Efwileneeyi lusa

MWIYA WA MU BIBLE: “Su muntu e na kilumbu na ungi efwileneeyi lusa kwi muntu na muntu bu bi nufwile Yehowa lusa . . . kitaayi byaa-mumune, anwe namu.”​—Beena-Kolose 3:13.

Abipatuula kinyi? Mu Bible, mulwisho wi bu ebaasa na kufwila lusa abekupwandikisha bu kufuta ebaasa. (Luuka 11:4) Ungi mukanda awamba’shi kishima kya mu kiina Greeke kyabadi baluule bu “kwifwileena lusa” akileesha “kulekyela ebaasa kushi kwidikyenda.” Byabya, nsaa yatufwila muntu mwitulwishishe lusa, atumulekyeela kitungo kya kulumbuula. Kufwila kwa muntu lusa takulesha’shi atukumiina bubi bwadi mukite sunga kubepuula byabidya kwitutapa kwishimba. Kwilekena na byabya, atupele penda kulamiina bubi munda, sunga byekala’shi twi na kabingilo ku “kilumbu.”

Ukii na muulo lelo uno su? Bu byatudi bantu bakutwe kupwidika, atwe booso atulwishaa. (Beena-Looma 3:23) Atufwilaa bangi lusa, mwanda atukekala namu na lukalo bwashi bangi betufwile lusa. Na dingi, patufwila bangi lusa, abitukwasha atwe banabeene. Mu kipaso kinyi?

Patushala na nsungu na kulamiina muntu​—kushii kumufwila lusa​—atwikyengyesha atwe banabeene kwishimba. Byabya binangu bibubi mbilombeene kwitukutshishwa muloo, kupeelesha mafuku a muwa wetu na kwitukyengyesha. Mbilombeene kwitufwishila dingi mikumbo. Lungi lwapoolo (Journal of the American College of Cardiology) lwabadi bafunde kwi Dr. Yoichi Chida na Andrew Steptoe mulongyeshi a myanda itale binangu bya bantu aluleesha’shi: “Myanda yabadi batundule binobino ayileesha kwipusheena pankatshi pa nsungu na mushikwa na maladi a binangu na ingi mikumbo.”

Kukatusha byabya, kwi miloo ibungi yatupete pa kufwila bangi lusa. Mwanda, patukitshi byabya, atulama buumune na butaale na kulama kipwano kyetu na bangi. Mwanda wi na muulo ukata kukila byabya byoso, atwambula kileshesho ky’Efile Mukulu afwilaa bantu abelanga kwishimba milwisho yaabo na etutekye bwa kukita namu bimumune.​—Maako 11:25; Beena-Efeeze 4:32; 5:1.