Balongi bananka abakafiki balobi ba bantu

Kunyima kwa bantu ba mu Nazarete kukimba bya kumwipaa, Yesu bakatukile mu musoko wa Kapernaume, peepi na Kalunga ka Ngalileya, kabetanyina dingi bu: “Genesarete.” (Luka 5:1) Kuno kulombana kwa butemuki bwa mu mukanda wa Yeeshaya abuleesha shi bantu ba mu Ngalileya bashaale peepi na kalunga mbalombeene kumona etaata dikata.—Yeeshaya 9:1, 2.

Oolo, muno mu Ngalileya, Yesu kwete kutungunuka na kulambukisha shi: “Elangyeyi Bufumu bwa mwiyilu tabudi peepi.” (Mateo 4:17) Yesu bapete bananka ba ku balongi baaye. Abayile na Yesu mu lwendo takudi mafuku, kadi mu kwalukiila kwabo pamune na Yesu ku Yudeya, ababangula dingi mudimo wabo wa kuloba. (Yowano 1:35-42) Binobino, abitungu bekale na Yesu nsaa yooso bwa shi ebalongyeshe byabadya kumona bya kutungunuka na bulungudi su baafu.

Pabaadi Yesu kwete kutambuka kwifwa, bamwene Simone Mpyeele, mukwabo Andree na bangi bakwabo bakwete kutaluula makondja aabo. Yesu badi mwifubwile kwabadi, aye nkukaamina mu bwato bwa Mpyeele akupu nkumuteka bwashi bende na bwato munkatshi a meema kapindji. Pababatambuka kapidji, Yesu bashaala, akupu babanga kulongyesha bibumbu bibaadi biibungye kwifwa bya binyibinyi bitale Bufumu.

Kunyima, Yesu nkulungula Mpyeele shi: “Efubwile mu meema e mpuki nwele makondja eenu bwa kukwata mishipa.” Mpyeele nkumwaluula shi: “Mulambukishi, twi bapombe bufuku bushima, kushii kukwata kantu; anka, muyiile eyi dibontumina, neele eenyi makondja.”—Luka 5:4, 5.

Abo nkwela makondja, akupu abo nkukwata mishipa ikile bungi bibabangile mpa na makondja kusanuka! Musango umune abo nkuteka bakwabo abaadi mu bungi bwato bubaadi peepi bwa kufika mu kwibakwasha. Nka paapa maato ooso abaadi aule na mishipa pa kukimba mpa na kwiyina. P’aye kumona bino, Mpyeele bakunamine kumpala kwa Yesu na kwakula shi: “Mwanana, esheeshe, mwanda ne na milwisho.” Yesu nkumwaluula shi: “Leka kutshiina. Mwanda binobino mbantu bookakwata.”—Luka 5:8, 10.

Yesu nkulungula Mpyeele na Andree shi: “Fikayi nundonde, nenwikasha ba mpibwe ba bantu.” (Mateo 4:19) Aye nkukumbasha bangi balobi babidi, Shake na Yowano, bana ba Zebedee. Abo nkukumiina nka musango umune. Abalekyele bunanka bwabo mudimo wa kuloba mishipa, abo nkufika balongi ba kumpala ba nsaa yooso ba Yesu.