Abatumu Mpoolo ku Loma

Luendo lua Mpoolo lua musango wa kasatu lubaadi lukafudiile mu Yelusalema. Abaadi bamukuate, abo nkumuela mu lukano. Bamuene Yesu bufuku mu kimonua amulungula’shi: ‘Abitungu wende ku Loma bua’shi okalungule kuakua.’ Abatuadile Mpoolo kukatuka ku Yelusalema benda naaye ku Kezaree kubakitshine bipua bibidi mu lukano. Pabaadi asamba kumpala kua Mukata a kibundi Festuse, Mpoolo bambile’shi: ‘Natekie bua’shi Kezare ataluule uno muanda.’ Festuse bambile’shi: “Botekie bua’shi Kezare ataluule uno muanda; wende kui Kezare.” Abelele Mpoolo mu mashuwa, abo nkuenda naye ku Loma, Luka na Aristakuse bakuetu babidi bena Nkidishitu abayile naye.

Mu Kalunga, kubaadi kipapi kikata kibakitshine mafuku ebungi. Boso abaadi abamono’shi abafu. Anka Mpoolo bambile’shi: ‘Bakuetu, muikeyilu mundungule bufuku mu kilootua’shi: “Mpoolo, totshinanga. Okafiki ku Loma, na boso be noobe mu mashuwa abapanda.” Nyingayi mashimba! T’atufu nya.’

Kipapi kibakitshiine mafuku 14. Nfudiilo a bioso abafikile ku kiese. Kubaadi ku kisangi kia Malte. Mashuwa abaadi ekupile mu nsenga ao nkutanyika tupese, kadi bantu boso 276 abaadi muanka abapandile. Bangi abaadi bayowe, bamo namu abaadi balengame ku tupese tua mashuwa mpa na ku kiese. Bantu ba ku Malte nkuibapasukila bikata, abo nkuibelela kaalo bua’shi bawote.

Kunyima kua mieshi isatu, basalayi abatuadile Mpoolo ku Loma mu angi mashuwa. Pabaabadi bafikie, bakuetu abafikile mu nkamukuukila. Pabaadi muibamone, Mpoolo baadi mualushe lutumbu kui Yehowa aye nkunyingishibua. Sunga biekala’shi Mpoolo baadi muina lukano, abaadi bamutadiile bua kushala mu nshibo ya kufutshila anka, baadi alamiibua kui musalayi. Baadi mushale kuakua munda mua bipua bibidi. Bantu abafikanga mu kumumona, baadi ebalungula mukandu wibuwa pabitale Bufumu bu’Efile Mukulu na kuibalambukisha pabitale Yesu. Mpoolo baadi mpa na mufunde mikanda atumina tukongie tua mu Asie Mineure na mu Yudeya. Yehowa baadi mufube na Mpoolo bua kupalakasha mukandu wibuwa kui bisamba bibungi.