Mwanda wa 111

Nsongwalume umune balala

TALA! A nkinyi kibakitshika? Uno nsongwalume mulale basakuka ngofu su? Banda kutala! Ungi a ku bano bantu bakwete kutuuka mu nshibo nyi Mpoolo! Okwete kumona na Timotee su? Uno nsongwalume bapono kwididishi su?

Oolo, byabya ndjo bibakitshika. Mpoolo baadi akitshi mwisambo munkatshi mwa balondji kwakwa ku Trowase. Baadi auku shi tabemonena dingi munda mwa mafuku ebungi mwanda efuku adilondo akyebe kwata bwato bwa kwenda. Ndjo aye nkutungunuka na mwisambo mpa na munkatshy’a bufuku.

Eshina dya uno nsongwalume nyi Etishe baadi mushale kwididishi, na tulo nkumukwata. Bapulukile kwididishi dya mu nshibo ya kasatu ya kunundu, aye nkwikupila paashi! Nyi bwakinyi okwete kumona bantu mbenyongole. Pababebwesha uno nsongwalume, abamono shi mmupwe kufwa!

Mpoolo pabamwene shi nsongwalume mmufwe, bamusemwine mu maboko. Akupu aye nkwamba shi: ‘Tanwikupilakupilanga, ee na muwa!’ Ky’eyendo baadi na muwa! Kibaadi nkipaso! Mpoolo bamubuusha ku lufu! Bantu bebungi babaadi na muloo ukata.

Abo nkwenda dingi mu nshibo ya kunundu na kubanga kudya. Mpoolo batungunukile na kwakula mpa na bibatokyele bufuku. Kadi abimweka shi Etishe tabaladile dingi nya! Akupu, Mpoolo na Timotee na booso babaadi ende nabo mwishinda abatwelele mu bwato. Ouku kubabayile su?

Mpoolo kwete kufudiisha lwendo lwaye lwa kasatu lwa mudimo wa kulungula mukandu wibuwa, na kwete kwalukiila kwaaye. Mu luno lwendo, Mpoolo bashaleele bupenka bipwa bisatu mu lupata lwa Efeeze. Luno lwendo lubaadi lukile lwa kabidi bula.

Abo abakatuka mu Trowase, bwato bubayimene munda mwa mafuku ku Milee. Bu bibaadi Efeeze pepi na Milee, Mpoolo batumine bantu bwashi bayitamine bakulu ba mu kakongye ka Efeeze bwashi esambe nabo bwa mususa wa nfudiilo. Kunyima kwa byabya, pabalombeene nsaa ya kukatuka kwa bwato, bakulu babaadi na kinyongwa kikata kya kwilekena na Mpoolo!

Akupu, bwato nkwaluka ku Kezaree. Pabaadi Mpoolo mushale kwakwa mu nshibo ya Fidipe, mutemuki Agabuse baadi mudimushe Mpoolo. Bambile shi Mpoolo pakafiki ku Yeelusaleme abakamwele mu lukano. Eyendo, bino nyi bibakitshikile. Dingi kunyima kwa kushaala mu lukano munda mwa bipwa bibidi mu Kezaree, abatumine Mpoolo bwashi ende akemonene na Keezare nfumu a ku Looma. Tubande kutala kibaadi kikitshikye pababadi mwishinda dya ku Looma.

Bikitshino shapitre 19 mpa na ku 26.