Esela baadi mulongieshe Muiya w’Efile Mukulu

Kubaadi kupue kukila bipua bifikie ku 70 kasha bebungi ba ku bena Isalele baaluka mu Yelusalema, anka bangi abaadi baki’abashaala mu ma mbalo elekeene a muiumbo dia Pelese. Umune a kuabadi nyi Esela tshiite muakuadi baadi alongiesha Muiya wa Yehowa. Esela baadi mumone’shi bena Isalele tababaadi abalondo dingi Muiya nya, aye nkukimba bia kuibakuasha. Asueruse Nfumu a mu Pelese bamulunguile’shi: ‘Efile Mukulu bakupangile na binangu biodi mulombeene kulongiesha Muiya waye. Enda, wate muntu oso akumiina kuenda noobe.’ Esela nkuimonena na boso babaadi abakumiina kualukiila mu Yelusalema. Abo nkuteka Yehowa buadia kuibakaluila muishinda, akupu abo nkubanga luendo.

Abafikile mu Yelusalema kunyima kua mieshi inanka. Ba nfumu ba miilo nkulungula Esela’shi: ‘Bena Isalele mbakutue kukookiela Yehowa abo nkuibakila bakashi abalanguila b’efile ba madimi.’ Esela bakitshiine kinyi? Baadi mukuname kumpala kua bantu boso aye nkuteka’shi: ‘Yehowa bopu kuitukitshiina bibungi, anka tuikeele bakukitshiine muluisho.’ Bantu nkutoonda, anka babaadi’nka abakitshi mianda ishi buwa. Esela nkusangula bakulu na ba nsunshi buabadia kutaluula yaaya mianda. Kunyima kua mieshi isatu, abaadi baalushe boso bashibaadi abalanguila Yehowa.

Bipua ekumi na bibidi bibakidile. Mu biabia bipua, abaadi beebakuule midimba ya Yelusalema. Esela nkubunga bantu buadia kuibabadikila Muiya w’Efile Mukulu patooka. Pabaadi Esela mufungule mukanda wa miiya, bantu boso nkuimana. Aye nkutumbisha Yehowa, abo nkuela maboko muiyilu bua kukumiina. Akupu, Esela nkuibabadikila na nkuibapatuluila Muiya, muilo nkumuteemesha kalolo. Abo nkuidila p’abo kukumiina dingi’shi abaadi balubile Yehowa. Efuku dibalondele, Esela nkuibabadikila dingi Muiya. Abo nkushinguula musango umune’shi abaadi na kia kukita kitentekiesho kia Musangeelo wa tushibo tua mapema. Kubanga’nka paapa, ababangile kuilumbuula bua musangeelo.

Munda mua mafuku musambo a musangeelo, muilo ubaadi mu muloo na kutumbula Yehowa bua kipungo kia kuumbula. Takubaadi ungi musangeelo bu uno nya kubanga mu mafuku a Yoshua. Kunyima kua musangeelo, muilo ubaadi wibungie, ao nkuteka’shi: ‘Yehowa, buetupaashishe mu bupika, wetudiisha mu kabaaka na kuitupa nsenga i buwa. Anka, tui bakutue nkukookiela misango ibungi. Botumine batemuki bua kuitudimusha, anka tatubaaadi bebapushiishe nya. Boodi’nka neetu luishinko. Obe nkulama mulayilo oobe kui Abalahama. Kadi bua binobino atukulaa’shi atukukookiela.’ Abo nkufunda mulayilo wabo, akupu ba nfumu ba miilo, bena Levi na ba tshiite muakuidi nkuiwela biala.