DILONGIESHA 59
Ba nsongualume bananka abaadi bakookiele Yehowa
Pabaadi Nabukondonosore mutuale ba nfumu ba miilo ba mu Yunda mu Babilone, batudile bushito buabo mu maasa a mukata a ebalasa abetamina bu Ashepenaze. Nabukondonosore balunguile Ashepenaze buadia kumupetela ba nsongualume be na bukome bua mbidi na be na kapatupatu. Abaadi na kia kulambukisha bano ba nsongualume munda mua bipua bisatu. Buabua bulambukishi bubaadia kuibalumbuula bua kuikala bantu bakata mu Babilone. Baaba ba nsongualume abaadi na kia kulonga kubadika, kufunda na kuakula ludimi lua bena Kaldeya lua mu Babilone. Abebalunguile dingi bua kudia bidibua abidi nfumu na ba mu nshibo yaye. Bano ba nsongualume babaadi Ndanyele, Hananiya, Mishaele na Azariya. Ashepenaze bebapeele mashina a mu Babilone bu Belshasare, Shadrake, Meshake na Abede-Nego. Buabua bulambukishi bubadia kuibemika bua kulanguila Yehowa su?
Bano ba nsongualume bananka abaadi baate boso kitshibilo kia kukookiela Yehowa. Abaadi abauku’shi ta mbalombene kudia bidibua bia nfumu nya, muanda Muiya wa Yehowa ubaadi aulesha’shi bingi bibaadi butete. Abo nkulungula Ashepenaze’shi: ‘Tuetudiishanga namu bia kudia bia nfumu.’ Ashepenaze nkuibalungula’shi: ‘Su nubapele kudia nfumu amono’shi nubakumbu maladi, angipaa!’
Ndanyele bapetele kinangu kibuwa. Aye nkulungula mulami aabo’shi: ‘Etupe penda bisakisaki na mema a kutoma munda mua mafuku ekumi. Akupu otale abiikala mbidi yetu na ya ba nsongualume abadi biakudia bia nfumu.’ Mulami aabo baadi mukumiine.
Kunyima kua mafuku ekumi, Ndanyele na ba kuuku baaye basatu abaadi na mbidi ibuwa kukila bangi boso. Yehowa baadi na muloo bibaabadi bamukookiele. Aye nkupa dingi mpa na Ndanyele binangu bia kupusha bimonua na bilootua.
Pababapuile kuibalongiesha, Ashepenaze bebatuadile kui Nabukondonosore. Nfumu besambile nabo amona’shi Ndanyele, Hananiya, Mishaele na Azariya, abaadi na binangu na kuteemesha kalolo kukila bangi ba nsongualume boso. Baadi musangule bano ba nsongualume bananka buabadia kufuba muibalasa diaye. Nfumu baadi na kia kuibateka malango pabitale mianda i na muulo ukata. Yehowa baadi muibekashe na binangu kukila bangi ba-sha binangu boso ba nfumu na bena malenganyi baye.
Sunga biekala’shi abaadi beenyi mu kino kibundi, Ndanyele, Hananiya, Mishaele na Azariya tababaadi balube’shi abaadi bafubi ba Yehowa nya. Obe namu wekala otentekiesha Yehowa nsaa yooso, sunga wekala kula na ba kutande su?
“Muntu su ngumune tabepuulanga bu nsongua bobe. Anka ikala kileshesho kibuwa kui baaba be na lulamato mu ngakuilo, mu bikitshiino, mu kifulo, mu lukumiino na mu buiselele.”—1 Timote 4:12