MIISAMBO YA MBANGILO
Efile Mukulu amonaa ngoshi naminyi?
We kwaluula ku lwalwa lukonko naminyi? Bantu bebungi abamonaa’shi Efile Mukulu akumiinaa ngoshi. Abaakula byabya mwanda’shi Efile Mukulu baatumine bangi ba ku bafubi baaye bwa kwenda mu kulwa ngoshi; Bible e na miisambo ibungi ayileesha byanka. Bangi namu abaakula’shi Yesu Mwan’Efile Mukulu baadi mulongyeshe balongi baaye bwabadya kufula beshikwanyi naabo. (Mateo 5:43, 44) Abaakula’shi kubanga mu mafuku a kala, mweneno a Efile Mukulu bwa ngoshi baadi mushintulukye, na kano kabidi t’eyikumiinaa dingi nya.
Omono naminyi? Efile Mukulu akumiinaa ngoshi su? Su bi byabya, e ku lupese lwa bantu kinyi bakutwe kwipusheena be kano kabidi? Kupeta myaluulo ku ino nkonko kwi kushintuula mweneno oobe pabitale ngoshi. Bu kileshesho, su ouku’shi Efile Mukulu takumiina nka penda ngoshi kadi akwatshisheena lupese loobe, opusha kalolo bwa byokitshi pabitale ngoshi na kukulupila’shi anukatshokola. Ku lungi lupese, we kupusha naminyi su ouka’shi Efile Mukulu kwete kukwatshishena b’eshikwanyi noobe? Abimweneka’shi abitungu otaluule mweneno oobe pa uno mwanda.
Kwi mwanda wi na muulo ukata autungu kushinguula. Kuuka bi mweneno a Efile Mukulu pabitale ngoshi nkulombeene kushintuula byomonaa Efile Mukulu. Su we munkatshi mwa midiyo ya bantu bakyengyeshibwe na myanda ya ngoshi, kushi mpaka we na lukalo lwa kupeta lwaluulo ku luno lukonko, Efile Mukulu nnaye binyibinyi nsangakanyi kwete kutuusha makyenga aatuukila ku ngoshi, sunga’shi mmulombeene kwikala shabasukaa bwa kwikala kwa biya kwa bantu bakwete kukyenga su?
We kukaanya pa kuuka lwaluulo alutuusha Bible mu kwilekeena na yaaya mweneno. Mwanda kubanga pa kala mpa na lelo uno, mweneno a Efile Mukulu pabitale ngoshi tamushintulukye nya. Tubande kutaluula abyakula Bible pabitale mweneno a Efile Mukulu mu mafuku a kala na mu siekele a kumpala pabaadi Yesu pa nsenga. Byabya abitukwasha bwa kuuka mweneno a Efile Mukulu pabitale ngoshi ayikafwila bantu booso mu mafuku e kumpala.