Yehowa bapeele Samishonyi bukome

Bu bibaadi shi bena Isalele bebungi abalukiile mu lulanguilo lua ma nkishi, Yehowa baadi mutadiile bena Filistine buabadia kumuna nsenga yaabo. Anka kubaadi bangi bena Isalele babaadi bafule Yehowa. Umune a ku banka baadi Manowa. Tabaadi mutande muana na mukashi aaye nya. Dingi efuku Yehowa nkutuma muikeyilu kui mukashi a Manowa. Muikeyilu nkumulungula shi: ‘Okatanda muana.’ Akapaasha bena Isalele kui bena Filistine. Akeekala bu Munazi.’ Weuku su Banazi abaadi bantu kinyi? Abaadi bafubi ba Yehowa be pabuabo. Banazi tababaadi na matalua a kutshibisha nyene yaabo nya.

Muenda mafuku, Manowa na mukashi aye abatandile muana, bamuudika bu Samishonyi. Pabakudile Samishonyi, Yehowa baadi mumupe bukome bukile. Baadi na bukome bua kuipaa nyema a ntambue na maasa. Ungi musango, Samishonyi baadi muipee bena Filistine 30 bupenka buaye. Bena Filistine nkumushikua bikata, abo nkukimba bia kumuipaa. Dingi efuku Samishonyi kii mulaale bufuku muiumbo dia Gaza, abaafikile ku kiibi ki’eumbo bua kumutengiela bua’shi bamuipee ku namashika. Anka munkatsh’abufuku, Samishonyi babuukile enda ku kiibi ki’eumbo, aye nkuikitukula. Batuadile kiibi ku mapampa aaye, kubanga paapa mpaa na ku nsongo ya muengie witadisheene na Ebrone!

Kunyima, bena Filistine nkuenda kui Dalila, mukashi abaabadi abayila kui Samishonyi, abo nkumulungula’shi: ‘Atukufutu shekele kinunu ya kiaamo ki’ebakanyi su wetulungula akutuukila bukome buaye. Atukiebe kumukuata tumuele mu lukano.’ Dalila baadi na lukalo lua makuta, aye nkukumiina. Musango umune, Samishonyi bapelele kumulungula buakinyi baadi na bukome bukile. Anka mukashi baadi’nka amuiyayila na pabafikile mu kumusokuela bioso bibaadi bifuaame. Aye nkumulungula’shi: ‘Kasha tababandile kuntshiba nyene muanda nee Munazi. Su bantshiba yanka, nashimisha bukome buande.’ Tomono’shi Samishonyi bakitshiine kilema kikata pa kumungula biabia su?

Dalila musango umune balunguile bena Filistine’shi: ‘Bandungula mianda ifuame!’ Dalila baladiishe Samishonyi pa mikoolo yaaye, ungi muntu aabaadi naye nkumutshiba nyene yaaye. Dalila nkusama’shi: ‘Lelo bena Filistine be poodi Samishonyi!’ Samishonyi bapasukile ku tulo, bukome buaye bubapuile. Bena Filistine abamukuatshile, bamutunya meeso, akupu bamuela mu lukano.

Dingi efuku bena Filistine binunu na binunu nkuibunga mu nntempelo a efile aabo Dagone, beelanga misaase’shi: Efile eetu mmutuule Samishonyi mu maasa eetu! Itanyinayi Samishonyi etusangashe.’ Abo nkumutuula munkatshi mua misungo ibidi, na nkubanga kumusepa. Samishonyi nkuidila’shi: ‘Yehowa, ntentekieshe namu ompe bukome sunga bua uno musango umune.’ Nyene yaaye ibapuile kubanga kumena dingi. Aye nkusukuma misungo ya nntempelo na bukome boso. Nshibo yoso nkukuluka, bantu nkufuila mu nntempelo na winyi Samishonyi nabeene.