Kwasha baaba bashaabandile kwikala peepi bwa kulonga mukanda wa Akilongyesha Bible
1. Mukanda wa Akilongyesha Bible ukwete kusangasha muntu ooso su? Patuula.
1 Bwashi muntu ekadikye mulangwidi a Yehowa, abitungu abande kulonga akilongyesha Bible. Byabya, bangi bee mu bipwilo bishii bya bwina Kidishitu na tabakwete kukumiina Bible bu Eyi dy’Efile Mukulu nya. Bantu bebungi tabakwete kukumiina mwi Efile Mukulu mu myanda yooso, na abamonaa Bible bu mukanda wa bisumanga. Mikanda kinyi i kwanka bwa kukwasha baaba bash’abakumiina mukanda wa Akilongyesha Bible. Ino myanda ayilondo ngimeene pa myanda yabadi baleeshe kwi balungudi ba mu maumbo 20.
2. Su muntu etulungula bwakinyi takumiina mwi Efile Mukulu, nkinyi kilombeene kwitukwasha bwa kushinguula kyakwila byabya, na bwakinyi?
2 Baaba bashy’abakumina mwi Efile Mukulu: Su muntu aamba shi takumiina mwi Efile Mukulu, bibuwa kuuka bwakinyi akula byabya. Mpa mwanda wa shi mmukumiine mu evolisio? Mmushimishe lukumiino mwi Efile Mukulu pa mwanda wa kukutwa kwa kululama kwi mu nsenga sunga pa mwanda wa bulamalama bwa bipwilo? Mmushaale pa mbalo i bantu bash’abakumiina mwi Efile Mukulu? Pangi auku shi Efile Mukulu e kwanka, kadi tee na lukalo lwa kukumiina Mwadi nya. Balungudi bebungi ba mukandu wibuwa mbasangane kwipusha muntu shi: “Uno mmweneno ndjo wekadikaa naye mafuku ooso su?” akutakula muntu bwadya kwipatuula. Muteemeshe na tokumanga kumutshiba. Nsaa yatushinguula bwakinyi yawa muntu takwete kukulupila mwi Efile Mukulu, atukyebe kuuka mushindo wa kumwaluula na mukanda yatudi balombeene kumupa.—Mye. 18:13.
3. Mushindo kinyi watudi balombeene kuleesha kaneemo bwa muntu na myanda itale lukumiino lwaye?
3 Nsaa yokwete kwalula, tokumanga kukita bwashi muntu amone shi okwete kutopeka mmweneno aaye. Ano mayele akufuba nawo aafiki mu États-Unis ngalombeene kwitukwasha: “Bii na muulo kunemeka bulungantu bwa muntu bwa kusangula myanda yaadi mulombeene kukumiina. Pamutwe pa kukimba bya kumukambila, bibuwa kumwela nkonko ayimutakula bwa kunangusheena na bwashi aye nabeena aate kitshibilo.” Kunyima kwa kuteemesha sha-nshibo nsaa yakwete kwakula, ungi mukunkushi a kifunda misusa ibungi baadi aluula na lukonko lwa shi: “Tobonangusheneene namu mu uno mushindo su?”
4. Mushindo kinyi watudi balombeene kukwasha ba bouddhistes?
4 Mwanda w’Efile Mukulu wi bu mwanda wenyi kwi ba bouddhistes bebungi. Bangi balungudi ba mukandu wibuwa ba mu Grande-Bretagne abafubu na broshire a La paix et le bonheur durables: comment les trouver nsaa y’abalambukisha baaba bantu. Kunyima kwa kutaluula mayi a mbangilo, abesambila mu kipindji kii na mutwe wa mwanda awamba shi: “Existe-t-il vraiment un Créateur Très-Haut?” akupu abataluula kipindji kii na mutwe wa mwanda awamba shi: “Un guide bénéfique pour tous les humains.” Ku mongo, mbalombeene kubanga mukanda wa Akilongyesha Bible na kulungula sha-nshibo shi: “Sunga mbyoshokumiina mwi Efile Mukulu, kulonga kwa Bible kwi na mwabi mwanda e na malango a binyibinyi.” Ungi Mbala-mashinda a mu États-Unis baadi mufube mbalo ibaadi ishaale beena Chine aakula bino: “Bantu bebungi ba mu teritware eetu abasangeelaa kubadika. Byabya, misango ibungi ababadika mukanda ooso ushima kumpala kwashi twalukiile mu kwibatala. Kadi tambalombeene kupusha bwakinyi abintungu kulonga Bible. Byabya, nemulombeene kwibapa broshire a Mukandu wibuwa bwa musango wa kumpala wa kwisamba nabo mwanda mbamufunde mu mushindo aunyingisha mwisambo.” Mukunkushi a kifunda a mu ludimi lwa ki chinois mu États-Unis aleesha shi mbibofule bya kubanga mukanda wa Akilongyesha Bible bwa musango wa kumpala wanubanga mwisambo. Byabya, mbilombeene kwikala bibuwa bwa kubanga kulonga mu shapitre 2, abanga kwisambila pabitale Bible, pamutwe pa kubanga mu shapitre 1, esambila pabitale Efile Mukulu.
5. Bwakinyi lwishinko lwi na muulo?
5 Abitungu kwikala na lwishinko bwa kukwasha muntu bwa kutama mu lukumiino mwanda abitungu nsaa ibungi. Mwisambo wetu wa kumpala ta ngulombeene kutakula muntu mu kukumiina shi Mupangi e kwanka nya. Kadi pangi munda mwa mafuku ebungi mbilombeene kwikadika bibofule sunga shi mmulombeene kuleesha bwakinyi bashinkamisha akikuminyinaa bangi bantu byabya.
6. Bwakinyi bangi bantu mbalombeene kukutwa kuleesha lukulupilo mu Bible?
6 Baaba bashii na lukalo sunga kukutwa kwa kukulupila mu Bible: Byabya, misusa ibungi, muntu mulombeene kushinguula shi Efile Mukulu e kwikala kwanka kadi tasangeela myanda ayilongyesha Bible mwanda kwete kupela shi Bible ta Eyi dy’Efile Mukulu. Pangi mmushaleele mbalo i bantu bashii beena Kidishitu abasanga Bible na bwina Kidishitu bwa madimi. Sunga shi mmushaale pa mbalo ipalakane bwina Kidishitu bwa madimi na tamulombeene kunangusheena shi Bible mmulombeene kwikala na muulo bwaye. Mushindo kinyi watudi balombeene kukwasha baaba bantu bwa kwikala na lukalo lwa kuuka bi mu Bible na kukumiina kulonga mukanda wa Akilongyesha Bible?
7. Mushindo kinyi wibuwa kukaka binangu bya muntu alesha lukalo ku Bible?
7 Biro bya filiale a mu Grèce bibaadi bifunde bino: “Mushindo wibuwa wa kukwasha bantu bashy’abakumina Bible nka penda kubuula Bible na kwibalesha myanda i mwanka. Balungudi bebungi mbamone shi bukitshishi bwinabo mukandu wi mu Bible mwishimba dya muntu, bwi na bukome kukila kyooso kilombeene muntu kwakula aye nabene. (Eb. 4:12) Kumona eshina dy’Efile Mukulu mu Bible nkukwashe bantu bebungi bwa kupeta lukalo lwa kutaluula myanda i mu Bible.” Biro bya filiale bya mu Inde bibaadi bifunde shi: “Bya binyibinyi pabitale muuwa na lufu mbikakye binangu bya ba Hindous bebungi—mpa na bitale mwanda wa nsenga ishii ntondo dingi.” Muyiile myanda i mu ma mbalo elekenelekene, ayikwasha balungudi ba mukandu wibuwa bwabadya kupatuula shi Bible aleesha shi, Bufumu bw’Efile Mukulu abukyebe kulumbuula ino myanda yooso.
8. Nkinyi kyatudi balombeene kwakula kwi baaba be na mmweneno ebubi pabitale Bible pa mwanda wa bwina Kidishitu bwa madimi?
8 Su ungi muntu e na mweneno ebubi pabitale Bible mwanda wa bwina Kidishitu bwa madimi, abitungu tumuleeshe shi bwina Kidishitu bwa madimi mbwaluule myanda ya mu Bible na malongyesha aabo. Biro bya filiale mu Inde mbifunde bino: “Binobino, twi na lukalo lwa kukwasha bantu bwa kumona shi bipwilo ta mbikadikye bu ba ndami ba Bible nya.” Abaleesha shi ba Hindous abakeme kipindji kya 4 kya broshire a Quel est le but de la vie? Comment le découvrir?, akipatuula mushindo wi bipwilo abitompo kulwisha na kushimisha Eyi dy’Efile Mukulu. Ungi Mbala-mashinda a mu Brésil alungula bantu shi: “Bwakinyi tanukuminaa kuuka bibungi pabitale myanda ya mu Bible? Bantu bebungi abakuminaa kwiyishinguula kalolo, kushii kutshina kipwilo sunga nkimune. We mulombeene kukema pabitale myanda ibolongo.”
9. Bwakinyi tatwi balombeene kukooka su muntu ta muleeshe lukalo lwa kulonga bwa musuusa wa kumpala ku abilongyesha Bible?
9 Yehowa ataluulaa eshimba dya muntu ooso. (1 Sam. 16:7; Mye. 21:2) Kwete kukaka baaba be na mashimba alulame ku lulangwilo lwa binyibinyi. (Yo. 6:44) Bangi bantu bebungi tambabande kunangusheena pabitale Efile Mukulu sunga kwikala na kiukilo kipeela kya mu Bible. Mudimo wetu awibapa mwabi wa ‘kupanda, na kufika ku kyuukilo kya binyibinyi.’ (1 Tim. 2:4) Byabya, su bangi ta mbakumiine kubanga kwisamba nobe malongyesha a mu Bible, tokokanga! Fuba na mikanda i mu ludimi loobe bwa kukaka binangu byabo. Ku nfudiilo, we mulombeene kukita bwashi okaashe mwisambo mu mukanda wetu wa kumpala bwa kubanga kulonga naye Bible, mu mukanda wa A nkinyi akilongyesha namu Bible?
[Kashibo ke mwisaki 4]
Su sha-nshibo aamba shi ta mukumiine mwi Efile Mukulu, tompa kukita bino:
• Mwipushe shi: “Onangusheena misusa yooso nka bino?” bwa kushinguula bwakinyi.
• Su Bouddhiste, fuba na broshire a La paix et le bonheur durables: comment les trouver, esaki 9-12.
• Su akumiina shi bintu mbituukile, ino mikanda na video bii kuushi mbilombeene nkukwasha:
Miisambo ii mu Réveillez-vous! ii na mutwe wa mwanda awamba shi “Hasard ou conception?”
Video a Les merveilles de la création révèlent la gloire de Dieu
Ma broshire bu Une vie pleinement satisfaisante: comment? kipindji kya 4; La vie a-t-elle été créée?; na Cinq questions à se poser sur l’origine de la vie
• Su mmushimishe lukumiino mwi Efile Mukulu pa mwanda wa kukutwa kwa kululama na makyenga, ino mikanda ayilondo ngilombeene nkukwasha:
Shapitre 10 a mukanda wa Y a-t-il un Créateur qui se soucie de vous?
Kipindji 6 kya broshire a Dieu se soucie-t-il vraiment de nous?, kipindji 6, na a Quel est le but de la vie?
• Bwa kukatuka mu wawa ungi mukanda bwa kutwela mu Akilongyesha Bible anka nsaa ibashinguula sha-nshibo shi Efile Mukulu e kwanka. Mbilombeene kwikala bibuwa kubanga naye mu shapitre 2 sunga ungi mwisambo ulombanyinyine bwaye.
[Kashibo ke mwisaki 5]
Tompa kwakula bino su muntu ta mukumiine Bible:
• Taluulayi shapitre 17 na 18 ya mukanda wa La vie: comment est-elle apparue? Évolution ou création?
• Bwa ba Hindous, fuba na broshire a Pourquoi adorer Dieu en amour et en vérité?
• Bwa beena Yuuda, fuba na broshire a Connaîtrons-nous un jour un monde sans guerre?, masaki 3-11.
• Talulaayi myabi ya kulonda miiya ya mu Bible. Mikanda yoodi mulombeene kufuba nayo bwa kuleesha muntu muulo wi nawo Bible:
Miisambo i mu Réveillez-vous ! i na mutwe wa mwanda awamba shi: “De l’aide pour les familles”
Video a La Bible—une force dans votre vie
Broshire a Mukandu wibuwa w’Efile Mukulu!, malongyesha 9 na 11; a Un livre pour tous, esaki 22-26; na kipindji 2 kya broshire a Une vie pleinement satisfaisante: Comment?
Bwa ba bouddhistes, fuba na broshire a La voie qui mène à la paix et au bonheur, esaki 3-7.
Bwa ba musulmans fuba na broshire a La vraie foi: le chemin qui mène au bonheur, mu kipindji 3.
Su okwete kulambukisha mu ma mbalo mwabadi na ntondo ya Bible, mbilombeene kwikala biiya kushii kuleesha shi we mwiatshile mu Bible kadi we mulombeene kumuleesha shi ano mayi we mwiate mu Bible kunyima kwa kwisamba naye misango ibungi.
• Patuula mushindo wi matemuki a mu Bible shi nga binyibinyi. Mikanda yoodi mulombeene kufuba nayo ngino:
Video a La Bible: un récit historique exact, des prophéties dignes de foi.
Broshire a Un livre pour tous, esaki 27-29
• Bwa kutwela mu Akilongyesha Bible anka nsaa i muntu ayipusha akilongyesha Bible mu myanda ilekeenelekeene.
[Kashibo ke mwisaki 6]
Su muntu amba shi: “Tankumiina mwi Efile Mukulu,” we mulombeene kwakula bino:
• “Ne mulombeene kukuleesha mu kikoso kibaadi kinkwashe bwa kukumiina shi kwi Mupangi?” Paapa, esambe naye myanda i mu mukanda wa Comment raisonner, esaki 84-86, sunga kwata mpàngo ya kupa muntu mukanda osangeela kubadika.
• “Kadi su Efile Mukulu e kwanka, omono shi mmulombeene kwikala mushindo kinyi?” Ba sha-mashibo bebungi abaluula shi mbalombeene kwifubwila peepi n’Efile Mukulu a kifulo, kululama, na lusa, aye shii mukutwe ntondo. Muleeshe mu Bible shi, Efile Mukulu e na ingi ngikashi. (Mbilombene kwikala bibofule bwa kufuba na shapitre 1 a mukanda wa Akilongyesha Bible, kubanga mu paragrafe 6.)
Su muntu amba shi: “Tankumiina Bible,” we mulombeene kwakula bino:
• “Kwi bantu bebungi be na yawa mmweneno. Bangi abanangusheena shi mu Bible ta mwi myanda ya siyanse nya sunga shi miiya ya mu Bible tayikapu. Banda kundungula, tobobadikile Bible su? [Mutadiile aluule. Akupu muleeshe mayi a mbangilo e mwisaki 3 dya broshire a Un livre pour tous, omupe broshire.] Bantu bebungi bakwete kubepuula Bible mwanda bipwilo bikwete kulwisha malongyesha a mwanka. Ingi nsaa ne mulombeene kutuusha kileshesho kii mwisaki dya 4 na 5.”
• “Bantu bebungi be na mweneno e bii oobe. Ne mulombeene nkulesha kintu kampanda kibaadi kinkanyishe pabitale Bible su? [Badika Yoobo 26:7 sunga Yeeshayi 40:22.] Bible e na ingi myanda dingi ilombeene kukwasha bifuko. Musango aufiki nakumiina nkulesha kileshesho.”
• “Nakutumbula poobe kundungula byabya. Su Efile Mukulu afundjila bantu mukanda, omono shi mmulombeene kwimufunda myanda kinyi?” Akupu oleeshe muntu mwanda autuukila mu Bible wipusheene na myanda yanwisamba.