Mwanda wa 77

Abapele kukunama

OTENTEKYESHA dingi pabitale bano bansongwalume basatu? Nyi, mbakuuku ba Danyele babaadi bapele kudya bidibwa bya nfumu mu Babilone. Beena Babilone abaadi abebetanyina bu Shadrake, Meshake na Abede-Nego. Kadi banda kwibatala dingi. Bwakinyi abapele kukunamina uno nkishi mula bu abikunama bangi bantu booso? Tubande kutala.

Okwete dingi kutentekyesha miiya ibafundile Yehowa aye nabeene yabetenyinaa bu Miiya Ekumi su? Mwiya wa kumpala awamba shi: ‘Tolangwilanga bangi b’efile kukasha penda ami.’ Bano bansongwalume bakwete kulonda uno mwiya, sunga mbyabishi bibofule.

Nabukodonosore, nfumu a mu Babilone, baadi mwitanyine bantu bebungi bwa kunemeka uno nkishi abaadi mukitshishe. Bakatuka mu kwisamba na bantu booso shi: ‘Su nubapusha eyi dya kapudi, dya lusengwa na dya byombwanga bya bipaso byooso, nukuname bwa kulangwila uno nkishi a oòlò. Muntu ooso shakunama na shamulangwila abamwele nka yawa nguba munkatshy’a bwina bwa kaalo akatembe.’

Pabapushile Nabukodonosore shi Shadrake, Meshake na Abede-Nego tambakuname, bafiitshile munda ngofu. Baadi mutume eyi bwashi bafikye nabo kwadi. Aye nkwibalungula bwashi bakuname nsaa yabeele dimo mpungi. Kadi baba bansongwalume abaadi batuule lukulupilo lwabo mwi Yehowa. Abalungwile Nabukodonosore shi: ‘Efile Mukulu atufubila mukumbeene kwitupasha. Kadi sunga tamwitupashe, tatukunamina uno nkishi oobe a oòlò nya.’

Pabapushile byabya, Nabukodonosore baadi munyishe dingi kufiita munda. Kubaadi bwina bwa kaalo pepi na yaya mbalo batumine eyi shi: ‘Shisakanyayi kaalo bwashi kakile ka mafuku ooso misusa musambobidi!’ Akupu batumine basalayi baaye ba bilobo bwa kwanya Shadrake, Meshake na Abede-Nego myoshi na kwibeela mu bwina bwa kaalo akatembe. Bwabwa bwina bubaadi na kaalo kakile, ndimi yaako ibayipayile bino bilobo. Kadi nkinyi kibakitshikiile bano bansongwalume basatu babadi beele mu bwina?

Nfumu batala mu bwina bwa kaalo, na babanga kupusha moo. Bayipusha shi: ‘Tatwi banye balume basatu na kwibeela mu bwina bwa kaalo su?’

Bafubi baye abalulwile shi: ‘Kushi mpaka, mwanana.’

Aye bambile shi: ‘Kadi namono bantu bananka bangulwe myoshi, abatambuka munkatshi a kaalo kushi kalonda su nkee’bi pa mbidi. Na dingi uno a kananka mwifwane mwana a b’efile.’ Nfumu beseesele pepi na kitwelelo kya bwina bwa kaalo akatembe na bayitanyine n’eyi dibukopo shi: ‘Shadrake! Meshake! Abede-Nego! Tukayi, anwe bafubi b’Efile sha Kwiyilu Kula!’

Pababatukile, ooso a kwabadi bamwene shi te na kalonda su nkamune. Akupu nfumu nkwamba shi: ‘Efile Mukulu a Shadrake, Meshake na Abede-Nego ende ntumbo! Aye batumu mwikeyilu bwa kupasha bafubi baaye mwanda abapele kukunamina na kulangwila ungi efile kukasha nka Efile Mukulu abo.’

Kino ta nkileshesho kibuwa kya bantu balamate Yehowa kyatudya kulonda su?

Efilu 20:3; Danyele 3:1-30.