Yoziase baadi mufule Muiya w’Efile Mukulu

Yoziase bafikile bu nfumu a Yunda pabaadi na bipua muanda. Mu aa mafuku, bantu babaadi na mianda ya malenganyi na lulanguilo lua ma nkishi. Pabaadi Yoziase mulombashe bipua 16, bakimbile bia kulanguila Yehowa mu kipaso kibuwa. Pabaadi mulombashe bipua 20, babangile kuluisha ma nkishi na bilambuilo bioso bia muiumbo. Pa balombeshe bipua 26 baatshile mpango bua kulumbuula ntempelo a Yehowa.

Tshite muakuidi mukata Ilikiya bapetele mufungofungo wa Muiya wa Yehowa, pangi mufungofungo ubaadi ufundibue na Moyise. Shafane sekretere a nfumu batuadile mufungofungo kui Yoziase, aye nkuiubadika n’eyi dikaamine. Pabaadi apateemesha Yoziase, bamuene’shi muilo ubapuile kubanga kukutua kukookiela Yehowa munda mua bipua bibungi. Nfumu Yoziase nkulungula Ilikiya’shi: ‘Yehowa mmuitufiitshile munda. Enda wesambe naye, bua’shi etulungule kiatudia kukita.’ Yehowa baadi muibaluule kukiila kui mutemuki mukashi Hulda’shi: ‘Muilo wa Yunda ubaapu kuntapa mongo. Taunyokiibua mu mafuku ekale Yoziase bu nfumu nya, muanda mmuleeshe kuiyisha.’

Pabapushishe Nfumu Yoziase wawa mukandu, bayiile ku ntempelo aye nkuitamina bena Yunda boso. Akupu nkuibabadikila Muiya wa Yehowa n’eyi dikaamine. Yoziase na muilo oso nkulaa Yehowa bua kumukookiela na mashimba aabo oso.

Muilo wa Yunda ta ubaadi’nyi autentekiesha Kidiibua kia lukilo munda mua bipua bibungi nya. Kadi pabaabadikile Yoziase mu Muiya’shi abitungu kutentekiesha Kidiibua kia lukilo kipua kioso, baadi mulungule muilo’shi: ‘Atukiebe kukita Kidiibua kia lukilo bua Yehowa.’ Akupu Yoziase nkulumbuula milambu ibungi na kukimba tuyimba tua kuyimba mu ntempelo. Muilo nkukita Kidiibua kia lukilo na Musangeelo wa Mikate ishii kitatusho munda mua mafuku musambo. Takubaadi kukitshikie kingi Kidiibua kia lukilo bu kino nya kubanga mu mafuku a Samuele. Yoziase baadi binyibinyi mufule Muiya w’Efile Mukulu. Okumiina kulonga bua kuuka Yehowa su?