Mpoolo na Timote

Timote baadi nsongualume baadi mu kakongie ka Listre. Nshaye baadi muina Greke na nyinaaye muina Yunda. Nyinaaye Enise na nyinaaye kulu Loise abaadi bamulongieshe pabitale Yehowa kubanga ku bukinga.

Pabaadi Mpoolo mukatale kakongie ka ku Listre bua musango wa kabidi, bamuene’shi Timote baadi mufule bakuabo na baadi akimbi kuibakuasha. Mpoolo baadi mumuitamine bua kumushindika mu luendo luaye. Munda mua mafuku, Mpoolo baadi mulongieshe Timote bua kuikala mulungudi e buwa na mulambukishi a mukandu wibuwa sha kishima.

Mpoolo na Timote abaadi abakunkushua na kikudi kiselele kooso kubabadi abende. Dingi efuku bufuku mu kimonua, ungi muntu balunguile Mpoolo buadia kuenda ku Maseduane bua shi ebakuashe. Mpoolo nkuenda na Timote na Silase na Luka buabadia kulambukisha na kukita tukongie.

Bantu bebungi abafikile bena Nkidishitu mu Maseduane kibundi kia mu Tesalonike. Anka bangi bena Yunda abaadi bakuatshile Mpoolo kiutu na benaaye. Abaadi bebungie kisaka, abo nkukaka bakuetu kui bakata ba kibundi na kusama’shi: ‘Bano bantu mbeshikuanyi ba mbulamatadi a bena Loma!’ Muwa wa Mpoolo na Timote ubaadi mu masaku, abo nkusuuka bufuku ku Beree.

Bantu ba ku Beree abaadi na lukalo lukata lua kupusha mukandu wibuwa, na dingi bena Greke na bena Yunda abafikile bena kukumina. Anka pabafikile bangi bena Yunda ku Tesalonike bua kutuesha kafutakanyi, Mpoolo bayile ku Atene. Timote na Silase abashadile mu Beree bua kunyingisha bakuetu. Akupu, Mpoolo batumine Timote bua kualuka ku Tesalonike bua kukuasha bakuetu abaadi abakiengeshibua bikata kuakua. Kunyima, Mpoolo batumine Timote mu kutala tungi tukongie tuibungi na kuitunyingisha.

Mpoolo balunguile Timote’shi: ‘Baaba boso abakiebe kufubila Yehowa abakakiengieshibua.’ Timote baadi mukiengieshibue mu lukano muanda wa lukumiino luaye. Baadi na muloo muanda bibaadi bu mushindo wa kuleesha patooka lulamato luaye kui Yehowa.

Mpoolo balunguile bena Fidipe’shi: ‘Nenutumina Timote. Enulambukishe akileesha kutambukila mu bia binyibinyi, na akiebe kuinulongiesha bia kufuba mudimo.’ Mpoolo baadi akulupila mui Timote. Bafubile naaye pamune bu kuuku na bu mukuashi a mudimo bipua bibungi.