Yesu atambuka kunundu kua mema

Kukatusha bukome bua kupasha ba sha mikumbo na kusangula bafue, Yesu baadi dingi na matalua ku bipapi na mpeshi. Kunyima kua kuteka ku muengie, Yesu bamuene kipapi kikata ku Kalunga ka Ngalileya. Batumibua baaye abadi abakimbi bia kukambila kipapi mu buato. Yesu bafikile na kutambuka kunundu kua mema pa buipi nabo. Nsaa ibaadi batumibua bamone muntu atambuka kunundu kua mema, abapushishe moo. Anka Yesu bebalunguile’shi: ‘Nnami. Lekaayi kutshina.’

Mpiele bambile’shi: ‘Muanana, su nnobe eyendo, ntumine eyi dia kufika koodi.’ Yesu baluluile Mpiele’shi: ‘Fika kuandi.’ Munkatshi mua kipapi, Mpiele batukile mu buato, aye nkutambuka kunundu kua mema bua kuenda kui Yesu. Kadi pabafikile peepi naye, Mpiele batadile kipapi aye nkupusha moo. Akupu babangile kuiyina. Mpiele nkuela musaase’shi: ‘Muanana, mpashe namu!’ Yesu nkumukuata ku mboko, na kuakula’shi: “Obe sha lukumiino lupeela, buakinyi wena mpaka?”

Yesu na Mpiele abatuelele mu buato, kipapi kibalekiele musango umune. We kunangushena bibapushishe batumibua su? Abaadi baakule’shi: “Mbinyibinyi we Muana a Efile Mukulu.”

Yesu tabaadi mubatamishe kipapi penda uno musango nya. Dingi efuku pabaadi Yesu na batumibua abende ku lungi lupese lua kalunga, Yesu baadi mulaale ku nsongo ya buato. Pabaadi mulaale, kubafikile kipapi kikata. Mbundambunda ya mema nkubanga kuikupila ku buato abo nkuula na mema. Batumibua nkubuusha Yesu mu tulo na kusama’shi: ‘Mulongieshi, bi’atufu’bi! Etupaashe!’ Yesu babukile aye nkulungula kalunga’shi: ‘Shiiii! Umiina!’ Musango umune, kalunga na kipapi nkuleka. Yesu nkuipusha batumibua’shi: ‘Lukumiimino luenu lui pekunyi?’ Abo nkubanga kuilungushena’shi: ‘Mpa na lupapi na kalunga abimukookiela.’ Batumibua abaukile’shi su abakulupilanga mui Yesu n’eshimba dioso, ta babaadia kuikala na moo wa kintu su nkimune nya.