Timotee baadi akumiina kukwasha bantu

Timotee baadi nsongwalume baadi na muloo wa kukwasha bantu. Baadi mutambukye ma mbalo ebungi bwa kukwasha bangi. Pa mwanda wa bino, baadi na nshalelo a muloo na ebuwa bukile. Okumiina kuuka uno mwanda su?—

Timotee baadi mukule mu kibundji kyabetanyina bu Listre. Nsaa ibaadi kii mwana mukinga, nyina’ye-kulu Loise na nyina’ye Enise, ababangile kumulongyesha myanda itale Yehowa. Pabaadi Timotee ende na kukula baadi na lukalo lwa kukwasha bangi bwa kuuka Yehowa.

Nsaa ibafikile Timotee nsongwalume, Mpoolo bamutekyele bwa kwenda naye mu lwendo lwa kulungula mukandu wibuwa mu angi ma mbalo. Timotee nkwalula shi: ‘Oolo’. Baadi mukumiine kwenda bwa nkakwasha bangi.

Timotee baadi mwende na Mpoolo mwiumbo dya mu Masedwane dyabetanyina bu Tesalonika. Bwa kwenda kwakwa, abaadi batambukye ngofu lwa ngwa na abo nkwata bwato. Nsaa ibabakafikile kwanka, abaadi bakwashe bantu bebungi bwa kuuka Yehowa. Kadi bangi bantu abaadi bafiite munda ngofu na nkutompa bwa kwibakita bibubi. Byabya Mpoolo na Timotee abaadi bakatukye bwa nkalambukisha angi ma mbalo.

Kunyima kwa myeshi ibungi, Mpoolo baadi mutekye Timotee bwa kwenda ku Tesalonika nkamona su bakwabo beena Kidishitu bakwete kwenda kumpala mu kikudi. Bibaadi abituntu eshimba dinyingye bwa kwenda ku dino eumbo di masaku! Kadi Timotee bayiile mwanda baadi ekalakasha ngofu pabitale bakwabo abaadi kwakwa. Baadi mwalukiile kwi Mpoolo na mukandu wibuwa bukile. Bakwabo beena Kidishitu ba mu Tesanika abaadi abende kumpala mu kikudi!

Timotee baadi mufube ngofu na Mpoolo munda mwa bipwa bibungi. Musango umune Mpoolo baadi mufunde shi Timotee baadi muntu ebuwa mulombeene kutuma bwa nkakwasha tukongye. Timotee baadi mufule Yehowa na bantu.

We mufule bantu na okumiinaa kwibakwasha bwa kulonga myanda ibungi pabitale Yehowa su?— Su bokitshi byabya, we mulombeene kwikala na nshalelo a muloo na ebuwa bukile, anka bu Timotee!