Belumbuule bwa kukita akikyebe Yehowa

MU NSENGA ishima mwi ndumbulwilo ya bipwilo, ya myanda ya politike, ya busunga, na ya kukwasha bantu, i na myanda, mpángo, mweneno, mpaa na binangu bilekeene-lekeene. Anka, kwi ndumbulwilo umune amweneka mwilekeene na ingi yooso. Eyi dy’Efile Mukulu adilesha kalolo’shi yawa ndumbulwilo nga ba Temwe ba Yehowa.

² Mwanda wa muloo nguno, we mutwele mu ndumbulwilo a Yehowa. Kunyima kwa kushinguula akikyeb’Efile Mukulu, binobino okwete kwikikita. (Mis. 143:10; Lom. 12:2) We mulungudi kwete kufuba pamune na bakwetu ba mu nsenga ishima be na kifulo. (2 Kod. 6:4; 1 Mp. 2:17; 5:9) Bu byabidi bilayibwe mu Eyi Dyaaye, kukita akikyeb’Efile Mukulu akukutwadila myabi na miloo ibungi. (Nki. 10:22; Mak. 10:30) Bu byokwete kukita akikyebe Yehowa na lulamato looso, we mupwe kwilumbuula bwa kupeta myabi ya losoo mu mafuku e kumpala.​—1 Tim. 6:18, 19; 1 Yo. 2:17.

³ Mupangi etu Mukata e na ndumbulwilo umune kwete kukunkushibwa muyiile teokrasi. Bino abilesha’shi uno ndumbulwilo kwete kukunkushibwa na Yehowa, aye ndjo Nfumu e kunundu kwa byooso. Twibeemene ngofu mwadi. Aye nyi Nsushi etu, Etutuminaa mayi, na Nfumwetu. (Yesh. 33:22) Bu byadi Efile Mukulu akitaa myanda mmulongo, mmwate kitshibilo kya’shi twikale ‘atufubu naye pamune’ bwa kulombasha mpángo yaaye.​—2 Kod. 6:1, 2.

⁴ Bu bi ndumbulwilo a bya pano kwete kwenda na kwifubwila ngofu ku nfudiilo, tukwete kwenda kumpala ku bukunkushi bwa Yesu Kidishitu Nfumwetu mutuudibwe. (Yesh. 55:4; Kibaf. 6:2; 11:15) Yesu ndjo baadi mutemukye’shi balondji baaye abakyebe kukita midimo ikata kukila ibakitshine pabaadi pa nsenga. (Yo. 14:12) Bibaadi bilombeene kwikala nka byabya, mwanda munda mwa kipungo kila na kufwima kwa bantu, balondji ba Yesu abaadi balombeene kupalakana mu teritware mukata. Abaadi balombeene kulungula mukandu wibuwa wa Bufumu mpaa na kufudiile nsenga.​—Mat. 24:14; 28:19, 20; Bik. 1:8.

⁵ Uno mwanda ngumwenekye’shi ngwa binyibinyi. Byabya, nka bu bibaadi Yesu mwakule, mudimo wa kulungula mukandu wibuwa aukyebe kwimana pa nsaa ayikakumiina Yehowa. Myanda yooso yabadi baleshe mu Eyi dya butemuki dy’Efile Mukulu ayilesha’shi, efuku dikata na dya kutshiina dya Yehowa tadidi peepi.​—Yow. 2:31; Sof. 1:14-18; 2:2, 3; 1 Mp. 4:7.

⁶ Bu byatushinguula akikyebe Yehowa mu ano mafuku a ku nfudiilo, abitungu tufwimishe bukome bwetu bwa kukita akitutekye Efile Mukulu. Bino abitekye’shi, twikale beubidishene na kipaso kikwete kutumika ndumbulwilo a Efile Mukulu na kufuba naaye pamune. Ndumbulwilo kwete kutumika muyiile mayi e mu Bifundwe, mpaa na miiya, bitungo na malongyesha e mu Eyi dy’Efile Mukulu difundjibwe ku bukwashi bwa kikudi kiselele.​—Mis. 19:7-9.

⁷ Nsaa i bafubi ba Yehowa abalondo ano mayi e mu Bible, abashaala pamune na kufuba mu kufukama na mu buumune. (Mis 133:1; Yesh. 60:17; Lom. 14:19) Nkinyi akinyingisha kipwano kyetu na bakwetu ba mbalo yooso? Nkifulo. Twi bafwale kifulo kikwete kwitutakula bwa kukita myanda ibuwa. (Yo. 13:34, 35; Kol. 3:14) Muyiile bino byabadi bakumiine kwi Efile Mukulu, tukwete kutambuka pamune na kipindji kya ndumbulwilo a Yehowa ki mwiyilu.

KIPINDJI KYA NDUMBULWILO A YEHOWA KI MWIYILU

⁸ Bano batemuki: Yeeshaya, Esekyele na Danyele, abamwene bimonwa bya kipindji kya ndumbulwilo a Yehowa ki mwiyilu. (Yesh., shap. 6; Es., shap. 1; Nda. 7:9, 10) Anka bu’bo, Yowano mutumibwa bamwene kimonwa kya uno ndumbulwilo a mwiyilu na mmwituleshe mu kikoso binyi byadi mu mukanda wa Kibafumbwilwe. Bamwene Yehowa mmushaale ku lupuna nsulu lwa ntumbo pamune na miikeyilu ikwete kwela musase’shi: “Eeselele, Eeselele, Eeselee, Yehowa Efile Mukulu, sha bukome booso, baadi panka, e padi na afiki.” (Kibaf. 4:8) Yowano bamwene dingi“munkatshi mwa lupuna nsulu . . . mwimane mwana a mukooko,” Yesu Kidishitu, Mwana a mukooko a Efile Mukulu.​—Kibaf. 5:6, 13, 14; Yo. 1:29.

⁹ Kino kimonwa kya Yehowa mushaale ku lupuna nsulu, akilesha’shi aye ndjo Nfumu a uno ndumbulwilo. Pabitale Yehowa mpaa na mbalo yaaye ikata, mukanda wa 1 Myanda 29:11, 12 aulesha’shi: “Obe, Yehowa, we mukata, sha bukome booso, nkumo, kineemo na ntumbo, mwanda byooso bi mwiyilu na pa nsenga mbyoobe. Koodi, Yehowa kwikale bulopwe na Bufumu pa bii padi byooso. Bupeta na ntumbo abituukila koodi, dingi obe ngi Nfumu a byooso. Mwiyasa dyoobe ngi mwi bukome na kunyinga, mwiyasa dyoobe mwi matalwa a kuneemesha na kukankamika.”

¹⁰ Bu byadi mufubi pamune na Yehowa, Yesu Kidishitu e na mbalo ikata mwiyilu, na mbamupe matalwa ebungi. Eyendo, Efile Mukulu ‘mmutuule byooso kuushi kwa ngwa yaaye, dingi ba mubikeeshe kunundu a byooso, bwa kwikala mutwe wa kipwilo.’ (Ef. 1:22) Pabitale Yesu, Mpoolo mutumibwa bambile’shi: “Efile Mukulu baadi mumupe ntumbo ikile, aye nkumupa eshina di kunundu kwa mashina ooso, bwa’shi mwishina dya Yesu makunungu ooso akuname​—a be mwiyilu na pa nsenga​—na, bantu ba ndimi yooso baukishe patooka’shi Yesu Kidishitu nyi Nfumu, mu ntumbo y’Efile Mukulu Yaya.” (Fid. 2:9-11, NWT) Byabya, abitungu twikale bemeene bukunkushi bululame bwa Yesu Kidishitu ngofu.

¹¹ Mutemuki Ndanyele bamwene Mukulu a Mafuku mmushaale pa lupuna nsulu Lwaaye na miikeyilu “binunu na binunu bibamufubilanga, binunu ekumi misusa binunu ekumi bibaadi biimane kumpala kwaye.” (Nda. 7:10, NWT) Bible ayitamina bino bilwilo bya miikeyilu bu “bikudi abifubu mufubo wiselele, bitumibwe bwa kukwasha bantu be na kya kupeta kipandjilo bu bupyanyi.” (Eb. 1:14, NWT) Bino bipangwa bya mu kikudi mbilumbuulwe mu bisaka bya ‘mpuna-nsulu, mafumu, makata na matalwa.’​—Kol. 1:16.

¹² P’atunangushena ku myanda i mu kipindji kya ndumbulwilo a Yehowa ki mwiyilu, twi bakumbeene kupusha bibakitshine Yeeshaya ku kimonwa kibaadi mumone “Yehowa mushale pa lupuna nsulu lukile bula . . . bafubi ba mwiyilu [ba serafime] babaadi bemane kunundu kwaye.” Yeeshaya bakwile’shi: “Namono mpombo baabo! Nashimina, mwanda ne muntu sha kukanwa kwa milwisho; ne mushale munkatshi mwa mwilo wa baasha bwakulakule, na meso ande abamono Nfumu, Yehowa sha bukome booso.” Eyendo’shi, Yeeshaya baadi mupushe moo aye nkwimona bu’ye shi na muulo nsaa ibapetele mpushisho mulombane a ndumbulwilo a Yehowa. Myanda ibamwene ibaadi imukume kwishimba ngofu mu mushindo ubekeele’shi, nsaa ibapushishe musaase wa mwiyilu pabitale mudimo wa kulungula kiimu kya Yehowa, Yeeshaya bakwile’shi: “Nnami uno, ntume!”​—Yesh. 6:1-5, 8.

¹³ Kushinguula na kusangeela ndumbulwilo a Yehowa akunyingisha bantu Baaye mu mushindo wi mumune. Bu bikwete kwenda ndumbulwilo kumpala, twi bepaane bwa kutambuka naye pamune. Tukwete kukita mwetu mooso bwa kulesha’shi twi bemeene ndumbulwilo a Yehowa lelo uno.

NDUMBULWILO A YEHOWA KWETE KWENDA KUMPALA

¹⁴ Mu shapitre 1 a butemuki bwa Esekyele, mbaleshe Yehowa kwete kutambusha etempu dikata dya mwiyilu. Dino etempu adipenyapenya, adilesha kipindji kya ndumbulwilo a Yehowa kishy’akimweka. Kwete kwiditambusha kalolo na kwidikunkusha muyiile mpángo yaaye.​—Mis. 103:20.

¹⁵ Kipombo kyooso kya dino etempu ki na kingi kipombo munda mwakyo​—kimune ki na bukata bwi mumune na kingi, mbipingulusheene. Nkapenda mu uno mushindo ndjo mwatudi balombeene kwamba pabitale bipombo’shi, “bibaadi na kipaso kya kwenda mpese yooso inanka.” (Es. 1:17, EEM) Bipombo mbilombeene kwaluluka lungi lupese musango umune. Anka, dino etempu ta ndikutwe muntu a kwiditambusha sunga muntu a kwidiludika na binangu nya. Yehowa ta mmutadiile ndumbulwilo aaye bwa’shi eyiile kooso kwakumiina nya. Mukanda wa Esekyele 1:20 awamba’shi: “Bibendanga lupese lubakyebanga kikudi kwenda.” Byabya, Yehowa ndjo kwete kukita bwa’shi kikudi kyaaye kikunkushe ndumbulwilo aaye ende kwakumiina. Abitungu twiyele luno lukonko: ‘Ami naamu, nkwete kutambuka pamune naaye su?’

¹⁶ Kutambuka pamune na ndumbulwilo a Yehowa ta mpenda kutwela mu bisangilo, na kwenda mu bulungudi nya. Kya kumpala, kutambuka kwetu nkutale mushindo watukwete kwenda kumpala na kunyinga mu kikudi. ‘Atushinguula kikile byooso ku buwa’ na kudya bidibwa byooso bipya bya mu kikudi. (Fid. 1:10; 4:8, 9; Yo. 17:3) Abitungu tutentekyeshe dingi’shi, pa mbalo yooso i ndumbulwilo, i bukunkushi bwi buwa na bantu abafubu pamune. Byabya, abitutungu kumona muulo wa kutumika kalolo na bintu bya mu kikudi byabakwete kwitupa kwi Yehowa bwa kulombasha mudimo waaye. Bu byatukwete kutambuka pamune na etempu dya mwiyilu dya Yehowa, nshalelo etu ekala mwipushene na mukandu watukwete kulambukisha.

¹⁷ Ku bukwashi bwa ndumbulwilo a Yehowa, tukwete kwenda kumpala na kukita akikyebe eshimba dy’Efile Mukulu. Tentekyesha’shi, Yehowa ndjo kwete kutambusha etempu dya mwiyilu. Byabya, kutambuka pamune n’etempu dyaaye akulesha’shi atuneemeka Yehowa na’shi, twi beemene Lubwebwe lwetu. (Mis. 18:31) Bible etulaa’shi: “Yehowa akapa mwilo wê bukome, na kwiwelela mwabi pa kwiupa kufukama.” (Mis. 29:11, EEM) Bu byatudi mu ndumbulwilo a Yehowa lelo uno, tukwete kupeta bukome bwakwete kwitupa na kusangeela butaale bwakwete kupa bantu baaye belumbuule. Oolo, atukyebe kutungunuka na kupeta myabi ibungi bu byatukwete kukita akikyebe Yehowa kubanga binobino mpaa na bwa losoo.