Fuba na Site eetu a Internet bwa kulongyesha baana boobe
1. Mbalo i mu site eetu a Internet yabadi bafunde shi “Enfants” i kwanka bwa kinyi?
1 Site eetu a jw.org, mukitshibwe bwa kukwasha bantu bakulu na bakinga. Mbalo i mu site eetu a Internet yabadi bafunde shi: “Enfants” (twela pa mbalo yabadi bafunde shi: “La Bible et vous > Enfants”) ayikwasha baana na baledi baabo bwabadya kunyingisha kipwano kyabo mpa na Yehowa. (Miy. 6:6, 7) Mushindo kinyi oodi mulombeene kufuba na myanda i mu ino mbalo bwa kulongyesha baana boobe?
2. Mushindo kinyi oodi mulombeene kusangula myanda ya kulonga na baana boobe?
2 Fuba naye mupunda lukalo: Mwana ooso e na yaaye nkalo. (1 Kod. 13:11) Byabya, mushindo kinyi oodi mulombeene kusangula myanda ya kulonga na baana boobe muyile bipwa byaabo? Eyipushe bino: Nkinyi kilombeene kusangasha baana bande? Myanda bungi kinyi yabadi balombeene kupusha? Mbalombeene kukisha nsaa inga na kulonga? Baana bee na bipwa bisatu sunga muushi, wekwisamba nabo myanda i mu mbalo yabadi bafunde shi “Comptines bibliques.” Bifuko bibungi abisangeela myanda i mu kipindji kyabadi bafunde shi “Enseignez vos enfants.” Nutaluule dingi myanda i mu bingi bipindji abilondo.
3. Mushindo kinyi ulombeene baledi kufuba kalolo na myanda ya kulonga na baana i mu mbalo yabadi bafunde shi: “Pour le culte familial”?
3 Bwa lulangwilo lwa mu kifuko: Myanda i mu mbalo yabadi bafunde shi: “Pour le culte familial” ayikwasha banfumu ba bifuko bwa kulonga na baana baabo. Bwa kuuka mushindo wakufuba na ino myanda ayitungu kulonga na baana, fina mu kashibo kabadi bafunde shi: “Télecharger” na obadikye “Guide des parents.” Fuba na bifwatulo bi mu mbalo yabadi bafunde shi: “Une image, une activité”, na kwibishinga dingi elangi bwa kulongyesha baana bakinga. Fuba na mbalo yabadi bafunde shi: “Apprends en t’amusant” bwa kukwasha baana batabadi bakulu. Mwanda ooso wi mu myanda ayitungu kulonga na baana wi na dilongyesha kapanda dya mu Bible, byabya, baana booso bakulu sunga bakinga mbalombeene kwisamba nsaa yanungo mu lulangwilo lwa mu kifuko.
4. Nkinyi kyatupete mu kipindji kya “Deviens l’ami de Jéhovah”?
4 Ikala kuuku a Efile Mukulu: Mu kino kipindji kya “Deviens l’ami de Jéhovah” mwi mbalo yabadi bafunde shi: “Vidéo, Chansons, na Activités.” Mwamwa mwi ma video, ngono, na myanda ya kukita ikumbeene kukwasha baledi bwa kulongyesha baana baabo bakii bakinga Eyi dy’Efile Mukulu. (Miy. 31:12) Video ooso a penda bifwatulo alongyesha mwanda kampanda wa muulo. Myanda ya kukita, bu kileshesho maasha a shi kimba-na-kutundula aalesha muulo wa ano malongyesha. Bu bi baana mbafule ngono—na ayikwasha baana bwa kukwatshiila myanda yabalongo—nsaa na nsaa, bakwete kwimwela ngono ya Bufumu ifundjibwe bwa baana.
5. Bwakinyi abitungu shi baledi batekye bukwashi bwa Yehowa bwa kulongyesha baana baabo bya binyibinyi?
5 Baledi, Yehowa akuminaa shi nwikala ba nsha-baana na ba nyina-baana be buuwa. Byabya, mutekyeyi bwashi enukwashe bwanudya kulongyesha baana beenu bya binyibinyi. (Bans. 13:8) Su okimba bukwashi bwa Yehowa, we mulombeene kulambukisha baana boobe bwashi bekale na “kyuukilo akifishanaa ku kipandjilo pa kukumiina mwi Kidishito Yesu.”—2 Tim. 3:15; Mye. 4:1-4.