Trakte ipya ayitusangasha!
1. Mbintu kinyi bya kufuba nabyo mu mudimo wa bulungudi abitusangasha?
1 Trakte itano ipya yabekalanga batuushe ku kikongeno kya distrike 2013 kii na mutwe wa mwanda awamba shi: ‘Eyi dy’Efile Mukulu ndya binyibinyi!’ Na dingi trakte a Mukandu wibuwa wa Bufumu No. 38 e na mutwe wa mwanda awamba shi: “Bafwe be kwikala dingi na muwa?” mbamukumbashe ku ino trakte itano. Ino trakte yooso isamombo ngipya na ayitusangasha. Bwakinyi mbeyituushe mu uno mushindo upya? Nsaa yatupa bantu ano ma trakte patudi mu bulungudi bwa ku nshibo na nshibo, mushindo kinyi watudi balombeene kufuba nayo kalolo muyiile mushindo wabadi bayituushe?
2. Bwakinyi mbatuushe ino trakte ipya?
2 Bwakinyi ngipya?: Bwa koobesha kukita kalolo mudimu wa bulungudi bwa ku nshibo na nshibo abitungu kulombasha ano mayele ananka: (1) Bwa kubanga mwisambo ipusha sha-nshimbo byapwandjikisha pabitale lukonko. (2) Muleeshe binangu bi mu Bible. (3) Epa sha-nshibo trakte bwashi abadikye. (4) Leka lukonko alutungu shi waluule mususa aufiki, na wepusheene naye bwashi walukiile mu nkamutala. Ino trakte ipya ayitukwasha bwa kulonda ano mayele ooso ananka kalolo.
3. Mushindo kinyi autungu shi tupe bantu ino trakte ipya mu mudimo wa bulungudi?
3 Mushindo wa kufuba nayo: (1) Kunyima kwa kwimuna muntu, muleeshe nkonko ilondeene i pa kipusu kya trakte bwashi asangule lumune, na omwipushe byapwandjikisha. (2) Buula trakte, na otaluule naye mbalo yabadi bafunde shi: “Akyamba Bible.” Badikayi verse mu Bible su kwi mushindo. Su sha-nshibo e na nsaa, talulaayi mbalo yabadi bafunde shi: “Kyodi mulombeene kupeta.” (3) Mupe trakte na omutekye bwadya kushaala na kubadika yaaya ingi myanda ibaashala papete nsaa. (4) Kumpala kwa kukatuka, muleeshe lukonko lwi kunyima kwa trakte muushi mwa ka mutwe ka mwanda akamba shi: “Bwa kunangusheena” na wepusheene naye bwa nkalukiila bwa kupeta lwalulo mu Bible ingi nsaa.
4. Mushindo kinyi watudi balombeene kufuba na trakte ipya nsaa yatwalukiila mu kutala muntu atwikalanga besambe naye?
4 Kwalukiila mu kutala yawa muntu nkubofule dingi. Fuba nka penda na maverse abadi baleeshe kunyima kwa trakte bwa kwaluula ku lukonko lwekalanga mulekye mususa ukile. Kumpala kwa kwilekeena naye, tuusha broshire a Mukandu wibuwa w’Efile Mukulu! abadi baleeshe pano, muleshe sha-nshibo na osangule dilongyesha adisambila myanda ibungi itale wawa mwanda wanwisambanga naye, na omulekyele broshire. Su bamwata, epusheneyi bwanudya kutaluula yawa broshire dingi efuku. Boopu kubanga kulonga na muntu Bible! Sunga shi pa mutwe pa kumupa broshire, we mulombeene kumupa ungi trakte na wepusheene naye bwanudya kutentekyesha naye pamune pabitale yawa trakte musango aufiki.
5. Muulo kinyi wi nawo ma trakte mu mudimo wetu wa bulungudi?
5 Twi bapwe kufuba na ma trakte takudi bipwa bikile pa 130. Sunga mbyayidi ilekeene ku bukata na mushindo wabadi bayipwe, nyi mbyamo bikata bya mudimo wa bulungudi. Tufubeyi kalolo na ino trakte ipya yabadi batuushe bwa kutungunuka na kupalakasha kiukilo kya mu Bible mu nsenga ishima.—Mye. 15:7a.