Buina Nkidishitu bubapalakana mu bisamba bibungi

Batumibua abaadi bakookiele ku muiya wa Yesu wa kupalakasha mukandu wibuwa mu nsenga ishima. Mu kipua kia 47 B.B., bakuetu ba mu Antiyoshe abatumine Mpoolo na Barnabase bua kuifunya na mukandu wibuwa. Bano balungudi babidi ba kishima abayile mu Asie Mineure mu ma mbalo bu mu Derbee, mu Listre na mu Ikoniume.

Mpoolo na Baranabase abalunguile mukandu kui bantu boso, biabekala ba mpeta sunga balanda, bakinga sunga bakulu. Bantu bebungi abaadi bakumiine bia binyibinyi pabitale Nkidishitu. Pabaadi Mpoolo na Barnabase abalambukisha Sergiuse Pauluse ungi mukata a mu Shipre, ungi muntu sha malenganyi bakimbile kuibatosha. Mpoolo bamulunguile shi: ‘Eyasa dia Yehowa di poodi.’ Musango umune sha malenganyi bafikile mpofu. Pabaadi mukata a kibundi Pauluse mumone biabia, bafikile muina kukumiina.

Mpoolo na Baranabase abalunguile mukandu wibuwa mbalo yoso, ku nshibo na nshibo, mu bisalue mu miseese na mu bitumbuilo. Pababadi bapaashe muntu sha kilema mu Listre, boso babamuene kiakia kilengieleshi abebamuene bu b’efile abo nkukimba kuibalanguila. Kadi Mpoolo na Barnabase nkuibatosha p’abo kuibalungula’shi: ‘Languilayi nka penda Efile Mukulu! Tui nka bantu bisumanga.’ Akupu bangi bena Yunda nkufika, abo nkutakula muilo bua kufiitshila Mpoolo munda. Muilo nkumuasa mabue, abo nkumukaka paasha pa kibalo na kupuandikisha’shi baafu. Anka, Mpoolo baadi ki na muwa! Bakuetu abafikile musango umune mu kumukuasha, abo nkumualusha mu kibundi. Kunyima Mpoolo balukiile ku Antiyoshe.

Mu kipua kia 49 B.B., Mpoolo baadi muende mu lungi luendo. Kunyima kua’ye nkatala bakuetu mu Asie Mineure, baadi mutuale mukandu wibuwa mpa na mu mbalo ikile bula mu Europe. Aye nkuenda ku Atene, ku Efeso, ku Tesalonike, mpa nka na mu angi ma mbalo. Silase, Luka na nsogualume abetamina bu Timote abadi bashindikile Mpoolo mu luendo luaye. Abafubile pamune bua kukita tukongie na kukuasha buatudia kunyingiila. Mpoolo baadi mushale mu Kodinda munda mua kipua na kipindi bua kunyingisha bakuetu babaadi muamua. Baadi mulungule mukandu wibuwa, kulongiesha na kufundila tukongie tuibungi mikanda. Baadi mpa na mufube mudimo wa kukita tushibo tua mapema. Muenda mafuku, Mpoolo baadi mualukile mu Antiyoshe.

Kunyima mu kipua kia 52 B.B., Mpoolo baadi muende mu luendo lua kasatu, kubangila mu Asie Mineure. Baadi muende kula dia kunundu bu ku Fidipe na kuushi kua Kodinda. Mpoolo bakitshiine bipua bibungi mu Efeso na kulambukisha, kupaasha ba sha maladi na kukuasha kakongie. Baadi dingi akitshi miisambo ya bantu boso efuku dioso mu kalasa. Bantu bebungi abaadi abamuteemesha na kunshituula nshalelo aabo. Nfudiilo a bioso kunyima ku’aye kulungula mukandu wibuwa mu ma mbalo ebungi, Mpoolo baadi mualukiile mu Yelusalema.