Yesu bamuenekiela balobi

Kapindi kapeela kunyima kua Yesu kumuenekiela batumibua, Mpiele bayile mu kuloba mu Kalunga ka Ngalileya. Tomase, Yakobo, Yowano na bangi balongi abayile naye. Abalobele bufuku bushima kushi kukuata kintu.

Ku nkielo, abamuene muntu muimane ku kiese. Aye nkuibela musaase eshiya dia mema’shi: ‘Nubakuata mushipa su ngumune?’ Abo nkualuula’shi: “Ooo!” Yawa muntu nkuibalungula’shi: “Elaayi bukondia ku lupese lua mboko ibalume ya buato.” Pababakitshine biabia, bukondia bubaudile na mishipa ibungi, abo nkukutua na bia kuibutentula. Yowano nkushinguula musango umune’shi yawa muntu baadi Yesu, aye kuamba’shi: “Nyi mMuanana!” Nka paapa, Mpiele baadi muitumbe mu mema aye nkuyowa bua kuenda ku kiese. Bangi balongi abamulondele mu buato.

Nsaa ibabafikile ku kiese, abaadi bamone mukate na mushipa biekiele. Yesu nkuibalungula bua kutuusha ingi ndambo ya mishipa yabo bua kukumbasha kidiibua. Akupu nkuibalungula’shi: ‘Fikaayi nudie.’

Kunyima kua kupua kudia, Yesu baadi muipushe Mpiele’shi: ‘We munfule kukila kuloba su?’ Mpiele nkumualula’shi: ‘Oolo Muanana ouku’shi ne mukufule.’ Yesu nkumulungula’shi: ‘Diisha bana bande ba mikooko.’ Yesu nkumuipusha dingi’shi: ‘Mpiele we munfule su?’ Aye nkualuula’shi: ‘Oolo Muanana ouku’shi ne mukufule.’ Yesu nkuamba’shi: “Lama mikooko yande yaana.” Yesu bamuipuishe musango wa kasatu. Mpiele benyonguele. Akula’shi: ‘Muanana obe ouku bintu bioso. Ouku’shi Ne mukufule.’ Yesu nkumulungula’shi: “Diisha mikooko yande yaana.” Akupu balunguile Mpiele’shi: “Tungunuka na kundonda.”