MIISAMBO YA MBANGILO | OKUMIINA KULONGA BIBLE SU?

Programe a kulonga Bible bwa bantu booso

Batemwe ba Yehowa abaukibwa kalolo bwa mudimo wabo wa bulungudi. Byabya, owuku dingi shi twi na programe a kulonga Bible bwa bantu booso?

Mwana mulume alongo Bible pa mbalo yaye ya mudimo

Mu 2014, Batemwe ba Yehowa bakile pa 8 000 000 be mu maumbo 240 mbalongye Bible na bantu peepi na 9 500 000 ku mweshi ooso.a Mbinyibinyi, bungi bwa bantu bakwete kulonga netu bible mbukile bungi bwa bantu be mu angi maumbo 140!

Bwa kulombasha uno mudimo wa kulambukisha, Batemwe ba Yehowa mbatuushe peepi na mudiyala umune na kipindji wa ma Bible, mikanda, ma jurnale, na ingi mikanda ayikwasha bwa kulonga Bible na bantu ku kipwa kyoso—mu ndimi 700! Uno mudimo wa kutuusha mikanda awukwasha bantu bwa kulonga Bible mu ludimi lwabakumiina.

“Tshinaadi mulongye bino mu kalasa nya, kadi, kulonga kwa Bible kubaadi akunsankisha. Na myanda inaadi mulongye ayinyingisha!”—Katlego, a mu Afrique du Sud.

“Mu kolonga, ne mupete myaluulo ku nkonko yande yooso mpa na ingi myanda ibungi.”—Bertha, a mu Mexique.

“Tubaadi atulongyela ku nshibo yande pa nsaa yankumiina. Nyi binaadi nankumiina!”—Eziquiel, a mu Brésil.

“Tu mitwe twa myanda tubaadi atukitshi ingi nsaa minite 15 na ku 30—ingi misusa ibaadi ayikidi paapa—bibaadi bilombane bwande’mi.”—Viniana, a mu Australie.

“Kulonga buntu—nyi kubaadi akunkaanyisha!”—Aimé, a mu Benin.

“Muntu baadi alongo naami baadi na lwishinko na kalolo. Tubaadi batamishe kipwano naaye.”—Karen, a mu Irlande du Nord.

“Bantu bebungi bakwete kulonga Bible kadi kushi kufika Batemwe ba Yehowa.”—Denton, a mu Angleterre.

MYALUULO KU NKONKO YABAKAMBAA KWIPUSHA PABITALE PROGRAME EETU A KULONGA BIBLE

Kulonga akukitshikaa mushindo kinyi?

Atwisambilaa mitwe ya mwanda ya mu Bible ilekeene na kutaluula maverse a mu Bible aakwila yaya myanda. Bu kileshesho, Bible aluula nkonko bu ino: Efile Mukulu nnanyi? E naminyi? E n’eshina su? Mmushale kunyi? Twi bya kwifubwila peepi naye? Lukalakasho ndwa kuuka mbalo ya kukimba myaluulo mu Bible.

Bwa kukwasha bantu bwa kupeta myaluulo, atufubaa na mukanda wa A nkinyi akilongyesha namu Bible? wi na masaki 224.b Uno mukanda mbeutuushe nka penda bwa kukwasha bantu bwa kupusha malongyesha akata a mu Bible. Awisambila dingi pabitale Efile Mukulu, Yesu Kidishitu, makyenga a bantu, lusangukilo, kwela nteko, na ingi miisambo ibungi.

Kulonga nkulombeene kukitshika nsaa na mbalo kinyi?

Kulonga kwi kukitshika mu nsaa na mbalo yokumiina.

Kulonga nkulombeene kukita nsaa inga?

Bantu bebungi abataa nsaa umune ku lubingo looso bwa kulonga Bible. Bungi bwa mafuku a kulonga mbulombeene kushintuluka. Atukakitshi mwetu mooso bwa kulonga muyiile nsaa yoobe. Bangi abalongaa munda mwa minite 10 sunga 15 ku lubingo.

Abitungu kufuta makuta bungi kinyi bwa kulonga Bible?

Kulonga na mikanda ya kulonga mbya buntu. Bino mbipusheene na mwiya wa Yesu ubaadi mupe balongi baaye shi: “Nwi bapete buntu, byabya panaayi buntu.”—Mateo 10:8.

Kulonga akukitshika mu mafuku bungi kinyi?

We mukumbeene kulonga munda mwa mafuku okumiina. Mukanda wa A nkinyi akilongyesha namu Bible? wi na ma shapitre 19. We kulonga shapitre ooso sunga yooso mu mushindo okumiina.

Abitungu shi nfikye bu Temwe a Yehowa?

Nya. Atushinguula na kunemeka matalwa a muntu ooso a kusangula myanda yakumiina. Bantu abapete kyukilo kya myanda ya mu Bible, mbalombeene kwata bitshibilo bibuwa.

Nkunyi kwandya kuuka ingi myanda?

Site a Internet a jw.org/sop kwete kulesha myanda ibungi pabitale nkumiino na midimo ya Batemwe ba Yehowa.

Ne kuteka kulonga kwa Bible naminyi?

We kuteka ku Internet mu site a www.jw.org/sop.
We kufundila nimero imune ya ku ma adrese yabadi baleshe mwisaki dya kabidi dya uno jurnale i peepi noobe.
Bwa kwisamba na Batemwe ba Yehowa be pepi noobe, we kukimba nimero ya “Batemwe ba Yehowa” mu mbalo yabadi bafunde ma nimero a ma telefone mu kibundji kyenu.

a Misusa ibungi, bakwete kukunkusha kulonga kwa Bible na muntu pa bupenka sunga na kasaka ka bantu.

b Wabadi batuushe kwi Batemwe ba Yehowa. Mbeutuushe mikanda ikile pa midiyo 230 mu ndimi ikile pa 260.

KULONGA BIBLE AKUKWASHA BENA BIFUKO

“Pabaabangile mukashi’ande kulonga Bible, naadi mumone kushintuluka mwadi. Nshaleelo eetu a kifuko baadi mulumbulukye. P’ami kukimba kuuka bibaadi alongo, naabangile na’mi namu kulonga. Binaadi nalongo mbingikashe na mwikeelo wibuwa. Kulonga kwa Bible nkunyingishe kipwano kyetu kya mu kifuko.”—Eziquiel.

“Kunyima kwa’mi kubanga kulonga Bible, naakimbile bya kuleka bikitshino bya kutoma bintu abikolwanaa, kukolwa maalwa na kulonga bya kwimika nsungu yande. Nshibo yande ngitooshibwe na ngilumbule kalolo. Nasankila kifuko kyande, akupu nasankila kukita myanda ayibasangasha. Ne na muloo ukata.”—Karen.

“Bangi bantu babadi abangipula mwanda wa kulonga Bible. Sunga mbyabya, mulum’ande baadi mukwatshishene kitshibilo kyande, akula shi: ‘Ntantala abyakula bantu nya. Kumona biboshintuluka mu kukita myanda ibuwa—nyi mwanda ausankisha. Tungunuka na kukita byabya.’ Nshalelo eetu a kifuko kasha tekeele kalolo bino nya!”—Viniana.