Bwakinyi Efile Mukulu atadiilaa ba sha matalwa abakyengyesha bangi?

Bible esambila bibaadi bangi bantu be na matalwa bakyengyeshe bangi. Mu bano bantu twi kutemuna Nabote.a Nfumu Akabe baadi mu Isaleele mu siekele a ekumi, kumpala kwa bipungo byetu (K.B.B.), baadi mutadiile mukash’aye Yezabele, bwadya kwipayisha Nabote na bana baaye bwashi nfumu aate efuba dyaye dya nfinyo. (1 Banfumu 21:1-16; 2 Banfumu 9:26) Bwakinyi Efile Mukulu baadi mutadiile’shi afubishe matalwa aaye bibubi?

Tubande kutala kabingilo kakata ka kumpala: Efile Mukulu t’adimbanaa. (Tite 1:2) Nkwipusheena kinyi kwi pankatshi pa kano kabingilo na buntomboshi? Ku mbangilo, Efile Mukulu baadi mudimushe bantu’shi kumutombokyela akutuusha masaku​—lufu. Bibakwile Efile Mukulu mbya binyibinyi, mwanda bantu bakwete kufwa kasha bamutombokyela mu lupango lwa Edene. Lufu lwa muntu a kumpala, lubafikile ku buntomboshi​—nsaa ibabayipayile Abele kwi mukwabo Kayina.​—Kibangilo 2:16, 17; 4:8.

Eyi dy’Efile Mukulu adyakula mu kikoso shi, kubanga nka paapa: ‘Bantu mbatonte ben’abo na kwibamwesha malwa.’ (Mulungudi 8:9, EEM) Ano mayi nga binyibinyi. Yehowa baadi mudimushe mwilo waye wa beena Isaleele’shi, ba nfumu baabo abakeekala abebakyengyesha, mu mushindo aukadidi bantu kwi Efile Mukulu bwa’shi ebakalwile. (1 Samwele 8:11-18) Sunga Nfumu a binangu Salomone baadi akyengyesha bantu. (1 Banfumu 11:43; 12:3, 4) Ba nfumu bebubi bu Akabe, babaadi na buntomboshi bukilekile. Eyipushe bino: Su Efile Mukulu baadya kukalwila bantu ku bikitshino bibubi bya baaba bakunkushi, tabadya kwikala muntu sha madimi?

Na dingi, tentekyesha’shi Satana baadi mwakule’shi bantu abafubila Efile Mukulu mwanda be mu muloo. (Yoobo 1:9, 10; 2:4) Su Efile Mukulu badya kukalwila bantu ku myanda ibubi ayibakitshina bakunkushi, ta badya kukwatshisheena mayi a Satana su? Na su Efile Mukulu baadya kukalwila bantu ku myanda yooso ibubi, tabadya kwikala nsulo ya ano madimi akata su? Su badya kukita byabya bantu bebungi abaadya kwakula’shi mbalombeene kwikunkusha kalolo kushi Efile Mukulu. Aku namu Eyi dy’Efile Mukulu adyakula shi​—muntu ta mmulombeene kwiludika aye nabeene kalolo nya. (Yeelemiya 10:23, EEM) Twi na lukalo bwashi Bufumu bw’Efile Mukulu bufikye mwanda nka penda’bo nyi abukakatusha kukutwa kwa kululama.

Byabya abileesha’shi Efile Mukulu t’akitaa kintu su nkimune kwi baaba abakyengyesha bangi? Nya. Banda kutala ino myanda ibidi yakitaa: Wa kumpala, aleeshaa bi buntomboshi bwa muntu patooka. Bu kileshesho, Eyi dyaye adileesha byooso bibaadi bikite Yezabele bwa kwipayisha Nabote. Bible baadi muleeshe kubanga ku mbangilo shi kwi mukunkushi e bubi mufwame kunyima kwa byabya bikitshino bibubi. (Yowano 14:30; 2 Beena-Kodinto 11:14) Bible amuleesha bu Satana Diabulu. P’aye kuleesha buntomboshi na bubi bwaye patooka kubanga ku mbangilo, Efile Mukulu etukwasha bwatudya kumusuuka kula. Aketukalwila bwa looso mu mafuku aafiki.

Wa kabidi, Efile Mukulu etushinkamiisha’shi akayimika buntomboshi. Kipaso kibaadi muleeshe bubi bwabo patooka, atshiba kiimu, na kunyoka Akabe na Yezabele​—mpa na bangi—​abitupa lukulupilo mu milayilo yaaye’shi akanyoko baaba booso abakyengyesha bangi bantu lelo uno. (Misambo 52:1-5) Efile Mukulu etupa dingi lukulupilo lw’eyendo’shi binobino, akakatwisha baaba bamufule myanda yooso ibubi.b Byabya Nabote muntu sha lulamato akeekala na bana baaye mu mpaladiiso pa nsenga mushamukekala kukutwa kwa kululama bwa looso.​—Misambo 37:34.