Myanda yabadi bamone kwi bakwetu
◼ Australie: John, ungi mulongyeshi, baadi ende mu kipwilo pabaadi kii mwana mukinga kadi aye nkufika muntu apele shi Efile Mukulu tee kwanka. Ungi mbala-mashinda nkumulekyela broshire a La vie a-t-elle été créée? na pabafikile dingi kunyima aye nkumulekyela broshire a L’origine de la vie. Yawa mbala mashinda baadi atungunuka na kutamisha lukalo lwaye lwa kwabila ma jurnale apya na kusangula ingi miisambo ayakula pabitale bipangwa sunga matemuki a mu Bible. Pabaadi mwisambe na John, bakuminyiine, aye nkumupa mukanda wa La Bible: Parole de Dieu ou des hommes?; kunyima kwa kwiubadika, John babangile kwamba shi mukumbeene kutaluula pabitale kukumiina nwi Efile Mukulu. Yawa mbala-mashinda nkubanga kulonga naye mukanda wa Akilongyesha Bible, nkuleesha John paragrafe 8 e mwisaki 20 na paragrafe 13-16 i mwisaki 23-24. Ma verse abadi bateemune mu mikanda abaadi akemeshe John ngofu ndjo aye nkwamba shi: “Bwande’mi, ne na lukalo lwa kutadiila dingi Bible bwashi angukishe ingi myanda.”
◼ Mexique: Ungi muntu baadi mulungule ungi mulungudi a mukandu wibuwa shi, ta mulombeene kukumiina shi Bible mmufundjibwe ku mpàngo y’Efile Mukulu. Mulungudi a mukandu wibuwa nkubanga kumuleesha bishinkamiisho abileesha shi Bible mufundjibwe ku mpàngo y’Efile Mukulu. Kunyima kwa kwisamba, myanda ya mu Bible ibaadi mulongye ibaadi ikume eshimba dya yawa muntu. Nsaa ibaadi mulongye myanda itale miiya ya Yehowa, bibaadi bimukume kwishimba ngofu. Aye nkulungula mulungudi a mukandu wibuwa shi: “Kumpala, nsaa yobadikanga Bible, nakuminanga shi tubadikye booso pamune, abimweneka nka bu malango aatuukila mu ingi mikanga na tabinkumanga kwishimba nya. Kadi binobino nsaa yatubadika myanda i mwanka, bikishekishe malango atale mwikeelo wa muntu, eshimba dyande adinkalakasha ngofu.”
◼ États-Unis: Bu bibabadi batwele mu mudimo wa kulungula mukandu wibuwa mu bibundji bikata, bangi beena Kidishitu beyibakisheene abaadi bafumankane na ungi mwana mukashi a mu Taiwan baadi akumiina mwi Efile Mukulu kadi apele shi Bible nyi mukanda wa bantu ba ku Mputu. Baadi mufikye pa mbalo yabo yababadi batuule mikanda mwanda baadi emono bu’ye mushimishe sunga mbibaadi na muuwa. Baadi akulupila shi Bible mulombeene kumukwasha bwa kwikala na mpàngo ibuwa mu muuwa waye. Baaba beena Kidishitu beyibakisheene nkubanga kulonga naye mukanda wa Akilongyesha Bible pamune na Broshire a La paix et le bonheur durables: comment les trouver. Pamutwe pa kulonga shapitre 2 a mukanda, abaadi balonye kipindji kya mu Broshire kii na mutwe wa mwanda awamba shi: “Un guide bénéfique pour tous les humains.” Kunyima kwa kutaluula paragrafe isamombo ya kumpala ya mu kyakya kipindji, yawa mwana mukashi nkwakula na kukaanya shi Bible mwilekene na ingi mikanda ya bipwilo. Kunyima kwa kutaluula matemuki a mu Bible abaadi alombane, bakwile shi: “Tampwandikisha shi nkulombeene kwikala ungi mukanda aupushika kalolo bu uno, uno wikadikye Bible!”
◼ Japon: Sunga mbibaadi sha-nshibo mulungule ungi mulungudi shi tamukumiine mwi Efile Mukulu, baadi mutungunukye na kwenda mu nkamutala bwa kapindji kapeela, na kwisamba naye pa miisambo i mu Réveillez-vous! i na mutwe wa mwanda awamba shi: “Hasard ou conception?” Kapelakapela, muntu nkushintuula mweneno aaye na nkubanga kukumiina shi nkulombeene kwikala Mupangi. Binobino mmukumiine shi Mupangi e kwanka, na mulungudi kwete kulonga naaye Bible ku bukwashi bwa broshire a Mukandu wibuwa w’Efile Mukulu!
◼ Canada: Ungi mukwetu baadi bapeele ungi mwana mukashi jurnale mupya baadi mushale kwaye ku nshibo na baadi atambuka nka mu motoka waye. Nsaa ibaadi yalukiile mukwetu mukashi mu nkamutala, yawa mwana mukashi nkumulungula shi takumiina kwisamba yaaya myanda na ta mukumiine mwi Efile Mukulu. Mukwetu mukashi tabakuminyine kumuleka nya kadi baadi mumupe broshire a Une vie pleinement satisfaisante: comment? Nsaa ibafikile yawa mukwetu asangana yawa mwana mukashi ku nshibo, mukwetu mukashi bamulungwile shi, sunga mbyauku shi mwana mukashi ta mulombeene kukumiina mwi Efile Mukulu, baadi anangusheena byabya mwanda mukwetu mukashi baadi auku shi baadi muledi akusha baana bupenka. Aye nkuleesha yawa mwana mukashi paragrafe 6 e mwisaki 4 dya broshire, aleesha mbalo ya kupeta malango ebuwa. Ndjo aye nkumunyingisha bwa kubadika malango e mu elongyesha 2 adiisambila pabitale kukusha kwa baana. Yawa mwana mukashi baadi musangale ngofu bwa kwata yawa broshire.