Mwanda wa 27
Nfumu ebubi bamunu Ejiipitu
BANTU bokwete kumona pano bakwete kufubisha bantu pa bukopo. Tala muntu kwete kukupila mwina mufubo umune na lufimbo! Bano beena mufubo, mbeena kifuko kya Yaakobo na abetaminwa bu beena Isaleele. Na bantu abebafubisha pa bukopo mbeena Ejiipitu. Beena Isaleele tabadi bapika ba beena Ejiipitu. Bino mbibangye naminyi?
Kifuko kikata kya Yaakobo kibaadi kishaale mu kufukama mu Ejiipitu munda mwa bipwa bibungi. Yoosefe, baadi muntu mukata mulondele nfumu Faraone mu Ejiipitu, nyi baadi ebalama. Kadi kumongo Yoosefe bafwile. Na ungi Faraone shibaadi mukumiine beena Isaleele, bekeele nfumu a mu Ejiipitu.
Ndjo uno Faraone ebubi bekeeshe beena Isaleele bu bapika. Na aye nkutuula bantu abaadi na myanda ibukopo na mashimba ebubi kunundu kwabo. Abaadi abafubisha beena Isaleele bibubi bwa kuyibakila Faraone bibundji. Kadi bungi bwa beena Isaleele bubaadi abwende na kufiima. Kumongo beena Ejiipitu ababangile kutshina shi beena Isaleele mbalombeene kukila bungi na bukome.
Ouku kibakitshine Faraone su? Balungwile bakashi abaadi abakwasha bakashi ba beena Isaleele pa kutanda shi: ‘Abitungu nwipee mwana mulume ooso atandikwa.’ Kadi baaba bakashi abaadi na mashimba ebuwa na babapelele kwipaa baana.
Ndjo Faraone nkwelela bantu uno mwiya: ‘Ataayi mwana mulume ooso atandwa a beena Isaleele nu mwipee. Mwana mukashi ooso mulekyeyi na muwa.’ Wawa taubaadi mwiya wi bubi su? Tubande kutala mushindo ubapandile umune a ku baana balume.