Mwanda wa 75
Danyele na benaye
NFUMU Nabukodonosore batwadile beena Isaleele booso abaadi balongye ngofu ku Babilone. Akupu nfumu nkusangula bansongwalume abaadi bakile buuwa bwa mpala na binangu. Bano bansongwalume bomono pano nyi mbananka ba kwabadi. Umune nyi Danyele, na bangi basatu abaadi abebetanyina bu Shadrake, Meshake na Abede-Nego.
Nabukodonosore batshile kitshibilo kya kulongyesha bansongwalume bwashi bekale abafubu mu lupango lwaye. Kunyima kwa kwibalongyesha munda mwa bipwa bisatu akyebe kusangula baba bakile binangu bwa kumukwasha bwa kupudisha myanda. Nfumu akyebe shi bansongwalume bekale na mbidi bukome pabakwete kulonga. Ndjo aye nkutumina bafubi baaye eyi bwashi bekale abapa bansongwalume booso bya kudya na bya kutoma bibuwa bu byabapeya nfumu na kifuko kyaye.
Tala Danyele. Ouku kya kwete kulungula Ashepenaze, nfumu a beena mudimo ba Nabukodonosore su? Danyele kwete kumulungula shi takumiina kudya byabya bidibwa bibuwa bi ku mesa a nfumu nya. Kadi Ashepenaze atshinyi. Aye nkwamba shi: ‘Nfumu ekalanga mwate kitshibilo pabitale byanudya kudya na kutoma. Su tanwibamwekye mbidi bukome bu bangi bansongwalume, nfumu akyebe kungipa.’
Byabya Danyele bayile kwi mulami ababadi batuule kwi Ashepenaze bwa kulama benaye basatu. Aye nkwamba shi: ‘Etutompe munda mwa mafuku 10. Betupe bisakisaki bya kudya na mema a kutoma. Akupu otale nkyebo yeetu na nkyebo ya bansongwalume abadi bya kudya bya nfumu, bwa kumona abamweneka kalolo.’
Mulami bakumiina. Kunyima kwa mafuku 10, Danyele na benaye basatu abaadi abamweneka mbidi bukome kukila bangi bansongwalume. Ndjo mulami nkwibaleka bwashi batungunukye na kudya bisakisaki pamutwe pa bidibwa bya nfumu.
Ku nfudiilo a bipwa bisatu abatwadile bansongwalume booso kwi Nabukodonosore. Kunyima kwa kwisamba naabo, nfumu bamwene shi Danyele na benaye abaadi bakile benabo booso. Ndjo nfumu nkwibalama mu lupango lwaye bwa kumukwasha. Na nsaa yooso ibaadi nfumu mwele Danyele, Shadrake, Meshake na Abede-Nego nkonko sunga kwibatuma mu kupudisha myanda ikata, abo abaadi bakile misango 10 ba tshiite-mwakwidi baaye booso sunga basha binangu.
Danyele 1:1-21.