Kilengieleshi pa Kalunga Kamonga

Pabapushishe Faraone’shi bena Isalele abapu kukatuka mu Ejipitu, baadi mushintuule binangu biaye eyipusha buakinyi bebafungula. Baadi mulungule basalayi baaye’shi: ‘Lumbulaayi matempu ande oso bua’shi tuibalonde! Tatuibalekanga buabadia kuenda nya.’ Aye na bantu baye abaabangile kulonda bena Isalele.

Yehowa baadi akunkusha muilo waye n’ekumbi mu kaanya, na kaalo bufuku. Baadi muibakunkushe ku Kalunga Kamonga na kuibalungula buabadia kushala pepi na Kalunga.

Bena Isalele abamuene Faraone na basalayi abaadi abebalondo. Abaadi munkatshi mua kalunga na basalayi ba bena Ejipitu. Abo nkuidila kui Moyise shi: ‘Abetuipaa! Boodia kuituleka mu Ejipitu.’ Kadi Moyise bakuile’shi: ‘Tanutshiinanga. Tengielayi numone Yehowa bi’etupaasha.’ Tomono’shi Moyise baadi akulupila mui Yehowa su?

Yehowa baadi mulungule bena Isalele bua’shi basaasule tushibo tuabo. Buabua bufuku, Yehowa nkutentuula ekumbi, aye nkuidituula pankatshi pa bena Ejipitu na bena Isalele. Ku lupese lua bena Ejipitu, kubaadi mufito. Kadi ku lupese lua bena Isalele kubaadi etaata.

Yehowa balunguile Moyise buadia kukupila mukombo waye mu kalunga. Musango umune Yehowa batumine kipapi kikata buabua bufuku bushima. Kalunga kabaadi ketshibe mu bipindi bibidi, na kuleka eshinda dia kutambukila munkatshi. Midiyo ya bena Isalele abaadi batambukie mu lufuinkinyi munkatshi mua bimano bia meema mpa na ku dingi eshiya.

Faraone na bantu baaye abatuelele bua kulonda bena Isalele munkatshi mua bimano bia kalunga. Akupu Yehowa nkuibabulakasha. Bipombo bia matempu aabo nkubanga kupatuka. Basalayi nkuidila’shi: ‘Tutuukieyi muno! Yehowa kuete kuibakaluila.’

Yehowa nkulungula Moyise shi: ‘Kupila mukombo oobe pa kalunga.’ Bimano bia kalunga nkubuikila bena Ejipitu musango umune. Faraone na basalayi baaye boso abafuile. Takubaadi nsu ngumune bapandile.

Abuaa busambu bua kalunga, kubaadi kisaka kikata kibaadi akitumbisha Yehowa na loono’shi: “Imbilayi Yehowa, muanda mmuule ndaa na ntumbo. Nfualasa na yawa muipakamine bebiasa mu kalunga.” Pabaabadi abayimbi, bana bakashi babaadi abashi na koomba tutumba. Muntu ooso bekeele na muloo ukata muanda tabaadi mu bulungantu bua binyibinyi.