1 | Luteko: “Munyenyekyeyi myanda yooso ayinukalakasha”

BIBLE AMBA’SHI: ‘Munyenyekyeyi myanda yooso ayinukalakasha, mwanda nnê kwete kwinupasukila.’—1 MPYEELE 5:7, EEM.

Ki’abipatuula

Yehowa etutekie buatudia kumulungula muanda ooso aukalakasha binangu bietu na mashimba eetu. (Misambo 55:23) Bua kuteka, t’abitungu’shi muanda wikale ukata sunga upeela nya. Su mianda i na muulo kuatudi, i na muulo na kui Yehowa. Muanda Yehowa etupasukilaa, na apasukilaa mushindo w’atuipusha. Kumuteka nyi etabula di na muulo bua kupeta butaale mu binangu.—Bena-Fidipe 4:6, 7.

Mushindo ulombene bino nkukuasha

Nsaa yatukuete kunyingiila lukalakashi lui mu binangu bietu, atukambaa kuipusha bupenka. Bangi bantu t’abakambaa kuuka kiinyi ki’atupusha nya. (Nkindji 14:10) Anka, nsaa y’atulungula Efile Mukulu bi’atupusha mu luteko n’eshimba dietu dioso, misuusa yooso etuteemesha na kalolo kooso na kupusha bi’atuipusha. Yehowa etumonaa, auku kukienga kuetu na kunyingiila kuetu, na akumiina’shi tumutekie pabitale muanda ooso awitukalakasha.—2 Myanda 6:29, 30.

Kulungula Yehowa mianda yetu mu luteko, akunyiishaa kunyingisha kishinkamiisho kietu kia’shi etupasukilaa. Tui kuipusha nka bu bibepushiishe mufundi a misambo batekiele’shi: “Ne na mulô na kusangala pa mwanda wa kifulo kyobe. Bomono bi malwa ande, bweuku bi kufwambuka kwande.” (Misambo 31:8, EEM) Penda kuiwuka’shi Yehowa amonaa kiakia akitukalakasha, mbilombene kuitukuasha ngofu buatudia kumona bia kukila na kino kipungo ki bukopo. Anka akitaa bi bungi kushi nka penda kumona kenyongoshi ketu. Aye mukile bantu booso, aukaa mianda yooso y’atudi nayo na kuitukuasha bua’shi tupete kusambibua na kunyingishibua akutukila mu Bible.

Bikuete Bible kukuasha Julian

Bukitshishi buinabo kenyongoshi kuandi

“Naadi nanyingiila kenyongoshi na lukalakashi lua mu binangu lui bukopo. Kano kenyongoshi kabaadi akankalakasha nka nsaa yooso. Ingi nsaa nepusha biya, ingi namu nepusha ne na nsungu kushi muanda. Naadi nakamba kufiita munda nsaa yandi munkatshi mua bangi bantu. Bibaadi abinyiisha kunkalakasha pa naadi nanangushena’shi be kunangushena kinyi pa bintale.

“Ba kuuku bande babaadi abawuku kenyongoshi kande, babaadi abekitshisha bua kunkuasha. Ne mufikie mu kumona’shi ingi nsaa, mianda ibaabadi abakula ta ibaadi ayinkuasha nya. Anka ne na lutumbu lukata bua bibaabadi abekitshisha bua kunkuasha.

“Ingi nsaa, kenyongoshi kande na lukalakashi lua mu binangu lui bukopo bibaadi abinkutshishua bua kuteka. Bibaadi abintekie kuikitshisha kukata kua mu binangu buandia kutuula binangu ku kiandungula Yehowa mu luteko. Binangu biande bibaadi abinkumbakana, ami e na aki kinangu, nasamuka ntandi mu kingi, napete kabulakanyi mu mutue. Nsaa yanshi na binangu bishaale, abingielaa bukopo bua kupatuluila Yehowa ki’anangushena na bia nepusha.”

Binkuashe Bible

“Mu kulonga kua Bible ne mumone’shi, kuela kua nteko t’akutekaa nka kuakula bi bungi, sunga kulongamisha bishima bua’shi Efile Mukulu eyipushe nya. Ingi nsaa, nsaa yanshi na mushindo wa kuakula bia nepusha, natekaa penda’shi: ‘Yehowa nkuashe namu.’ Sunga mbiabia, nauku’shi Yehowa ampushaa na angaluulaa ku kiandi nakio lukalo yaaya nsaa. Kukatusha kuteka, nebukishaa. Ne na muloo wa kuamba’shi ne na lutumbu lukata bua ino nsulo yooso ibidi ya bukuashi, ne mupue kupanda. Sunga bibaadi abintungu kuikitshisha kukata bua kuteka Nshami e muiyilu bukuashi, naadi namutekie nka buanka, muanda naadi mushinkamishe’shi mmufule na akumiina kunkuasha.”