Oukanga uno mwanda su?

Bwakinyi Yesu badi mukandjikye kwela kwa mutshipo?

MIIYA ya Moyiise ibadi ipe bantu matalwa a kwela ingi mitshipo pa kwakula shi, “natshipi kodi na bi Efile Mukulu” sunga shi, “natshipi mwishina dya Yehowa.” Byabya, kwela kwa mitshipo kubadi kupalakane mu mafuku a Yesu, bibadi abitakula bena Yunda bwa kwela mitshipo ku mwanda oso wabakula. Abadi abakitshi bino bwa kunyingisha mayi abo; anka, Yesu badi mutopekye kino kikitshino kibubi misusa ibidi. Bambile shi: “Nguba aanwakula, ambaayi’shi: “oolo” sunga’shi: ‘Nya.”​—Mateo 5:33-37; 23:16-22.

Muyiile mukanda wa Kipatulwilo kya bishima bya mu Kilombeno kipya (mu Anglais) mukanda wa Talmud awitukwasha bwa kumona bibadi bena Yunda na kyubishi kya kwela mitshipo shi mayi abo nga binyibinyi. Bino byoso mwanda wa Talmud apatula kantu pa kantu mutshipo ubadi atungu kulama na ushibadi autungu kulama.

Ta nka penda Yesu nyi badi mutopekye kino kikitshino kibubi nya. Kileshesho, ungi muntu atalaa myanda ya kala ya bena Yunda abetamina bu Flavius Josèphe bafundjile pabitale kisaka kya bena Yunda kibadi akipele kwela mutshipo. Bena kino kisaka abadi abakumiina shi kwela kwa mitshipo kubadi bubi kukila kudimba. Abadi abapusha shi su muntu akyebe kwela mutshipo bwashi bangi bamukumiine, yawa muntu ekala sha madimi. Bifundwe bya kala bya bena Yuuda byabetamina bu Siraside sunga bu Ecclésiastique, (23:11) abilesha shi: “Muntu atshipi kwete kutupilwa miiya.” Yesu badi mutopekye kwatanga kwa mutshipo na muulo upela. Su atwakula bya binyibinyi nsaa yoso, tatwikala na kya kwela mitshipo bwashi bantu bakumine byatwakula nya.