Muntu a kulumbula eshinda Batandjikwa

Elizabete taadi peepi na kutanda mwan’aye. Mukwabo Maadiya baapu kushala naye munda mwa myeshi isatu. Nsaa ibalombana bwa shi Maadiya amulee bwa kwenda lwendo lwi bula kunundu kwa Nazerete bwa kwalukiila ku nshibo yaaye. Munda mwa myeshi ifikye ku isamombo badi na kya kutanda aaye mwana.

Mafuku apeela na Maadiya kukatuka, Elizabete batandjile. Bibadi muloo ukata pa kumona Elizabete batanda aaye mwana kushi lukalakashi na kwikala na mbidi bukome na mwana! Pabadi Elizabete muleshe bankungishanyi naye na bakwabo mwana, abadi basangale naye pamune.

Mwiya w’Efile Mukulu kwi beena Isaleele ubadi autekye shi abitungu kusala mwana mulume kunyima kwa mafuku mwanda, akupu bamuudikye eshina. (Beena-Levi 12:2, 3) Bangi bantu abadi abapwandjikisha shi mwana a Zakarii ayitanyinwa mwishina dya nshaye. Anka, Elizabete bakwile n’eyi dikata shi: “Nya, abamwitaanyina bu Yowano.” (Luka 1:60) Tentekyesha shi mwikeyilu Gabryele bakwile shi mwana akaudikibwa bu Yowano.

Bankungishanyi na bakwabo abambile shi: “Takwi muntu sunga umune mu kifuko kyeenu ee na dinw’eshina.” (Luka 1:61) Abadi bepushe Zakarii mu ngakwilo a tumaama eshina dya mwan’aye. Zakarii batekyele kabaaya aye nkufunda lwaluulo shi: “Eshina dyaye Yowano.”—Luka 1:63.

P’aye kufunda eshina dyaye, Zakarii babangile musango umune kwakula dingi. We kutentekyesha shi bafikile bu kamaama pabapelele kukumiina bibamulungwile mwikeyilu shi Elizabete badi na kya kutanda mwana. Binobino nsaa ibadi Zakarri akula, bankungishanyi naye abadi bakanye na kwiyipusha shi: “Byabya uno mwana aikala naminyi?” (Luka 1:66) Abamwene bukome bw’Efile Mukulu mu kipaso kibadi Yowano muudikibwe eshina.

Kunyima kwa kuushibwa na kikudi kiselele, Zakarii bambile shi: “Yehowa atumbishibwe, Efile Mukulu a Isalele, mwanda batembela mwilo waye na kwiwupasha. Na betubushisha lusengwa lwa kipandjilo mu nshibo ya mufubi aaye Dafidi.” (Luka 1:68, 69, Esambi dipya) P’aye kwakula shi “lusengwa lwa kipandjilo,” badi esambila Mwanana Yesu shibadi mubande kutandikwa. Nyi bwakinyi Zakarii bambile shi: Efile Mukulu “etufungusha ku maasa kwa beshikwanyi neetu, tumone bya kumulangwila kushii moo, mu kineemo kya bwiselele na bululame ku meeso kwaye, mund’a muwa wetu ooso.”—Luka 1:74, 75.

Pabitale mwan’aye, Zakarii batemukile shi: “Obe mwana mukinga, abakakwitanyina bu mutemuki eEfile Mukulu a kwiyilu, mwanda okabadiila kumpala, ku meeso kwa Yehowa bwa kulumbuula mashinda aaye, bwa kwiukisha mwilo waye kupashiibwa kwabo mu kulekyelwa kwa milwisho. Nyi nkitundwilo kya kalolo kakile bukata k’Efile Mukulu eetu, pa mwanda wako nyi pafikye mu kwitutembela kimunyi akitundukila mwiyilu, mwanda wa kumunyika baaba be mu mufito na mu mwesheeshe wa lufu, bwa kukunkusha ngwa yeetu mwishinda dya kufukama.” (Luka 1:76-79) Buno butemuki abunyingisha ku mashimba!

Maadiya shibadi mubande kwibakilwa, bafikile ku nshibo mu Nazarete mu kino kipindji. Nkinyi kibadi kimufikile pa kushinkamisha shi e n’eyimi?