Mwanda wa 81
Abatuulu lukulupilo mu bukwashi bw’Efile Mukulu
BINUNU bibungi bya bantu abakitshi lwendo lula lwa kukatuka ku Babilone bwa kwenda ku Yeelusaleme. Kadi pababafiki kwanka, babasangana Yeelusaleme mubutudibwe aye ooso. Ta kwi muntu su ngumune mushale mwanka. Abitungu shi beena Isaleele bebakuule bintu byooso.
Kintu kya kumpala kya bebaka, nyi nkilambwilo. Ino nyi mbalo yabadya kulambula nyema bu milambu kwi Yehowa. Kunyima kwa myeshi ipela beena Isaleele ababanga kwibaka ntempelo. Kadi beshikwanyi baabo bashaale mu bibundji bikungishene nabo tabakumina shi beena Isaleele bayibakye nya. Ndjo ababanga kwibatshinyisha bwashi balekye kwibaka. Ku nfudiilo, bano beshikwanyi baabo abalungula nfumu mupya a beena Perse bwashi eele mwiya wa kwimika mudimo wa kwibaka.
Bipwa bibungi bibakidi. Binobino kubapu kukila bipwa 17 kasha beena Isaleele balukiila ku Babilone. Yehowa batumu Agee mutemuki aaye na Zakarii bwa kulungula bantu bwashi babangye dingi kwibaka. Bantu abatuulu lukulupilo mwi Efile Mukulu shi ebakwasha, na babakokyela ku bibebalungula batemuki. Ababanga dingi kwibaka, sunga mwiya ukwete kwibatosha kwibaka.
Byabya, Tatenai mufubi mukata a beena Perse bafiki mu kwipusha beena Isaleele muntu bebapa matalwa a kwibaka ntempelo. Beena Isaleele babamulungula shi pababadi mu Babilone, Nfumu Siruse bebalungwile shi: ‘Ndayi ku Yeelusaleme mu kwibaka ntempelo a Yehowa, Efile Mukulu enu.’
Tatenai batumine mukanda mu Babilone bwa kwipusha su Siruse mupwe kufwa, baadi mwakule bino. Mukanda ubalukiile aufiki kwi nfumu mupya a mu Perse kunyima kwa mafuku apeela. Ubaadi awamba shi Siruse baadi mwakule byabya. Na paapa nfumu bafundile bino: ‘Leka beena Isaleele bayibakye ntempelo bwa Efile Mukulu aabo. Na dingi nenutumina dino eyi bwa nudya kwibakwasha.’ Munda mwa bipwa bu binanka, abapudisha kwibaka ntempelo, beena Isaleele be na muloo ukata.
Bipwa bibungi bibakidi. Binobino takudi bipwa pepi na 48 kasha baapwa kwibaka ntempelo. Bantu ba mu Yeelusaleme be na bulanda, na kibundi na ntempelo a Efile Mukulu tamweneka dingi bu ebuwa nya. Kunyima kwa kwaluka mu Babilone, Esdrase mwina Isaleele bapusha shi kwi lukalo lwa kulumbuula ntempelo a Efile Mukulu. Ouku kibakitshine su?
Esdrase bayile mu kwimonena na Artakesese, nfumu a beena Perse na uno nfumu ebuwa bapeele Esdrase bintu bibungi bwashi alukye nabyo mu Yeelusaleme. Esdrase batekyele beena Isaleele be mu Babilone bwashi bamukwashe bwa kutwala bino bya buntu bibabamupele ku Yeelusaleme. Bantu pepi na 6 000 babakuminyine kwenda. Babaadi na byamo by’ebakanyi bibungi na oòlò na bingi bintu bya muulo bya kutwala.
Esdrase baadi na moo, mwanda munkatshi mwabo mubaadi bantu bebubi. Baba bantu babaadi na mushindo wa kwibayipaa na kwata byamo by’ebakanyi na oòlò. Byabya, Esdrase bayitamina bantu booso, nka bu byokwete kwibimona mu kifwatulo. Abo nkubanga kuteka Yehowa bwashi ebalame pabakwete kwenda mwishinda dila dya ku Yeelusaleme.
Yehowa bebalama. Na kunyima kwa lwendo lwa myeshi inanka, abo nkufika kushi masaku mu Yeelusaleme. Bino tabilesha shi Yehowa mukumbeene kulama booso abatuulu lukulupilo mwadi su?
Edrase shapitre 2 mpa na ku 8.