Eeva abaadi bakutwe kukokyela Efile Mukulu, nyi bwakinyi tatwi mu mpaladiiso dingi lelo uno. Kadi Efile Mukulu mmulee shi akyebe kulumbuula nsenga yooso ishima bwashi ikadikye i buuwa bwi kashaa, na muntu ooso akyebe kushaala mwanka bwa looso na kwikala na muloo. Mushindo kinyi wakyebe kwibikita? Munda mwa mafuku ebungi, bantu tababaadi abauku nya. Wawa nyi mwanda ufwame.

Nsaa ibafikile Yesu pa nsenga, baadi mwakule ngofu pabitale wawa mwanda ufwame. Bakwile shi ngutale Bufumu bw’Efile Mukulu. Yesu baadi mulungule bantu bwabadya kuteka bwashi buno Bufumu bufikye. Abukyebe kufwisha nsenga bu mpaladiiso ebuwa bwi kashaa.

We na lukalo lwa kuuka uno mwanda ufwame su?—Tentekyesha shi anka penda bano abakokyela Yehowa nyi abakyebe nkashaala mu Mpaladiiso bwa looso. Bible etulondela myanda ibungi itale balume na bakashi abaadi bakokyele kwi Yehowa. Okumiina kulonga myanda ibungi itale bano bantu su?—Tubande kumona bangi ba ku baaba bantu na mushindo watudi balombeene kulonda kileshesho kyaabo.