Elizabete bapete muana

Bipua bikile pa 400 kunyima kua kuibakuula midimba ya Yelusalema, tshiite muakuidi mukata aabetamina bu Zakari na mukashi aaye Elizabete abaadi bashaale mu buipi na kibundi. Abapuile kuiyibakisheena munda mua bipua bibungi, anka tababaadi batande nya. Dingi efuku pabaadi Zakari ashiiki kabanda mu ntempelo a kishila, muikeyilu Gabriele baadi mumumuenekiele. Zakari bapushile moo, kadi muikeyilu Gabriele bamulunguile’shi: ‘Totshiinanga. Nakutuadila mukandu wibuwa aufiki kui Yehowa. Mukashi oobe Elizabete akatanda muana, omuudikie bu Yowano. Yehowa mmumusangule bua mufubo wa pabuao.’ Zakari nkuimuipusha’shi: ‘Ne kukumiina biokula naminyi? Ami na mukashi ande tatupuile kununupa bua kutanda.’ Muikeyilu Gabriele nkumulungula’shi: ‘Ne mutumiibue n’Efile Mukulu bua nkupa uno mukandu. Bu bioshonkumiina, oshaala kamaama mpaa’na apakatandikua uno muana.’

Zakari nkushaala mu kadimbo ka kishila kipindi kikile bula. Pabatukile paasha, bantu babaadi abamutengiela abakimbile kuuka kibaadi kikitshikie. Zakari tabaadi akula nya. Baadi aleesha penda na maasa. Bantu nkushinguula’shi Zakari bapetele mukandu aufiki kui Efile Mukulu.

Muenda mafuku, Elizabete bapetele eyimi, aye nkutanda muana mulume nka bibaambile muikeyilu. Ba loole baaye na beena kifuko naaye abafikile mu kutala muana. Abaadi na muloo ukata. Elizabete nkuibalungula’shi: ‘Eshina dia muana nyi Yowano.’ Abo nkumulungula’shi: ‘Ta kui muntu a mu kifuko kienu e n’eshina bu Yowano. Muudikie bu Zakari bua kulama eshina dia nshaye.’ Kadi Zakari nkufunda’shi: ‘Eshina diaye nyi Yowano.’ Nka paapa, Zakari nkubanga kuakula dingi! Mukandu nkupalakana pabitale muana mu Yudeya mushima, akupu bantu nkubanga kukaanya pa kuiyipusha’shi: ‘Uno muana eekala muntu kinyi pakakulu?’

Akupu Zakari nkuwushibua na kikudi kiselele. Aye nkutemuka’shi: ‘Yehowa atumbishiibue. Baadi mulee Abalahama’shi akatumu mupaashi Mesiya bua kuitupaasha. Yowano akeekala mutemuki buadia kulumbuula eshinda bua Mesiya.’

Ungi muanda wa kukaanya nkukitshikila Maadiya mukuabo na Elizabete. Atuiutala mu shapitre alondo.