Mwanda wa 112
Mashuwa abeyini mu mema
TALA! Ano mashuwa e mu masaku! Akwete kutshokoka bipindjibipindji! Bantu abatumpika mu mema. Bangi tabadi pepi na kyese. Omono Mpoolo su? Tubande kutala kibaadi kikitshikye.
Tentekyesha shi, takudi bipwa bibidi kasha Mpoolo akwatshibwa mu lukano mu Kezaree. Na aye na bangi beena lukano mbebele mu mashuwa na bakwete kwenda ku Looma. Pababefubwile pepi na kisangi kya Krete, kipapi kikata kibapukile. Lupapi lubapukile bi bukopo, bantu tababaadi na mushino wa kukunkusha mashuwa dingi. Takubaadi dingi mushindo wa kumona nguba mu kanya sunga nyenyenyi bufuku nya. Akupu kunyima kwa mafuku ebungi, booso babaadi mu mashuwa tababaadi abakulupila dingi shi abapanda nya.
Akupu Mpoolo bayimeene aye nkwamba shi: ‘Muntu su ngumune a kwanudi tashimisha muwa waye nya; anka mashuwa bupenka bwao aashimina. Mwanda mwikeyilu a Efile Mukulu ayikalanga mufikye andungula shi: “Leka kutshina Mpoolo! We na kya kufika kumpala kwa Keezare mukata a beena Looma. Na Efile Mukulu akwikasha na muwa mpa na benoobe booso ba mu lwendo.”’
Munkatshy’a bufuku bwa 14 kasha kipapi kibabangile, bantambushy’a mashuwa babamwene shi mema ababangile kwika! Pa mwanda wa moo wa kupela kwikupila ku mabwe mu mufito, abo nkukasha bintu bya kwimika nabyo mashuwa mu mema. Pabatokyele bufuku babamwene kyese. Abo nkutompa kusesela mashuwa ku kyese.
Byabya, pababafikile pepi na kyese, mashuwa abekupile ku lusenga awo nkushinama. Ndjo mbundambunda ya mema ibabangile kutunkuusha mwashuwa, awo nkubanga kutshokoka bipindjibipindji. Mukata a basalayi baadi ebalama bakwile shi: ‘Baaba abauku kuyowa beyele mu mema na bende ku kyese. Bangi abashala bebalonde na bakwate bipese bya mashuwa bwashi bende ku mwengye.’ Nyi bibabakitshine. Pababeyelele mu mema booso bantu 276 babaadi mu mashuwa babafikile ku kyese, anka bu bibakwile mwikeyilu.
Kyakya kisangi babaadi abekitamina bu Malate. Bantu bamwanka babaadi na kalolo, abo nkukwasha booso babaadi mu mashuwa. Pababatamine lupapi, babatwesheshe Mpoolo mu angi mashuwa bwa kwenda ku Looma.