Mwanda wa 33

Abasabuka Kalunga Kamonga

BANDA kutala kikwete kukitshika! Uno nyi Moyiise mwibweshe mukombo kunundu kwa Kalunga Kamonga. Bano be naaye mu bulungantu dingi eshiya dya kalunga ka mema mbeena Isaleele. Kadi bano abende na mema nyi Faraone na beena ngoshi baaye booso. Tubande kutala mushindo wabikyebe kukitshika.

Nka bu byatwikele balongye, Faraone balekyele beena Isaleele bwashi batukye mu Ejiipitu kunyima kw’Efile Mukulu kwibatumina bipupa ekumi. Beena Isaleele pepi na 600 000 abatukile mu Ejiipitu na bakashi na baana baabo bebungi. Na dingi bangi bantu, babaadi na lukumino mwi Yehowa abatukile pamune na beena Isaleele. Abo booso abatwadile mikooko na mbushi na ngombe yaabo.

Kumpala kwabo kubanga lwendo, beena Isaleele abatekyele beena Ejiipitu bilamba na bingi bintu bya òòlo na bya kyamo ky’ebakanyi. Beena Ejiipitu abaadi na moo ukata, mwanda wa kipupa ky’ekumi. Ndyo abo nkupa beena Isaleele bintu byooso bibabatekyele.

Kunyima kwa mafuku apela beena Isaleele abafikile ku Kalunga Kamonga. Abashalele ku bukunkula. Mu yaya nsaa, Faraone na bantu baaye ababangile kwitopeka bwakinyi abekalanga bapoosole beena Isaleele. Abambile shi: ‘Tubalekye bapika abende!’

Faraone bashintulwile dingi binangu byaaye. Mususa umune balumbulwile etempu dyaaye dya ngoshi na beena ngoshi baaye. Abo nkubanga kulonda beena Isaleele na matempu ebuwa a ungi mushindo 600 mpa na angi matempu ooso a mu Ejiipitu.

Beena Isaleele pababamwene Faraone na beena ngoshi baaye bakwete kwibalonda, abaadi na moo ukata. Tababaadi na mushindo wa kusuuka nya. Kalunga Kamonga kabaadi kumpala kwabo kadi kumongo kubaadi beena Ejiipitu abaadi abebalondo. Kadi Yehowa batuudile ekumbi pankatshi pa mwilo waaye na beena Ejiipitu. Beena Ejiipitu tababaadi na mushindo wa kumona beena Isaleele bwa kulwa nabo nya.

Yehowa balungwile Moyiise dingi bwashi ebweshe mukombo kunundu kwa Kalunga Kamonga. Pabebwesheshe wanka, Yehowa bafwishishe kipapi kikata kya kutunduka nguba bwashi kipukye. Mema a kalunga abeabulwile, awo nkwimana ku mpese yooso.

Beena Isaleele nkubanga kutambuka munkatshi mwa kalunga mu nsenga yuume. Kubaadi kukile nsaa ibungi bwashi midiyo ya bantu na nyema yaabo basabukye kalunga ka mema. Beena Ejiipitu abaadi dingi na mushindo wa kumona beena Isaleele. Bapika baabo abaadi bakwete kwenda! Abo nkwi balonda lubilo mu kalunga ka mema.

Nsaa yababatwelele mwanka, Efile Mukulu bayimikile bipombo bya matempu aabo ta abaadi aatambuka dingi nya. Beena Ejiipitu abapushishe moo ukata abo nkubanga kwela misase shi: ‘Yehowa alwila beena Isaleele ngoshi. Tusuukyeyi tutuukye muno!’ Kadi nsaa ibaadi ipwe kukila.

Bino nyi bibakitshikile nsaa ibaadi Yehowa mulungule Moyiise bwashi ebweshe mukombo kunundu kwa Kalunga Kamonga, bu byokwete kwibimona mu kifwatulo. Na nsaa ibebweshele Moyiise mukombo, bimano bya mema bibalukiile abyo nkuyina beena Ejiipitu na matempu abo. Beena ngoshi booso abaadi balonde beena Isaleele mu kalunga ka mema. Na takwi mwina Ejiipitu su ngumune bapandile!

Muloo kinyi ubaadi nawo mwilo w’Efile Mukulu pakupashibwa! Baana balume abayimbile loono bwa kutumbula Yehowa, abamba shi: ‘Yehowa batshokola na ntumbo. Tubalo na bakamine pa tubalo bebeele mu kalunga ka mema.’ Miryame taata a Moyiise baatshile katuumba na bakashi booso abamulondele na tutuumba twabo. Pababaadi bakwete kusha masha na muloo ooso, abaadi abayimbi nsaa ibaadi baana balume abayimbi shi: ‘Yehowa batshokola na ntumbo. Beele tubalo na sha tubalo mu kalunga ka mema.’

Efilu shapitre a 12 mpa na ku 15.