Abapele kukunama

Kunyima kua mafuku n’aye kuloota pabitale nkishi, Nfumu Nabukondonosore bakitshiine nkishi mukata a ôlo. Baadi mumuimikie mu kipia kia Dura, akupu aye nkuitamina bantu bakata ba muiumbo mpa na Shadrake, Meshake na Abede-Nego buabadia kuibunga kumpala kua nkishi. Nfumu batushiishe muiya’shi: ‘Su nubapusha eyi dia kapudi, dia mpungi, dia milengie na bindaala, nukuname kumpala kua nkishi! Muntu ooso shakunama, abamuele mu buina abutembe kaalo.’ Bano ba nsongualume basatu ba bena Ebelu, abaadia kukunamina nkishi su abaadia kulanguila nkapenda Yehowa?

Akupu nfumu nkutuma eyi buabadia kuela mpungi. Bantu boso nkukunama bua kulanguila nkishi, kukatusha’nka penda Shadrake, Meshake na Abede-Nego. Bangi bantu abebamuene abo nkulungula nfumu’shi: ‘Baba bena Ebelu basatu abapele kulanguila nkishi oobe.’ Nabukondonosore nkuibatumina eyi’shi: ‘Nenulekiela ungi musango buanudia kulanguila nkishi. Su nubapele, nenuele mu buina bua kaalo. Takui efile mulombene kuinupaasha ku maasa ande.’ Abo namu nkumualuula’shi: ‘Tatukiebe ungi musango nya. Efile Mukulu eetu e kuitupaasha. Kadi sunga akutua kuibikita, Obe nfumu uuka’shi tatulanguila nkishi nya.’

Nabukondonosore bafiitshile munda bikata. Aye nkulungula bantu baye’shi: ‘Elaaye kaalo muilungu misango musambo kukila ka mafuku oso!’ Akupu, aye nkulungula basalayi’shi: ‘Ebanyeyi mioshi, nuibeele muanka!’ Elungu dibaadi na kaalo kakile bibakitshiine’shi, pabaadi pefubuile basalayi pepi, abo nkufua musango umune. Bena Ebelu basatu nkupona mu kaalo. Kadi pabaadi Nabukondonosore mutale muanka, bamuene bantu bananka abatambuka mu buina bua kaalo pa mutue pa basatu. Aye nkupusha moo, nkuenda mu kuipusha ba-sha binangu baye’shi: ‘Tatui beele bantu basatu mu kaalo? Kadi nkuete kumona bantu bananka, ungi amueka nka bu muikeyilu!’

Nabukondonosore nkuifubuila pepi na buina nkuakula’shi: ‘Tuukayi anue bafubi b’Efile Mukulu Sha-Kuiyilu kula!’ Bantu boso abaadi abakaanya pa kumona Shadrake, Meshake na Abede-Nego abatuuku mu kaalo kushii kutaata su nkapeela. Kikoba kiabo, nyene yabo na bilamba biabo tabibaadi bitaate, tababaadi sunga n’eshiko dia kaalo nya.

Nabukondonosore nkuakula’shi: ‘Efile Mukulu a Shadrake, Meshake na Abede-Nego eende ntumbo. Muanda batumu muikeyilu aye bua kuibapaasha. Ta kui ungi efile bu aabo nya.’

Mu kileshesho kia bena Ebelu basatu, we na kitshibilo kia kuikala na lulamato kui Yehowa sunga mu muanda wi naminyi su?