Mwanda wa 54

Muntu baadi mukile bantu booso bukome

OUKU muntu baadi bukome kukila bantu booso su? Nyi nsushi abetamina bu Samesone. Yehowa nyi baadi mupe Samesone bukome bwaye. Sunga kumpala kwashi Samesone atandjikye, Yehowa balungwile nyinaaye shi: ‘Mu mafuku apela okatanda mwana mulume. Akyebe kupaasha Isaleele kwiyasa dya beena Filistina.’

Beena Filistina mbantu bebubi bashaale mu Kanaana. Be na balume ba ngoshi bebungi na kwete kukyengyesha beena Isaleele ngofu. Dingi efuku pabaadi Samesone mwishinda dya kubaadi kushaale beena Filistina, ntambwe mukata nkutuuka na kukungula bwa kufumankana naaye. Kadi Samesone bayipayile ntambwe kushi kintu ku maasa. Bayipayile dingi nkama ya beena Filistina.

Kunyima Samesone baadi mwifulene na mukashi abetamina bu Dalila. Bakata ba beena Filistina abalayile shi abakyebe kupa Dalila nfwalanga 1 100 ya kyamo ky’ebakanyi ku muntu su ebalungula pe bukome bwa Samesone. Dalila baadi na lukalo lwa aa makuta ooso. Tabaadi mufule Samesone, sunga mwilo wa Efile Mukulu nya. Aye nkubanga kwipusha Samesone kwi bukome bwaye.

Kunyima, Dalila bafudiishe Samesone bwashi amulungule kwi bukome bwaye. Samesone nkumulungula shi: ‘Nyene yande kasha tayakidile bwembe bwa kwiyitshiba, mwanda nsaa inaadi mutandikye, Efile Mukulu baadi munsangule bwa kwikala mufubi aaye mushidilwe abetamina bu Naziri. Su bankuula kapweto, paapa bukome bwande mbulombeene kwenda kula naami.’

Byabya, nsaa ibapushishe Dalila bino, baladiishe Samesone ku manwi aaye. Aye nkwitamina muntu bwashi afikye atshibe nyeene ya Samesone. Samesone pababukile, baadi mushimishe bukome bwaye. Paapa beena Filistina abafikile abo nkumukwata. Babamutubwile meso aaye na bamwikasha bu mpika aabo.

Dingi efuku beena Filistina abaadi na feete mukata bwa kulangwila Dagone na abo nkutuusha Samesone mu lukano bwa kumusenga. Mu yaya nsaa nyeene ya Samesone ibaadi ipwe kumena. Samesone balungwile nsongwalume baadi amukunkusha ku mboko shi: ‘Nkunkushe bwashi nkwate ku misungu ya ku ntempelo bwashi neekunyeemene.’ Akupu Samesone batekyele bukome kwi Yehowa na bakwatshile ku misungu. Belele musaase shi: ‘Mfwe pamune na beena Filistina.’ Mu yawa feete mubaadi bantu 3 000 Samesone pabaadi musukume misungo, nshibo ibaponene ayo nkwipaa bantu booso abaadi mwanka.

Bansushi shapitre 13 mpa na ku 16.