Mwanda wa 110

Timotee mukwashi mupya a Mpoolo

UNO nsongwalume okwete kumona pano na Mpoolo mutumibwa, nyi Timotee. Timotee na kifuko kyaye abaadi bashalele mu Listre. Eshina dya nyina’ye nyi Enise na nyinaaye-kulu nyi Loise.

Uno nyi mususa wa kasatu aufiki Mpoolo mu Listre. Kubapu kukila kipwa kishima, Mpoolo na Banabasa abekalanga bafikye pano mu lwendo lwabo lwa kulungula mukandu wibuwa. Na binobino Mpoolo balukiila dingi kwanka na mwina’ye Silase.

Ouku Mpoolo kya kwete kulungula Timotee su? Kwete kumwipusha shi: ‘Oukumina kwenda pamune nami na Silase? Atukumina shi wetukwashe mu kulungula mukandu wibuwa mu bibundji bi kwibula.’

Timotee balula shi: ‘Oolo, nakumina kwenda.’ Kunyima kwa mafuku apeela, Timotee balekye kifuko kyaye bende pamune na Mpoolo na Silase. Kadi kumpala kwashi tulongye myanda itale lwendo lwabo, tubande kutala kibaadi kikitshikile Mpoolo. Kubapu kukila bipwa 17 kasha Yesu amumwenekyela mwishinda dya ku Damase.

Tentekyesha shi Mpoolo baadi ende ku Damase mu kukyengyesha balondji ba Yesu, kadi binobino aye namu taadi mulondji a Yesu! Kunyima bangi beshikwanyi babaadi baate kitshibilo kya kwipaa Mpoolo mwanda tababaadi bakumine bulambukishi bwaye pabitale Yesu nya. Anka balondji nkukwasha Mpoolo bwashi asuukye. Abo nkumwela mu kiseele na nkumutuusha paasha pa kimano kya lupata.

Kunyima kwa byabya Mpoolo bayile ku Antyoshe mu kulambukisha. Kuno nyi ku mbalo ya kumpala ibabetamine balondji ba Yesu bu beena Kidishitu. Abalungwile Mpoolo na Banabasa bwashi bakatukye mu Antyoshe bwa kwenda mu lwendo lwa kulambukisha mu bibundji bi kwibula. Kimune kya ku bibundji bibabalambukishe abekitamina bu Listre, kubaadi kushaale Timotee.

Paapa, kubakidile pepi na kipwa kishima, ndjo Mpoolo nkwalukila ku Listre mu lwendo lwaye lwa kabidi. Nsaa ibayile Timotee pamune na Mpoolo na Silase, ouku kubabayile su? Tubande kutala mu karte bwa kulonga angi ma mbalo.

Kumpala, babayile ku Ikonyume, lupata lwi pepi na Listre na ku lungi lupata lwakabidi lwabetanyinaa bu Antyoshe. Akupu babayile ku Trowase, kunyima abo nkwenda ku Fidipe, ku Tesalonike na ku Beree. Okwete kumona Ateene mu karte? Mpoolo baadi mulambukishe mukandu wibuwa kwanka. Akupu abaadi bakite kipwa kishima na kipindji balambukishanga mu Kodinto. Kunyima abayimene ku Efeeze munda mwa mafuku apela. Ndjo abo nkwaluka na bwato ku Kezaree, nkukamina ku Antyoshe kubaadi kushaale Mpoolo.

Byabya Timotee baadi mutambukye nkama na nkama ya bilometre afwakwashanga Mpoolo bwa kulungula “mukandu wibuwa” na kukita tukongye twibungi. Pokulu, okekala mufubi a kishima a Efile Mukulu bu Timotee su?

Bikitshino 9:19-30; 11:19-26; shapitre 13 mpa na ku 17; 18:1-22.

[Map]

(For fully formatted text, see publication)

Looma

Malate

Tesalonike

Beree

Kodinto

Fidipe

Ateene

Krete

Trowase

Efeeze

Milee

Kolose

Antyoshe

Ikonyume

Listre

Antyoshe

Shiipre

Damase

Kezaree

Yopee

Yeelusaleme

KALUNGA KAKATA (MEDITELANEE)