Sumbwila Yehowa twinyongoshi toobe tooso

1, 2. (a) Bwakinyi atupetaa twinyongoshi? (Tala kifwatulo ki ku mbangilo.) (b) Nkinyi kyatukyebe kulonga mu uno mwisambo?

LELO UNO, Satana kwete “akindakana kooso-kooso bu ntambwe e bukyelo kwete kukimba aady’a kudya.” (1 Mpyeele 5:8; Kibafumbwilwe 12:17) Ngi bwakinyi, kwi twinyongoshi twa mu nshaleelo mpa na kwi bafubi b’Efile Mukulu. Mu mafuku a kala, bafubi b’Efile Mukulu abaadi abafumankana na myanda i bukopo. Bu kileshesho, Bible akula’shi ingi nsaa Nfumu Daavide baadi na twinyongoshi. (Misambo 13:2) Mpa na Mpoolo mutumiibwa “bakalakashwanga mwishimba pa [mwanda wa tukongye, NWT].” (2 Beena-Kodinda 11:28) Kadi nkinyi kyatudi balombeene kukita nsaa yatudi na twinyongoshi?

² Nsheetu sha kifulo e mwiyilu baadi mukwashe bafubi baaye ba kala bwabadya kukambila twinyongoshi, na akumina kwitukwasha n’atwe namu leelo uno. Bible etulungula’shi “Mulubwileyi mpombo yeenu yooso, mwanda aye kwete kwinulama.” (1 Mpyeele 5:7) We kwibikita naminyi? Atukesambila mishindo inanka ya kwibikita. Wa (1) kwela nteko, (2) kubadika na kwela binangu ku byobadika mu Eyi dy’Efile Mukulu, (3) kuleka bwa’shi kikudi ki selele kya Yehowa kikukwashe, na (4) kulungula muntu oodi mukulupile byopusha. Patwende na kulonga ino mishindo inanka, etatshishe bwa kutala ma mbalo oodi mulombeene kulumbuula.

“TENTWILA BUSHITO BOOBE KWI YEHOWA”

3. We “kutentwila bushito boobe kwi Yehowa” naminyi?

³ Mushindo wa kumpala watudi balombeene kusumbwila Yehowa twinyongoshi twetu nyi nkwela nteko ayituukila mwishimba. Poodi na twinyongoshi, Nshoobe a kifulo e mwiyilu akumina’shi omulungule bi mwishimba dyoobe. Daavide mufundji a misambo batekyele Yehowa bino: “Mwanana Yehowa teemesha luteko lwande.” Mu uno musambo umune Daavide bambile dingi’shi: “Tentwila bushito bwobe kwi Yehowa, Aye akunyingisha.” (Misambo 55:2, 23) Kunyima k’obe kukita moobe mooso bwa kupudisha mwanda, kwela luteko alutuukila mwishimba dyoobe kwi Yehowa akukukwasha bwa kuleka kwikalakasha. Anka luteko alwikalaa na bukwashi kinyi? Lwi kwitukwasha bwa kupela kukambilwa na twinyongoshi naminyi?​—Misambo 94:18, 19.

4. Bwakinyi luteko lwi na muulo nsaa yatudi na twinyongoshi?

⁴ Badika Beena-Fidipe 4:6, 7. Yehowa alulaa nteko yatukitshi n’eshimba dimune na yatukitshi misango ibungi naminyi? E kwitukwasha bwa kupeta butaale na kukatusha binangu bibubi. Bwa kwitukwasha bwa kukatusha twinyongoshi na moo, Efile Mukulu etupeyaa butaale bwa mwishimba bukile bungi butaale booso bwatudi balombeene kupeta. Bamo bakwetu be munkatshi mwetu mbapete buno butaale. N’obe namu we kwibupeta. “Butaale bw’Efile Mukulu” mbulombeene nkukwasha bwa kukambila nkalakashi yooso! Kulupila n’eshimba dyoobe dyooso ku milayilo ya Yehowa: “Twekalanga na katshim’a munda mwanda ami ne Efile oobe. Nakupa bukome, oolo nakukwasha.”​—Yeeshaya 41:10.

BUTAALE BWA MWISHIMBA ABUTUUKILA MU EYI DY’EFILE MUKULU

5. Eyi dy’Efile Mukulu di nkukwasha bwa kupeta butaale bwa mwishimba naminyi?

⁵ Mushindo wa kabidi wa kupeta butaale bwa mwishimba nkubadika na kunangusheena pa ma verse a mu Bible. Bwakinyi kukita bino kwi na muulo? Bible nyi Eyi dy’Efile Mukulu. Mu Bible mwi malango ebuwa na aakwasha, abetupa kwi Mupangi eetu. Mpa na nsaa yoodi na twinyongoshi, we kunangusheena ngofu ku binangu by’Efile Mukulu na kunangusheena bilombeene nkunyingisha malango aaye. Kukita bino nkulombeene nkukwasha bwa kukambila na kusuuka twinyongoshi. Yehowa baadi muleeshe kwipusheena kwi pankatshi pa kubadika Eyi dyaye na ‘kwikala mukankamane na munyingy’eshimba’ na kuleka ‘kutshina na kwitshobôla.’​—Yooshwa 1:7-9, EEM.

6. Mayi a Yesu e nkukwasha naminyi?

⁶ Mwiyi dy’Efile Mukulu, abaleesha kipaso kibaadi Yesu esamba na bantu. Abaadi abakumina kumuteemesha mwanda mayi aaye abaadi aasamba bantu na kwibataadisha mashimba, bikishekishe baaba abaadi babofule na be na twinyongoshi. (Badika Mateo 11:28-30.) Yesu baadi etuulu pa mbalo ya bantu. (Maako 6:30-32) Nka bu bibaadi mulee bwa kukwasha batumiibwa baye abaadi abende naye mu nyendo, Yesu etukwasha mpa n’atwe lelo uno. Tabitungu nka twikale mbalo imune na Yesu bwadya kwitukwasha nya. Bu byadi Nfumu eetu e mwiyilu, Yesu ayididiila na kwituleesha kifulo. Byabya nsaa yoodi na twinyongoshi, ikala mushinkamishe’shi ekala peepi noobe bwa nkukwasha pa nsaa ilombane. Bu by’etupa lukulupilo na kwitunyingisha, bino abitukwasha bwa kukambila twinyongoshi.​—Beena-Ebelu 2:17, 18; 4:16.

NGIKASHI AYITUUKILA KU KIKUDI KY’EFILE MUKULU

7. Kikudi kiselele ky’Efile Mukulu akitukwashaa naminyi?

⁷ Yesu betulayile’shi Nsheetu aketupa kikudi kiselele su tubamutekye kyanka. (Luka 11:10-13) Uno mushindo wa kasatu wa kukambila twinyongoshi wi kwitukwasha naminyi? Kikudi kiselele ky’Efile Mukulu, sunga bukome bwaye bukitshishi, abwitukwasha bwa kwikala na ngikashi ibuwa i n’Efile Mukulu eetu sha bukome booso. (Beena-Kolose 3:10) Mu Bible, ino ngikashi mbeyitanyine bu ‘kikuba kya kikudi.’ (Badika Beena-Ngalatea 5:22, 23.) Nsaa yatutamisha ino ngikashi ibuwa, kipwano kyetu na bangi akitama, na atukasuuku myanda yooso ilombeene kwitupa twinyongoshi. Tubandeyi kutala kipaso kilombeene kwitukwasha kikudi kiselele mu ino myanda.

8-12. Kikuba kya kikudi ky’Efile Mukulu nkilombeene nkukwasha naminyi?

⁸ “Kifulo, muloo, butaale.” Nsaa yoneemeka bangi, twekala na twinyongoshi twi bungi nya. Mu kipaso kinyi? Su bwekala na kifulo kya bana na bana, kifulo kikata, na kwibapa kineemo, we kusuuka myanda ibungi ilombeene nkupa binangu bibubi bu nsungu, na twinyongoshi. Bino abikukwasha bwa kulama butaale na bangi.​—Beena-Looma 12:10.

⁹ “Lwishinko, kalolo, buwa.” Bible amba’shi: “Ikalayi na kalolo ku muntu na muntu, ikalayi na kifulo, elekyesheneyi bito ku muntu na muntu.” (Beena-Efeso 4:32) Patulondo dino elango, atwikala mu butaale na mu kipwano kibuwa na bangi, na atukasuuku myanda ilombeene kwitupa twinyongoshi. Dingi, abiketubofwila bwa kupudisha bilumbu abituuku munkatshi mwetu pa mwanda wa kukutwa kupwidika.

¹⁰ “Lukumiino.” Myanda ayikamba kwitwinyongosha lelo uno ngya makuta na bintu bya ku mbidi. (Nkindji 18:11) Twi kusuuka twinyongoshi atutuukila ku ino myanda naminyi? Abitungu tulonde elango dya Mpoolo mutumiibwa pa ‘kusepeela na byatudi nabyo.’ Kwikala na lukumiino lwibukopo mwi Yehowa akwitukwaha bwa kukulupila’shi etulombeesha nkalo yetu yooso. Mmwitulee’shi: “Ntankakuleka sunga nkusumbushena.” Ngi bwakinyi twi kwakula nka bu Mpoolo’shi: “Yehowa byadi mukwashi ande, ntantshinyi kintu su nkimune; kilombeene kunkitshina muntu nkinyi?”—Beena-Ebelu 13:5, 6. 

¹¹ “Kufukama, butontshi bwa mbidi.” Banda kunangushena bilombeene nkukwasha eyikashi dya kufukama na butontshi bwa mbidi. Ino ngikashi ayikakukwasha bwa kupela kukita sunga kwakula myanda ilombeene nkwinyongosha, na okapete masanka ebungi su bokatusha ngikashi bu “bukyelo, nsungu, kubwela (kulee), kukaana mulomo; na mushikwa.”​—Beena-Efeso 4:31.

¹² Abitungu wekale na kwiyisha bodya kukulupila mu “eyaasa dii bukome dy’Efile Mukulu” na ‘kumulubwila mpombo yoobe yooso.’ (1 Mpyeele 5:6, 7) Su we na kwiyisha, na kupopeela, Yehowa akakukwasha na nkupasukila. Nsaa youku kyoodi mulombeene kukita na kyoshii mulombeene kukita, tokekulupila obe nabeene nya. Okapeelesha twinyongoshi mwanda okatuulu lukulupilo loobe mwi Yehowa.​—Mika 6:8.

“TANWIKALANGA NA KATSHIM’A-MUNDA”

13. Yesu baadi adidi kwamba kinyi bapakwile’shi: “Tanwikalanga na katshim’a-munda”?

¹³ Mu mukanda wa Mateo 6:34 (badika), atwimupete elango dya Yesu adyamba’shi: “Tanwikalanga na katshim’a-munda nya.” Dino elango ndilombeene kwitwikeela bukopo bwa kwidifubila. Byabya Yesu baadi akyebe kwakula kinyi? Tubakatuka mu kulonga’shi Nfumu Daavide na Mpoolo mutumiibwa abaadi bapete twinyongoshi mu angi mafuku. Yesu tabaadi mwakule’shi muntu ooso afubila Efile Mukulu te bya kupeta twinyongoshi nya. Kadi, Yesu baadi mukwashe balongi baye bwabadya kuuka’shi kwinyongola mu myanda ya bisumanga sunga kwinyongola bikilekile takwi na muulo, na dingi tankulombeene kupwa nkalakashi nya. Atwikala nka atukalakashwa efuku dyooso, na dingi beena Kidishitu tambalombeene kwinyongola ngofu bwa mafuku apwe kukila sunga bwa mafuku aafiki nya. Elango dya Yesu di nkukwasha bwa kukambila twinyongoshi twibukopo naminyi?

14. Anka bu Daavide, mbikunyi byodi mulombeene kukambila twinyongoshi?

¹⁴ Ingi misuusa bantu abapetaa twinyongoshi pa mwanda wa bilubilo bibabakitshine kala. Abetopekaa bikata pabitale mwanda ubabadi bakite, aku namu takudi pangi bipwa bibungi. Angi mafuku Nfumu Daavide baadi mwinyongole pamwanda wa bilubilo byaye. Baadi mwakule’shi: “Eshimba dyande adinyengye, needidi.” (Misambo 38:3, 4, 9, 18) Mu wawa mwanda, Daavide baadi mukite kintu ki buwa. Baadi mukulupile’shi Yehowa amufwila lusa na kumulekyela. Yaya nsaa Daavide baadi mupushe muloo pa kuuka’shi Efile Mukulu bamufwila lusa.​—Badika Misambo 32:1-3, 5.

15. (a) Nkinyi dingi akitulongyesha kileshesho kya Daavide? (b) We kukita kinyi bwa kupeelesha twinyongoshi? (Tala kashibo akamba’shi: “Ingi mishindo ya kupeelesha twinyongoshi.”)

¹⁵ Ingi nsaa, we kwikala na twinyongoshi bwa myanda ibakukwata. Bu kilesheshe, nsaa ibaadi Daavide mufunde Misambo 55 baadi na moo wa kwipayibwa. (Misambo 55:2-5) Tabaadi mulekyele’shi twinyongoshi tumukutshishwe lukulupilo lwaye mwi Yehowa nya. Daavide baadi mwiyayile Yehowa bwa’shi amukwashe ku myanda yaaye, kadi baukile’shi bi na muulo kukita kintu kampanda pabitale mwanda waye. (2 Samwele 15:30-34) Ndilongyesha kinyi dibopete mu mwanda wa Daavide? Pamutwe pa kuleka’shi twinyongoshi tukukambile, kita bukopo bwa kupudisha wawa mwanda, na okulupile mwi Yehowa.

16. Kipatulwilo ky’eshina dy’Efile Mukulu ki kunyingisha lukumiino loobe naminyi?

¹⁶ Ingi nsaa mwina Kidishitu e kwinyongola bwa myanda yaadi mulombeene kufumankana nayo mu mafuku aafiki. Anka tabitungu kwikalakasha bwa myanda ishabandile kukitshika nya. Bwakinyi? Mwanda misango ibungi myanda tayikitshikaa nka byatwiyipwandikishanga nya. Na dingi, tentekyesha’shi ta kwi mwanda ukambile Efile Mukulu nya. Eshina dyaye adipushisha’shi “Yawa afwishaa.” (Efilu 3:14) Byabya tabitungu twikale atwikalakasha bwa myanda ayifiki, mwanda eshina dy’Efile Mukulu adileesha’shi mpàngo yaaye yooso bwa bantu ayikalombana. Ikala mushinkamishe’shi Efile Mukulu elelaa bafubi baaye basha lulamato myabi na ebakwashaa bwa kukambila twinyongoshi twa myanda ya mu mafuku ashaale, ya ano mafuku, na ya mafuku aafiki.

AKULA NA MUNTU OODI MUKULUPILE

17, 18. Kwisamba myanda yooso patooka kwi nkukwasha nsaa yoodi na twinyongoshi naminyi?

¹⁷ Mushindo wa kananka ulombeene nkukwasha nsaa yoodi na twinyongoshi, nkwikala wesamba myanda yooso patooka na muntu oodi mukulupile. Mulume sunga mukashi oobe, kuuku sunga loole a p’eshimba, sunga mukulu mu kakongye mulombeene nkukwasha bwa kupudisha mwanda oobe kalolo. Bible etulungula’shi: “Lukalakashi mwishimba dya muntu alumwinyongoshaa, anka eyi dya kalolo adimusangasha.” (Nkindji 12:25) Bible akula dingi’shi: “Mifubo ailwilaa bwa kukutwa kwa kwipeesheena binangu; pakudi baasha binangu beebungi, byooso abilumbulukaa.”​—Nkindji 15:22.

¹⁸ Bisangilo byeetu bya mu kakongye abitukwashaa dingi bwa kukambila twinyongoshi. Mu bisangilo byooso bya ku lubingo, okishaa nsaa pamune na bakwenu balume na bakashi, abakupasukila na abakumina nkunyingisha. (Beena-Ebelu 10:24, 25) Kuno ‘kwinyingisheena kwa pamune’ akukunyingisha na nkubofwisha bwa kukambila twinyongoshi tooso.—Beena-Looma 1:12.

NYINGISHA KIPWANO KYOBE N’EFILE MUKULU

19. Bwakinyi we mulombeene kushinkamisha’shi kipwano kyobe n’Efile Mukulu akikunyingisha?

¹⁹ Ungi mukulu a mu Canada balongyele muulo wa kusumbwila Yehowa twinyongoshi twaye. Baadi na mudimo aumupa twinyongoshi twibungi. Baadi na mudimo wa bulongyeshi na dingi baadi apa balongi malango, aku nyi baadi na maladi abaadi aamwinyongosha ngofu. Nkinyi kimukwashe bwa kunyingiila? Kya kumpala, etatshishaa ngofu bwadya kunyingisha kipwano kyaye na Yehowa. Bakuuku bebuwa mbamukwashe dingi mu mafuku abaadi na nkalakashi, na esambaa na mukashi aaye myanda yooso pa butooka pabitale byakwete kupusha. Kunyima kwa byabya, bakulu naye na mukunkushi a kifunda abamukwashishe bwadya kumona mwanda waye abiumonaa Yehowa. Akupu, munganga bakwashishe uno mukwetu bwadya kuuka kalolo bi mukumbo waye, aye nkukita mwaye mooso bwa kupeelesha midimo yaye na kupeta nsaa ibungi ya kwikisha na kukita kalashishi ka mbidi. Ku kapeela kapeela, balongyele bya kupudisha myanda yaye na kukambila binangu bibubi. Paadi na mwanda umukambile, atuulaa lukulupilo lwaye mwi Yehowa’shi amukwasha.

20. (a) Twi kusumbwila Yehowa twinyongoshi twetu naminyi? (b) Mu mwisambo aulondo atukalongo kinyi?

²⁰ Mu uno mwisambo, tubalongo muulo wa kusumbwila Efile Mukulu twinyongoshi twetu pa kubadika Eyi dyaye na kunangusheena pa myanda yatubadika. Tubalongo dingi’shi abitungu twikale atulekye kikudi kiselele kya Yehowa bwakidya kwitukwasha, twikale atulungula muntu atudi bakulupile myanda yeetu, na twikale na kyubishi kya kutwela mu bisangilo bya beena Kidishitu. Mu mwisambo aulondo, atukalongo abitukwashaa Yehowa pa kwitupa lukulupilo lwa kwitupa bwedi.​—Beena-Ebelu 11:6.